2
Ŋicne ŋicne okacne fisi‐jareocmu
1 O ŋicguru qâomane,
ŋoŋe qâture‐fârerâ tumaŋnenʒepieŋ.
2 Ŋoŋe padi jawa mâŋâŋzi ficne sueme raekac
irec sâc eŋarehuc mi jâjâpec‐ŋopa mâc juhapie,
me Wofuŋ kimbeŋ‐ticnezi fai‐ŋeŋicko mi fefe mâc fohame,
me Wofuŋte okac dameŋzi biac mi maic‐ŋopahame
iŋuc hâcne enʒepieŋ.
3 Mâreŋko maŋhuhuŋ juhuc sâcmutâc dâŋticne mana rereŋ efâreeŋgopieŋ
ŋoŋe Wofuŋ wira basac ecnenʒepieŋ,
erâ tiŋne hatare henʒiriŋnehuc maŋuruc junʒepieŋ.
Iŋuc ehuc Wofuŋte okac dameŋko aakic bâfuaniŋmu mecne.
4 Gaza â Asikaloŋ hae jahe niniŋ siarereŋ fuarâ fonicmu;
Asidode hae râsi jaŋe ʒoaŋ ɋaɋackoa fisirâ
hae rune jâpec‐jopapie raniŋmu,
â Ekoroŋ hae i hetâtieniŋmu wâc.
5 Jei, Kreta ŋicguru hâwecmecko ŋeŋe juju eeŋgopieŋ,
Wofuŋ e râsi eŋarehuc ʒiŋuc mukac:
O Kanaaŋ, Filisa ŋic jaŋere mâreŋ,
no ima bacgupe ŋecjucfâcge jaŋe omae‐fârenʒepieŋ.
6 Â mâreŋ hâwec heririŋko fokac
i lama bulimakao jaŋere biŋe ezejec.
7 Iŋuc fuame hâwec heririŋko mâreŋ forakac
i Judaŋic ʒanʒaŋne jaŋere biŋe ehame
lama bulimakaofâc‐jeŋic râec‐jopahuc
jaŋacne ine hae ŋafeme sâc Asikaloŋ haeo ŋec foc enʒepieŋ.
Wofuŋ Anutu‐jeŋiczi iqic‐joparâ busâqoc faio juju‐jeŋic
i bârârieha bubiaŋ faio juju fua‐jareocmu hâcne.
8 Israere Anutu Tâpiri Ɋuŋɋasaŋ Wofuŋ e ʒiŋuc mukac:
“No Moabi ŋic jaŋere mumusoriŋ dâŋ,
â Amoŋŋic jaŋere qaqaisoc dâŋ i mâmâc mana‐fârepo,
jaŋe ŋicfâc‐nane musoriŋ‐jopahuc
mâreŋ‐jeŋicte manapie wawahane ewec.
9 No jujâmbâŋkekopaczi ʒiŋuc mupaŋkekopac:
Moabi mâreŋ i Sodom hae iŋucne ezejec,
â Amoŋ mâreŋ i Gomora irec sâc,
ehuc hae mâreŋ ira fâpâ ʒârâ â qânâ siec fuame
burocne erâ fozejec.
Ehame ŋicfâc‐nane ʒanʒaŋne jaŋe wiac‐jeŋic jowac rohuc
mâreŋ‐jeŋic rauckeniŋmu.”
10 Wiac izi hâcne maŋfefe‐jeŋicte okacne fua‐jareocmu
jaŋe Anutu Tâpiri Ɋuŋɋasaŋ Wofuŋ ere ŋicfâc
musoriŋ‐jopahuc mana wahac‐jopambiŋ irec.
11 Wofuŋzi wiac hâhâwicne ejareocmu;
jei, e mâreŋte nemu fuŋne fuŋne bâsirowec‐jopa‐fâreocmu,
ehame ŋicne ŋicne jaŋe ru sâc mâreŋ‐jeŋickoa juhuc
Wofuŋ dapecneniŋmu.
12 Etiopia ŋic ŋoŋe wâc iŋuc jaha
ʒika‐nanere nânâ enʒepieŋ.
13 Eme Wofuŋ e meticne sicnerâ faic mâreŋ, Asiria hâcne,
i râsi ecnehuc ima bame
Niniwe haezi mâreŋ burocne irec sâc kereŋkerâ foocmu.
14 Eme lama bulimakao mecne, kâte qowi mecne,
jaŋe haemaŋko waha fomananiŋmu;
tucwipe â mâreŋpecne qowi jaŋe sesuctacko
fic hae‐jeŋic banʒepieŋ;
ŋafe wipezi qâqâtâc kataŋko ŋehuc dâŋezejec,
â kâec kâeczi ine motâcfuŋko ira ŋehuc dâŋezejec.
Jâmâzâc jâczi fic basarickekicne
i Wofuŋzi ima baocmu hâcne.
15 Hae ʒerinehec ŋewec ine hâcne,
e jahacnere maname feha ʒiŋuc mujujec:
“No mocjahazi fekicne sâko.”
Ʒi ine niniŋ siarereŋ fuarâ fohuc
mi kâte qowi jaŋere ŋeŋe hae ezejec i!
Ehame ŋic sicne fotâc eeŋgopieŋ sâc
mehuhuŋ‐jeŋic hehesackehuc mu âke sisic ecneeŋgopieŋ.