HEBIRAIO
Papia i mitiŋic eki me eki qâreŋkewec i mi manaŋgopeneŋ. Mâc Paulore babaficfâc jaŋeraonec moczi qâreŋkewec i sawa manaŋgopeneŋ. Ŋic gâcne jaŋe Apolozi mecne qâreŋkewec, â gâcne jaŋe Banabazi qâreŋkewec, iŋuc mueŋgopieŋ. Papia rune ine Palestaiŋ mâreŋkonec Judaŋic Miti Opâ rua‐jarekicne jaŋe. Hebiraio i Judaŋic jaŋere ʒâŋe raŋɋa moc. Papia qâreŋkewec mitiŋic eki Itali mâreŋko juhuc qâreŋkewec (gaŋ 13:24). Timoteo kâpâcwâru fickonec wahawec dameŋ ira qâreŋkewec (gaŋ 13:23).
Palestaiŋ mâreŋko Judaŋic gâcne Jesure kikefuŋ erâ juhapie fai‐jeŋicko ʒika kâpâcwâru feme bugâpâcko jumbiŋ. Moneŋ mafa i wâc jowac rokicne (gaŋ 10:32–34). Eme pârâckehuc ʒiŋuc mumbiŋ: Miti ɋâricne bajuhapene fific guguriŋ boc enâreŋgopieŋ. Irec miti ɋâricne beherâ raŋɋane sawa bajuhuc mâteŋne junʒepeneŋ (gaŋ 4:4–6 â gaŋ 10:26–29). Tucnezi biac mitire tutumaŋko mocwâc mi fisihuc qâoma embiŋ (gaŋ 10:25). Ine hâcne, Jesure hata râpeckerâ Judaŋic hata raŋɋa‐jeŋic i mocwâc âtezo mumbiŋ.
Eme mitiŋic papia qâreŋke‐jarewec eki bufac qajarehuc dâŋ ʒiŋuc qâreŋke‐jarewec: Jesurao qohota sanaŋkehuc miti kiki papaŋ jaha bajuzo (gaŋ 3:1 â gaŋ 10:23). Ehuc qâoma rorokac tâmiric juzo (gaŋ 10:19–25). Â Jesure ʒiŋuc qâreŋkewec: Jesu e miti fârine jâmbâŋ bâfua‐nârewec. Mârâc jaha mitio wiac ewarekicne i sahacne sawa. Jesu e fekicne sâko, porofete â aŋelo jaŋe ere wahacmicne sasawa (gaŋ 1 â 2). Mose â Josua jahe Jesure wahamicne (gaŋ 3 â 4). Taha bapa ŋic jaŋe sâqocne mutâmireniŋte tâpiri mi fojarewec. Qowi bâzi rikembiŋ irec fârine mi muzo, i mâc sâsâc ekicne. Jesu e taha bapa sâko fârine, eki kiŋnâŋecte kiwiric rome tarawec (gaŋ 4–10). Mitiŋic guru sâko mârâc jaha mamanasiŋhec juhuc sanaŋkembiŋ jaŋerao findendeŋnehuc ɋicwânʒâŋhec erâ juzo (gaŋ 11 â 12). Erâ miti qaqazu â micne bapa hata âte‐nârembiŋ, ijaha âte raku hae ŋeŋe sanaŋ bâfua‐nârekicne, ira fisizo (gaŋ 13).
1
Jesu e miti mujaŋgeŋke‐nâre tarawec
Anutu e mârâc jaha porofete ejareme jaŋe mimiŋnefâc‐nâŋec dâŋ hawarine fuŋne fuŋne â hatane fuŋne fuŋne jaza warekuhapie ine ʒâhec tataranao, dameŋ ʒira hâcne, Ŋokâ ecneme dâŋ nâzâwec. Ŋokâ e wiac sasawa irec rune juocte mucnewec, ehec hâcne wiac bâfua‐fârepic. Mi Mâ 2:8; Joh 1:3; Kol 1:16; Mat 21:38 Anutu eri tatamac‐ticnere qâreŋ erao fuawec fokacte â juju‐ticnere sâc juekacte tâpiri dâŋticnezi wiac sasawa dope siŋsiŋ ecneha foekac. Eki sâqocne ʒure bataniŋ gie bafârerâ faic fekicne sâko ere fâreo fewec ŋekac. Mi Mâ 110:1; Kor II 4:4; Kol 1:15; Mar 16:19; Heb 9:14, 26 Aŋelo hucjopa‐fârewec jukac, irec sâcko aŋelo ʒâŋe siricke‐fârehuc ʒâŋe fekicne hotâckewec. Fil 2:9
Aŋelo jaŋe wahakicne, Ŋokâ e fekicne
Anutuzi mo aŋelo mo kecʒiŋuc moc âzâcnewec:
“Go hâcne Ŋokâ‐nane,
no miŋecgac bâfuacgukopac”?
Me kecʒiŋuc:
“Noni Mamac ecnerâ jupemu
â eki Ŋokâ enarerâ juzejec”? Mi Mâ 2:7; Sam II 7:14; Heb 5:5; Apo 13:33
Moc ine juku mârâc fufua e mâreŋko râeme wahaocmu irec dâŋ ʒiŋuc muwec:
“Anuture aŋelofâc jaŋe dieŋzi hecne‐fârenʒepieŋ.” Rom 8:29; Mi Mâ 97:7
Aŋelo jaŋere kecʒiŋuc mukicne:
“E aŋelofâcne hawari‐jeŋic bâtikieme mâŋâŋ eeŋgopieŋ,
â kiŋaŋ qaqafâcne hawari‐jeŋic bâtikieme ʒocbâruŋ eeŋgopieŋ.” Mi Mâ 104:4
Ŋokâre ine ʒiŋuc mukicne:
“Anutu go ŋicwofuŋ ŋeŋege i ŋeŋe sanaŋ ŋeraʒihuc juocmu,
â ŋicwofuŋ gunuge i bâbâtiŋ gunu biaŋ. Mi Mâ 45:6, 7
Go tiŋnere egareekac â hehesic ine râsi ecneekic.
Irec Anutu, gore Anutu, eki ʒeri wokemaŋ rua‐garewec,
i âgofâcge jaŋere sâc jâuruhuc rua‐garewec.”
10 Moc ʒiŋuc mucnekicne:
“Wofuŋ go fufuŋkenao mâreŋte hobeteŋ râemeŋ,
â sambâŋne sambâŋne jaŋe megere qâreŋ. Mi Mâ 102:25–27
11 Jaŋe siroweniŋmu, go ine jusanaŋkekic,
jaŋe ŋaqi iŋucne raŋɋaŋkeniŋmu.
12 Ŋaqi iŋucne epie goki bataforiec‐jopacmu,
eme jaŋe hawari moc eniŋmu.
Goki ine juekic ijaha juekic,
â jara dameŋge i moc mi taraocmu.”
13 Anutu e mo aŋelo mo ʒiŋuc moc âzâcnewec:
“Ware fâre‐naneo ŋehaŋtec
râsifâcge guruc‐jopape
kikegere ââtesiŋ enʒepieŋ”? Mi Mâ 110:1
14 Aŋelo sasawa jaŋe mârozi kiŋaŋ qaqa, ŋic bâbâpiaŋ rauckeniŋte mukicne jaŋe bafic‐jopaniŋte sorec‐jopakicne. Dan 7:10; Mi Mâ 34:8; 91:11

1:2: Mi Mâ 2:8; Joh 1:3; Kol 1:16; Mat 21:38

1:3: Mi Mâ 110:1; Kor II 4:4; Kol 1:15; Mar 16:19; Heb 9:14, 26

1:4: Fil 2:9

1:5: Mi Mâ 2:7; Sam II 7:14; Heb 5:5; Apo 13:33

1:6: Rom 8:29; Mi Mâ 97:7

1:7: Mi Mâ 104:4

1:8: Mi Mâ 45:6, 7

1:10: Mi Mâ 102:25–27

1:13: Mi Mâ 110:1

1:14: Dan 7:10; Mi Mâ 34:8; 91:11