FILEMOŊ
Filemoŋ e Kolosai haeo juwec. E ŋic moneŋ mafa‐ticnehec. Jesure kikefuŋfâc jaŋe ficticnao tumaŋne jumbiŋ (ombâŋne 2). Kiŋaŋ qaqafâcne jumbiŋ jaŋeraonec moc ʒâŋene Onesimo eki wiserâ raku Roma haeo Paulorao fisiwec. Fisime Paulozi miti qazucneme manarâ maŋne bârisiewec. Erâ Paulo kiŋaŋ qacnehuc juwec. Paulo e motecte maname biaŋkewec (omb. 11–12). Erâ sakareocte maname mi sâckewecte bârisiewec (omb. 13–14). Bârisieocmurâ kecʒiŋuc manasuwec: Mâc sorepe ra fisime bomboŋ‐ticnezi jâpezacte papia qâreŋkezepac. Iŋuc manasuhuc Filemoŋte papia qâreŋkewec hâcne, kecʒiŋuc muhuc: Mârâcko qâpuc motec juhuc sahacnezi sawa gie bagarewec. Ʒi ine mitio âgoge ewecko sahacnezi â maŋnezi mâmâc jugareocmu (omb. 16).
Kolosai haeonec miti mamana papia wirec‐jeŋic qâreŋkerâ Filemoŋte moc buc qâreŋkewec. Erâ papia jajahec Tikiko râcneme barawec. Barahuc Onesimo jowame mâmâc rapic.
Paulore papia ine mac hâcne. Eki papia qâreŋkeme Miti Ɋârio râekicne i ʒiŋuc: Roma jaŋere 1, Korinti jaŋere 2, Galata jaŋere 1, Efeso jaŋere 1, Filipi jaŋere 1, Kolosai jaŋere 1, Tesalonike jaŋere 2, Timoteore 2, Tito ere 1, Filemoŋte 1. Papia 13 ine hâcne qâreŋkewec. Papia‐ticne sasawa i mitire ʒâkâŋ sâko.
1
Mumuʒâwe â jambuŋdâŋ
Paulo, Kristo Jesure kâpâcwâru ŋic no, â âgo‐nâŋec Timoteo, nâhe Filemoŋ joroc babafic‐nâhec gore papia ʒi râekoperec; Efe 3:1 erâ wâc ŋokac âgo‐nâhec Apia â momori âgo‐nâhec Akipo, erâ Filemoŋ gore ficko mitire tumaŋneeŋgopieŋ ŋoŋere mâmâc râekoperec. Kol 4:17; Tim II 2:3 Mamac‐nâŋec Anutu â Wofuŋ Jesu Kristo eraonec aki anonoc â wama ŋoŋerao fotâcnerâ fozejec. Rom 1:7
Paulo e Anutu Filemoŋte erâ daŋge nunumu ecnewec
No nunumuo gore manasuhuc sâc Anutu‐nane daŋge âzâcneekopac. Go Wofuŋ Jesurao â mitiŋic jaŋerao maŋge domakac â jaŋere mamanac juekic irec biŋe manakopac hâcne. Eme go mamanasiŋko nâŋehec maŋ mocjaha emeŋte wiac biaŋne Kristoraonec fua‐nârewec fokac i sasawa mana taracmurâ numuekopac. Fil 1:9 Âgo‐nane, go mitiŋic bubiaŋ qajareekomec, irec no maŋjauŋgere bunane urueme wemo afecne ʒeri epo. Kor II 7:4
Kiŋaŋ qaqa Onesimo ere dâŋ
Go wiac ecmurâ i no Kristore micte mupaŋke‐garezo murâ sâcne afeckerâ ezapo, erâ sifu maŋjauŋte erâ mâc mu hemunaŋ egarehuc mupe; ŋicqizec Paulo no hâcne, erâ dameŋ ʒi wâc Kristo Jesure kâpâcwâru ŋic epozi, 10 no motec‐mae Onesimo, kâpâcwâru ficko juhape fua‐narewec, ere gazakopac. Kol 4:9; Gal 4:19; Kor I 4:15 11 E mârâcko jugareme mi sâckewec, ʒi ine no â go mâmâc junâcteme sâckekac. 12 Buhândâŋ‐nane e hâcne sifu bârisie‐garepe fakac. 13 No Biŋebiaŋte erâ kâpâcwâru ficko ŋehape gore âkehoc kiŋaŋ qanareocte sakarezo mupo. Fil 2:30 14 Erâ go mi manahaŋtecne sakarepe urucko mâcne, jâiŋko qikiŋne‐narezicte manabâc ehuc bârisie‐garekopac. Kor II 9:7; Pet I 5:2 15 Behecgume e tâmiric piticne jumeŋ, i fuŋne ʒiŋucte mecne, risie‐garerâ gohec jusanaŋkeocte. 16 Kiŋaŋ qaqage sawa mâcne, mitio âgoge erâ juocte fagarekac. No hâcne iŋucne junarewec, â go ine fehuc jugareocmu i ʒiŋucte: Sahaczi gore juweczi Wofuŋte erâ bufuŋge ekac. Tim I 6:2 17 Go nore manatec âgoge ekopacko ine e hefârockehuc manatec Paulo hefârockekopac ezejec. 18 Wiac moc sipiricke‐garewecko me tofage moc erao fokacko ine nore muzemec. 19 Paulo no hâcne ʒi qâreŋke‐garekopac, okacne bazu‐garepemu. No nahacne tofa wâc gorao kâcɋene fokac, noraonec hâcne fuameŋ i; erâ irec wemocte boc mupemu. Gal 6:11; Tes II 3:17 20 Âgo‐nane, go Wofuŋte erâ wiac buafec tahacnucmurâ enarekac. Kristore erâ bubiaŋ qanarezemec.
Mumutara dâŋ
21 Go micrereŋge fokac i manahuc dâŋ ʒi qâreŋke‐garekopac. Erâ manakopac, gazakopac i sawa mi ehuc maŋgere gâcne ʒuhuckecmu. 22 Ŋoŋe nunumuzi bataracnupie Wofuŋzi no bâriesiecnu‐ŋareme fâpemurâ mukopac, eme go irec ŋeŋe hewâneŋke‐narezemec. Fil 1:25; 2:24
23 Kristo Jesure kâpâcwâru ŋic âgo‐nane Epafra e manasu‐garekac. Kol 1:7; 4:12 24 Erâ babaficfâc‐nane Mareko, Aristako, Dema â Luka jaŋe iŋuc jaha manasu‐gareŋgopieŋ. Kol 4:10, 14 25 Wofuŋ Jesu Kristo ere aki anonoczi maŋŋeŋicko fozejec.

1:1: Efe 3:1

1:2: Kol 4:17; Tim II 2:3

1:3: Rom 1:7

1:6: Fil 1:9

1:7: Kor II 7:4

1:10: Kol 4:9; Gal 4:19; Kor I 4:15

1:13: Fil 2:30

1:14: Kor II 9:7; Pet I 5:2

1:16: Tim I 6:2

1:19: Gal 6:11; Tes II 3:17

1:22: Fil 1:25; 2:24

1:23: Kol 1:7; 4:12

1:24: Kol 4:10, 14