14
Israe ŋic jaŋe Wofuŋtao risieniŋte jazakicne
O Israe, go Wofuŋ Anutuge erao risiezemec,
go kiŋ bahacgere erâ fâfâcguwec hâcne.
Ŋoŋe dâŋ ʒi bajuhuc Wofuŋtao risierâ âzâcneniŋ:
“Go sâqocne‐nâŋec bâtâmire‐fârec, erâ ehâmo‐nârec,
eme nâŋe micbipic‐nâŋeczi muteŋ bâteŋ egarenʒepeneŋ.
Asiriazi mi bafic‐nâpozejec,
nâŋe becâsic faio rac warec mi enʒepeneŋ,
ehuc meqâreŋ‐nâŋec i ʒiŋuc mocwâc mi âzâcnenʒepeneŋ: ‘Anutu‐nâŋec’.
Bekâ mâsiŋ jaŋe gorao aki anonoc bâfuaeŋgopieŋ hâcne.”
 
No ine maŋrâŋgeŋ‐jeŋic bâuruepemu,
ehuc buafec jaha maŋjauŋ ejarepemu;
no kimbeŋ‐nane bârâriepo hâcne.
No titikuc iŋucne erâ Israe bâgunuckepemu,
eme ʒariŋ iŋucne âri qazejec,
â jâmâzâc iŋucne gâtâ sicneme huzejec.
Ehame fierâ qaratieme oliwa jâc iŋucne biaŋkerâ domazejec,
ehuc âsune Lebanoŋ jâckâtere âsu biaŋ iŋucne fizejec.
Jaŋe risierâ nore mumucko ŋec foc enʒepieŋ,
ehuc padi jacgoŋ iŋucne fua biaŋ erâ
waiŋte sâc âri qanʒepieŋ,
ehame âsu‐jeŋic i Lebanoŋ waiŋte âsu biaŋ
irec sâc fizejec.
 
O Eferaim, nemuɋâŋ jaŋe wemo wiac moc egareniŋmu?
Noni hâcne mana‐garehuc jowacgupemu,
no wetejâc ɋâricne iŋucne erâ domazepac,
ehame wiac fârine noraonec hâcne rohuc jucmu.
 
Mamanahec juekaczi dâŋ ʒirec fuŋne manazejec,
â maŋfârihec juekaczi mana tarazejec.
Wofuŋte hata i tiŋne sasawa,
irec ŋic tiŋne jaŋe ira raeŋgopieŋ,
qaqatara ŋic jaŋe ine ira fâfâc‐jopame waha jopaekac.