JOELE
Porofete Joele juju‐ticnere dâŋ â binaŋ boc mi manaŋgopeneŋ. Papia‐ticnao irec dâŋ moc mi qâreŋkekicne fokac. Mamac‐ticnere ʒâŋe mocjaha mufuakicne. E jahacnere ine mâc ʒiŋuc sawa manaŋgopeneŋ: E Judaŋic jaŋe Babiloŋ mâreŋko kâpâcwâruonec risierâ Judaia mâreŋko juhapie juwec erâ gie‐ticne bawec. Ehuc taha ufuŋko taha bapa ŋic jaŋere guruo juhuc porofete dâŋticne Wofuŋte micte muhuc juwec. Dameŋ ira Judaŋic gâcne jaŋe mâreŋ gâcnao siŋsaŋ qarâ juhapie gâcne jaŋe sawa mâreŋ‐jeŋicko risierâ taha ufuŋ â Jerusalem haere qânâsac heɋârerâ bambiŋ.
Joele papia‐ticne i piticne sawa, erâ bâfâuckepene dâkâne piic piic jajahec fuakac. Moc i gaŋ 1—gaŋ 2:27, â moc ine gaŋ 2:28—gaŋ 3.
Joe 1:1Joe 2:27 irec maŋnao hâpiczi fuarâ rânâ monʒaŋ wiac sasawa nanʒaŋne‐fâreocmu irec uŋsawaŋ â findaŋdâŋ fokac. Porofete e irec maname Wofuŋte dameŋ sâkore sâsâc ewec, irec maŋ bâbârisie bâfuaniŋte â maŋ bâbârisie hombaŋ ŋeniŋte, erâ wâc sowa jujure dâŋ i mâmâc jazahuc esoc qafeŋ ejarewec.
Joe 2:28—Joe 3 ira bâbâpiaŋte findaŋdâŋ fokac. Hâpic wiac omaeme Wofuŋzi Israe ŋicguru mocwâc maic‐jopahuc Mâro‐ticne jare‐fâreocmu irec findaŋdâŋ hâcne. Wofuŋ dameŋ sâko‐ticne i ŋicguru gâcne jaŋere okac dameŋ eocmu, ŋifec ine dameŋ ira Wofuŋzi Judaŋic ehâmo‐jareme eri qaraweŋ â bâbâpiaŋ‐ticne fua tâcneocmu.
1
Hâpic repicne jaŋe wiac nânâne sipiricke‐fârembiŋ
Wofuŋte dâŋ Petuere ŋokâ Joele erao fuawec ʒiŋe hâcne.
 
Ŋicraŋɋa ŋoŋe mananiŋ,
â ŋic ŋokac sasawa ŋoŋe hazec râe‐fâreniŋ!
Wiac ʒi fuawec iŋucne ŋoŋere dameŋko,
me mamacfâc‐ŋeŋic jaŋere dameŋko moc fuawec me?
Ŋoŋe irec binaŋ naru motecfâc‐ŋeŋic bajarenʒepieŋ,
eme jaŋe ŋosafâc‐ŋeŋic jazanʒepieŋ,
â ŋosafâc‐ŋeŋic jaŋe apafâc‐ŋeŋic binaŋ ijaha bajarenʒepieŋ wâc.
 
Hâpic repicne jaŋe fisirâ
wiac nânâne gâcne nâhuc gâcne nâ bâtiric epie fowec,
i hâpic âgofâc‐jeŋic jaŋe arecne arecne fisirâ
nâraku nâmiziembiŋ.
Waiŋ opâ ɋâricne ŋowac rokicnere
âmbâŋ nâ areŋ eeŋgopieŋ ŋoŋe
mana ɋâɋârerâ kio owa eniŋ.
 
Râsi tâpiri sâkohec â wowosene tâmiric
jaŋe mâreŋ‐nane ima baniŋte ware fisimbiŋ,
micsiec‐jeŋic i laioŋte micsiec iŋucne,
â laioŋ ŋokacnere micʒârâ irec sâc.
Jaŋe waiŋ qizec‐nane ima bambiŋ,
â jâmbojâc‐nane sipirickembiŋ,
ehuc sahacne nâhockepie qaŋqaŋ fua‐fârewec.
 
Ŋoŋe ŋokac ʒeŋoŋ moc ŋicbiŋe‐ticne hâmome
mateŋ qonaŋkerâ kio mamakuc eekac
irec sâc kio mamakuc enʒepieŋ.
Taha bâzire wiac â waiŋzi taha bâzi rârâe
i Wofuŋte ufuŋko omae‐fârewec,
eme taha bapa, Wofuŋte kiŋaŋ qaqa hâcne,
jaŋe busâqoc manahuc juŋgopieŋ.
10 Giegaŋ wiac ima bafârekicne,
irec mâreŋzi makuc bakac;
padi jacgoŋ wiac sipirickekicne,
â waiŋ jâcne hâmo ɋaŋac ewec,
â oliwa jâczi ururucke‐fârewec.
 
11 Gieo wiac fârine arictac efârewecte he sarac eeŋgopieŋ
ŋoŋe padi â jacgoŋ basahuc bipic tatara eŋarezejec,
â waiŋ gie rune ŋoŋe kio owa enʒepieŋ.
12 Waiŋ qizecne i hâmo ɋaŋac ewec,
jâmbojâczi ururuckewec,
hâmeŋ fâric â nemuja erâ jâc wiac gâcne sasawa
i hâmo ɋaŋac efârembiŋ hâcne.
Ehame ŋic ʒeri bubiaŋ‐jeŋiczi hetikieme
ki busâqoc fuawec.
13 O taha bapa, ŋoŋe mateŋ qonaŋkerâ kio mamakuc eniŋ,
â alatao gie baeŋgopieŋ ŋoŋe kio owa eniŋ.
O Anutu‐nanere kiŋaŋ qaqafâc,
ŋoŋe Anutu‐ŋeŋicte ufuŋko taha bâzi rârâe,
â waiŋzi taha bâzi i omaewecte
taha ufuŋko ferâ ŋafeo mateŋ‐ŋeŋichec juniŋ.
 
14 Ŋoŋe nânâ sowa jujure dameŋ moc mupaŋkenʒepieŋ,
ehuc kikefuŋ hetumaŋ‐jopanʒepieŋ.
Erâ micne bapa â ŋic ŋokac sasawa jaŋe ejarepie
Wofuŋ Anutu‐ŋeŋicte ufuŋko tumaŋne‐fârehuc
Wofuŋ wira wâwâsic ecnenʒepieŋ.
 
15 Jei, dameŋ ʒi ʒâic dameŋ!
Wofuŋte dameŋ sâko maickekac hâcne,
ehuc tâpiri rune eraonec sisipiric‐ticnehec fisikac i.
16 Jei, nânâ wiac‐nâŋec i ʒâŋe fai‐nâŋecko omaewec,
â ʒeri bubiaŋ i Anutu‐nâŋecte ficko arictac ewec wâc.
 
17 Wiac ukicne sarambiŋ i ɋaŋa‐fârekac,
â nânâ ficne ficne rowaŋ tacne forakac;
erâ nânâ mâriri mi fuawecte
nânâfic gâcne mâc ŋehuc hericke ʒaŋ efârekac.
18 Nânâ‐jeŋic omae‐fârewecte qowi jaŋe owackeŋgopieŋ,
bulimakao jaŋe betaŋkeŋgopieŋ,
â lama jaŋe hâmo sipiric eŋgopieŋ.
 
19 O Wofuŋ, ʒoczi sopâc mâreŋko qowi jaŋere nânâ ʒafârewec,
â ʒocbâruŋzi gieo jâc wiac doma rawec i ʒâseŋke‐fârewec,
irec gorao kio wâwâsic ekopac.
20 Opâ ʒicke‐fârewec,
â ʒoczi wiac nânâne ʒâseŋke‐fârewecte
kâte qowi jaŋe iŋuc jaha gorao kio owa eŋgopieŋ.