2
Wofuŋ e mâreŋ sâc wama fuaocte guriŋne baekac
(Mik 4:1–3)
1 Amozire ŋokâ Jesaja e Juda mâreŋte â Jerusalem haere dâŋ wiac hone manac ewec ʒi.
2 Ʒâhec dameŋko wiac ʒiŋuc fuaocmu:
Wofuŋte ufuŋ irec tikizi qiŋ herâ ŋehuc
tiki sasawa jaŋere micne eocmu;
ehuc mâreŋ facne qâhuc‐jopa‐fâreocmu;
eme ŋicne ŋicne jaŋe ira heâckerâ fisiniŋmu.
3 Eme ŋicguru bocjahazi fisirâ muniŋmu:
“Warepie Wofuŋte tikio fenaŋ,
Jakobore Anutu ere ufuŋko.
Eme eki hata‐ticne nâzâ nâwotuc eme
gâŋticnao âtehuc junʒepeneŋ.”
Zioŋkonec sâcmutâc râwiŋneocmu,
â Jerusalemkonec Wofuŋte dâŋ haŋ baocmu hâcne.
4 Eki ŋicne ŋicne ŋondeŋ‐jeŋicko mumutiŋ gie baocmu,
ehuc ŋicguru bocjaha dâŋ mutiŋne‐jareocmu.
Eme jaŋe ʒika‐jeŋic bâtikiepie kinoŋ fuaocmu
â damu‐jeŋiczi gie sâqe eocmu;
guru moczi guru moctao râsi moc mi fisiocmu
â ʒikare ʒaʒawie gie i omaeocmu.
5 Ajoc, Jakobore kikefuŋ warepie
Wofuŋte tatamacko junaŋ.
Wofuŋ e pepec penaroŋhec jaŋere dâŋ mutaraocmu
6 Go ine ŋicfâcge, Jakobore kikefuŋ,
ʒiŋucte qikiŋ‐jopameŋ:
Jaŋe ʒoaŋ wewefunaonec qaŋgec mâsi amecke jueŋgopieŋ,
â Filisa ŋic iŋucne faŋfaŋzi fusec‐jopaekac,
â ŋic jabane jaŋehec meo roroc eeŋgopieŋ.
7 Mâreŋ‐jeŋic siliwa â golzi fusucmawec,
boreŋ‐jeŋic oomaene tâmiric;
mâreŋ‐jeŋic becâsiczi fusucmawec,
ʒika keretac‐jeŋic oomaene tâmiric.
8 Mâreŋ‐jeŋic nemuɋâŋzi fusucmawec
eme meqâreŋ‐jeŋic dapecneeŋgopieŋ,
mejeŋiczi wiac ba akic embiŋ i hâcne sâseeŋgopieŋ.
9 Iŋuc ehuc ŋiczi wawahane erâ
qoro tutucne embiŋ;
eme go irec kiŋ mi behe‐jarecmu.
10 Go qânâuŋko raʒi tâmirec,
â rufemaŋko soŋke sanaŋkec;
go Wofuŋte tâpiri wânʒâŋ wisecnec,
ehuc tatamac ɋuŋɋasaŋ‐ticnaonec râriec.
11 Ŋicte penaroŋ ʒâŋe bawahazo,
â ŋic jaŋere maŋfefe bâuruŋkezo;
eme ʒoaŋ ira Wofuŋ e buc fahare hâŋ domaocmu.
12 Anutu Tâpiri Ɋuŋɋasaŋ Wofuŋ e dameŋ bawec fokac,
ira pepec penaroŋhec sasawa dâŋgie jareocmu
â wiac faharerâ doma rakac i bawaha‐fâreocmu.
13 Lebanoŋte jâmâzâc sasawa ʒoricne ʒora
â Basaŋte boriŋjâc bâuruŋ‐jopa‐fâreocmu.
14 Erâ wâc tiki ʒora sasawa râsi ejareocmu
â mâreŋ facne ferâ ŋerakac i iŋuc jaha.
15 Erâ wâc fic hâŋʒora sasawa râsi ejareocmu,
â qânâsac basanaŋkekicne i iŋuc jaha.
16 Erâ wâc Tarasisi woke sasawa râsi ejareocmu,
â wiac basarickekicne sasawa i iŋuc jaha.
17 Eme ŋicte pepec sisiric badapezo
â ŋic jaŋere penaroŋ bawahazo,
ehame ʒoaŋ ira Wofuŋ e buc fahare hâŋ domaocmu.
18 Eme nemuɋâŋ jaŋe omae‐fâreniŋmu.
19 Â ŋiczi qânâuŋko â mâreŋ hawecko raʒihuc
Wofuŋ tâpiri wânʒâŋ‐ticne wisecneniŋmu
â tatamac ɋuŋɋasaŋ‐ticne fuame rârieniŋmu.
Eki dameŋ ira mâreŋ hâhâwic hecneocte fahareocmu.
20 Dameŋ ira ŋiczi nemuɋâŋfâc‐jeŋic
dape‐jareniŋte siliwa â golzi bambiŋ
i hâcne ʒuc â mindi mindi behe‐jareniŋmu.
21 I qânâuŋko â haroŋaŋ hawecko raʒihuc
Wofuŋ tâpiri wânʒâŋ‐ticne wisecneniŋte
â tatamac ɋuŋɋasaŋ‐ticne fuame rârieniŋte iŋuc eniŋmu.
Eki dameŋ ira mâreŋ hâhâwic hecneocte fahareocmu.
22 Ŋic e sâke‐nâŋecko nokafe fokac irec sâc,
irec e râpeckeniŋ me!
Ere wemo wiac fârine muzo.