66
Wofuŋte mumutara gie tarame Zioŋko jujuhâmo fuaocmu
Wofuŋzi kecʒiŋuc mukac: “Sambâŋzi eri ŋeŋe‐nane
â mâreŋ e kike‐nanere ââtesiŋ;
irec ŋoŋe wemo fic me hae moc banarepie
maŋnao jumanazapo me?
Wiac fokac sasawa i menanezi bafârepo,
irec nore biŋe efârekac, Wofuŋzi iŋuc mukac.
No ŋic kecʒiŋucne hone maiŋ ecneekopac:
Maŋhuhuŋ â bu hehericne juekac â dâŋnanere ɋarac ɋarac qaekac.
 
“Moc e bulimakao ŋicne qa hezuc eocmu e ŋicqaqa ere sâc;
moc e lama bâzi rikeocmu
e ŋic moczi qâto upene qapirickeekac ere sâc;
moc e taha bâzi rikeocmu
e ŋic moc becsoczi taha baekac ere sâc,
â moc e hosâc âsu rikeocmu
e nemuɋâŋ araŋ bacneekac ere sâc.
Jaŋe hâcne jaŋacne hata ba wosâc embiŋ
â qâpuc wiac mamakâcnere aŋac‐jopaekac.
Irec no iŋuc jaha bâʒâic‐jopazore aŋacnuocmu
â wiac bipic tatarane mupe fai‐jeŋicko feocmu;
no wirape moczi moc micnaneo mi rowec
â dâŋ mupe mi manambiŋ irec.
Jaŋe nore maio wiac sâqoreekac i hâcne embiŋ
â no mana aŋac mi eekopac i hâcne ba wosâc embiŋ.”
 
Wofuŋte dâŋ manarâ ɋarac ɋarac qaeŋgopieŋ
ŋoŋe dâŋticne kecʒiŋuc mananiŋ:
“Qomâfâc‐ŋeŋic qaisoc‐ŋopaeŋgopieŋ
â ʒâŋe‐nanere erâ bâsuec‐ŋopaeŋgopieŋ jaŋe muŋgopieŋ,
‘Wofuŋ e huriri qâreŋ‐ticne bataniŋkezac
eme bubiaŋ‐ŋeŋic honenʒapeŋ me.’
Iŋuc mueŋgopieŋzi qurutuanʒepieŋ.
 
“Haeonec ojowa â taha ufuŋkonec fânâŋ keci mananiŋ me!
I Wofuŋte marac fânâŋ i!
E râsifâc‐ticne okacne bazu‐jarekac.
 
“Ŋokac moc e gozi mi kiha kogoc rowec,
ʒâic mi manahuc biac motec rowec hâcne.
Mozi mâsi iŋucnere dâŋ moc manawec?
Me mozi mâsi iŋucne moc honewec?
Me mâreŋ moc irec ŋic ŋokac jaŋe ʒoaŋ mocjahao fuambiŋ?
Me ŋicguru weni jaŋe beraŋ jaha fua‐fârembiŋ?
Zioŋ eki ine gozi fuŋkerâ kiha
izia ŋokâfâc‐ticne rocjopawec.
No kogoc jaŋe neŋgoc bumaŋkonec fuaniŋte muekopaczi
wemocko aka hejarepemu?
No ɋie fufuare hata bâfuaekopaczi
hata i weniŋuc erâ hebâzickepemu?” Anutuzi iŋuc mukac.
 
10 “Ŋoŋe Jerusalem hae rune jaŋehec bubiaŋ mananiŋ,
â hae irec aŋac‐ŋopaekac ŋoŋe sasawa
ere erâ kiwac qawac eniŋ,
â ere erâ mu mamakuc embiŋ
ŋoŋe sasawa ehec ʒeri bari eniŋ.
11 Eme miriŋ‐ticnere moŋ gumec‐ŋopame nâ gapec enʒepieŋ;
erâ eri tatamac‐ticnere mâriri irec aŋac‐ŋopa‐jâmbâŋkezejec.”
 
12 Wofuŋzi ʒiŋuc mukac hâcne:
“Manakic, no mupe wamazi erao opâ sâko iŋucne qaratiezejec,
â ŋicne ŋicne jaŋeraonec mafa mâriri
i opâzi roma baekac irec sâc fua‐jarezejec;
naru motecfâc‐ticne gâjoŋ‐jeŋicko hâpoc‐jopaniŋmu
â qicjopahuc hâpo mumuduc ejareniŋmu.
13 Neŋgoc moczi kogoc‐ticne bâmiriŋkeekac
irec sâc noni bâmiriŋ‐ŋopapemu;
ŋoŋe Jerusalemko bâbâmiriŋ bâfuaniŋmu hâcne.
14 Eme ŋoŋe honerâ maŋŋeŋiczi ʒeri enʒepieŋ,
ehame mesahac‐ŋeŋiczi kecɋaŋ geune iŋucne
soka sanaŋ ezejec. Eme ʒiŋuc manazo:
Wofuŋ e kiŋaŋŋicfâcne jaŋe meticnezi dope hutuŋ ejareekac
â râsifâcne jaŋe ine kimbeŋ qajareekac.
 
15 “Manaŋgopieŋ, Wofuŋ e jahacne ʒoc iŋucne fisiocmu
â keretac‐ticne mâŋâŋ hâhâwicne iŋucne wareocmu;
eme okac babazu‐ticne i kimbeŋ aaric‐ticnehec fisiocmu
â hahanec dâŋticne i ʒocbâruŋ iŋucne fuaocmu.
16 Wofuŋ e mumutara gie bame ʒoczi mâreŋ ʒâseŋkeocmu
â ŋicne ŋicne jaŋere dâŋ mutarame ʒikare biŋe eniŋmu;
ehame Wofuŋte ʒikazi ŋic jopaocmu
jaŋere ʒare i fejâmbâŋkeocmu.
17 “Nemure jufu gieo raniŋte maŋsahac‐jeŋic bâtirihuc baɋaɋackeeŋgopieŋ â taha bapa moc ʒâʒâŋiŋko domaekac e bâjâpeeŋgopieŋ erâ bec â gisic me ʒuc wiac mamakâcne nâeŋgopieŋ jaŋe mâmâc jaha bâsirowec‐jopazo,” Wofuŋzi iŋuc mukac.
18 “No eebapa‐jeŋic â maŋ mamanasu‐jeŋic manakopac, erâ ŋicne ŋicne dâŋ marac fuŋne fuŋne mueŋgopieŋ jaŋe hetumaŋ‐jopapemurâ fisikopac, eme jaŋe fisirâ huriri qâreŋ‐nane honenʒepieŋ. 19 Eme no ŋondeŋ‐jeŋicko ma moc âkendâŋnepemu, ehuc jaŋeraonec ʒikare nâfocne gâcne sorec‐jopape jaŋe Tarasisi, Puti â Ludi tepeŋic erâ Tubali â Jawaŋ ŋicguru jaŋerao ranʒepieŋ, erâ ʒoricko nucne nucne biŋe‐nane mi manambiŋ â huriri qâreŋ‐nane mi honembiŋ jaŋerao mâmâc fisinʒepieŋ; ehuc ŋicne ŋicne huriri qâreŋ‐nanere dâŋ jazanʒepieŋ. 20 Erâ ŋicne ŋicne jaŋeraonec qomâfâc‐ŋeŋic sasawa Wofuŋte tahare biŋe râec‐jopaniŋte becâsic faio, keretac faio, reŋ faio, doŋgi faio â kamele faio Jerusalemko tiri tiki‐naneo amec‐jopa fisiniŋmu; i Israe ŋic jaŋe tahare wiac oto ɋaɋacnao Wofuŋ nore ufuŋko bafeeŋgopieŋ irec sâc. 21 Eme no ŋic i jaŋeraonec gâcne wâc mucjopape taha bapa ŋic â taha ufuŋte kiŋaŋ qaqa, Lewiŋic hâcne junʒepieŋ,” Wofuŋzi iŋuc mukac.
 
22 “Sambâŋ â mâreŋ ɋâricne bâfuac‐jofape
nore maio fosanaŋkenicmu irec sâc jaha
ɋâricfâc‐ŋeŋic jaŋe mi siroweniŋmu
â ʒâŋe biŋe‐ŋeŋic mi wahaocmu.
23 Mosa wahaekac sâc â sabata hombaŋ sâc
mâreŋŋic ʒeŋgoma jaŋe nore maio fodapeniŋte fisinʒepieŋ,”
Wofuŋzi iŋuc mukac.
 
24 “Ŋic sindaŋ ehuc bunaneo bambiŋ jaŋere qâŋɋâŋ rarâ honec‐jopanʒepieŋ; umbeŋ‐jeŋiczi mi hâmozejec â ʒoczi ʒacjopahuc mi hâpozejec, ehame mâreŋŋic sasawazi jaŋere manapie mamakâcne ezejec.”