1 Wofuŋte aŋelozi Giligali haeonec Bokim haeo ferâ kecʒiŋuc muwec: “No Aigita mâreŋkonec jowac‐ŋopa wefurâ mâreŋ ʒi, mimiŋnefac‐ŋeŋic jarepemurâ mupaŋkepo, ira râec‐ŋopapo. Ehuc mupo: ‘No ŋoŋehec ʒâʒâfic epo i moc mi hetâcne‐jâmbâŋkepemu. 2 Â ŋoŋe ine mâreŋ rune ʒi jaŋehec ʒâʒâfic moc mi enʒepieŋ, ehuc alata‐jeŋic hetâtienʒepieŋ.’ Ŋoŋe ine sâcmutâc‐nane mi reŋkembiŋ. I wemo mâsi embiŋ! 3 Irec miŋecgac ʒiŋuc ŋazakopac: No ŋoŋere erâ mi jâpec‐jopa‐jâmbâŋkepemu. Jaŋe juhuc râsi eŋarenʒepieŋ, â nemufâc‐jeŋic jaŋe ine wiwitic eŋarenʒepieŋ.” 4 Wofuŋte aŋelozi Israe ŋic sasawa dâŋ iŋuc jazame jaŋe uu qarâ kiombiŋ. 5 Eme jaŋe mâreŋ ŋondeŋ irec ʒâŋe Bokim* Nâŋâcne dâŋko: Kihae. mumbiŋ. Ehuc ira Wofuŋ taha bacnembiŋ.

6 Eme Josuazi ŋic ŋokac râec‐jopame Israe ŋic ŋokac jaŋe merâfâc mâreŋ‐jeŋic sâc rarâ raucke rambiŋ. 7 Eme Josua ere dameŋko jumbiŋ, erâ wâc soŋaŋ gâcne jaŋe juwicnao Wofuŋzi Israe kikefuŋ jaŋere erâ gie sâko bawec i honembiŋzi juhapie ŋic ŋokac jaŋe Wofuŋ kiŋaŋ qacnembiŋ. 8 Eme Josua, Nuŋte ŋokâ, Wofuŋte kiŋaŋŋic e jara 110 bazurâ hâmowec. 9 Hâmome merâfâc mâreŋ‐ticnao, Timinati‐Heresi haeo, Eferaim tiki mâreŋko, Gasi tiki faicnao ira duckembiŋ. 10 Duckerâ jufehuc Josua juha jumbiŋ jaŋe iŋuc jaha juju‐jeŋic tarame mimiŋnefâc‐jeŋic rambiŋko rafârembiŋ. Rafârepie râpefuŋ‐jeŋicko ŋic ʒaene moc fua sokac embiŋ jaŋe Wofuŋ jahacne erâ Israe kikefuŋ jaŋere erâ gie bawec i kâuc bambiŋ. 11 Eme Israe ŋic ŋokac jaŋe Wofuŋzi wiac maname sâqoreekac i embiŋ, ehuc Baali nemu kiŋaŋ qajarembiŋ. 12 Jaŋe Wofuŋ mimiŋnefâc‐jeŋic jaŋere Anutu, Aigita mâreŋkonec jowac‐jopawec, e râpeckembiŋ, ehuc nemu gâcne, qâpuc guru rârec rârec jumbiŋ jaŋeraonec, i hâcne bâjâpec‐jopahuc dape‐jarembiŋ. Iŋuc ehuc Wofuŋ maŋne bâiŋnembiŋ. 13 Jaŋe Wofuŋ râpeckerâ Baali â Asitaroto nemu guru kiŋaŋ qajarembiŋ. 14 Eme Wofuŋte kimbeŋzi ʒocbâruŋhec Israe ŋic jaŋerao faharewec. Eme fific guguriŋ ejare jumbieŋ jaŋerao râec‐jopame jaŋe ʒuhuckerâ fific guguriŋ ejarembiŋ. Erâ Wofuŋ e râsifâc‐jeŋic rârec‐jopahuc jumbiŋ jaŋere meo râec‐jopame moc mi sanaŋkembiŋ. 15 Ehuc dameŋ ira me ira rahapie Wofuŋzi bawahac‐jopawec. I e jahac uŋ jazahuc mupaŋke‐jarewec irec sâcko ejarewec. Eme jaŋe ʒâicmaŋko jumbiŋ hâcne.

16 Iŋuc jupie Wofuŋ e mumutara ŋic âkendâŋ‐jopame jaŋe fific guguriŋ ejarembiŋ jaŋeraonec batarac‐jopambiŋ. 17 Ehame jaŋe sifu mumutara ŋicfâc‐jeŋic jaŋere dâŋte hazec mi râembiŋ. Jaŋe sasec boe sau ŋic iŋucne ehuc nemu jaŋerao rarâ dape‐jarembiŋ. Ehuc mimiŋnefâc‐jeŋic jaŋe Wofuŋte sâcmutâc reŋkehuc hata âtembiŋ irec sâc mi âte rahuc âte sifuckembiŋ hâcne. 18 Wofuŋ e mumutara ŋic âkendâŋ‐jopawec sâc jaŋehec juwec. Ehuc mumutara ŋic jaŋere dameŋko râsifâc‐jeŋic jaŋere meonec batarac‐jopawec. Wofuŋ e Israe ŋic fific guguriŋ â imaŋ gomaŋ ejarepie mu wâwâsic‐jeŋic manahuc busâqoc mana‐jarewec. 19 Eme mumutara ŋic jaŋe hâmopie sâc ine jaŋe risiehuc apa ŋosafâc‐jeŋic siric‐joparâ sâqore‐jâmbâŋkerâ nemu jaŋerao rarâ kiŋaŋ qajarehuc dape‐jarembiŋ. Jaŋe mamanasu â eebapa‐jeŋic repicne i moc mi behembiŋ. 20 Irec Wofuŋ e kimbeŋ‐ticnere bâruŋzi Israe ŋic jaŋerao fahareme muwec: “Ŋic ʒi jaŋe ʒâʒâfic‐nane apa ŋosafâc‐jeŋic mutâcne‐jarepo i huckehuc micdâŋ‐nane mi reŋkembiŋ. 21 Irec no Josuazi hâmohuc ŋicguru behec‐jopawec i jopa jâpec mi ejarepemu. 22 Ehuc Israe ŋic jaŋe Wofuŋte hatao apa ŋosafâc‐jeŋic jumbiŋ irec sâcko aimuŋ jaha juniŋmu me mâcne i mâreŋ rune jaŋehec juhapie esâic‐jopapemu.” 23 Irec Wofuŋ e ŋicguru i jaŋe acmâc jaha jopa jâpec mi ejarehuc behec‐jopame jumbiŋ. Erâ Josuare meo wâc mi râec‐jopawec.