1 Israe ŋic gâcne Kanaaŋ mâreŋte erâ ʒika gie mi bambiŋ jaŋe Wofuŋzi esâic‐jopaocte ŋicguru gâcne mana‐jareme jumbiŋ. 2 I Israe ŋic jaŋeraonec gaŋne moc juwefumbiŋ jaŋe mârâc jaha ʒika qaqare fuŋne mi manambiŋte irec fuŋne jowatuocte ewec. 3 Ŋicguru ʒâŋe‐jeŋic ine ʒiŋuc: Filisa ŋicbomboŋ 5 erâ Kanaaŋ ŋic sasawa â Sidoŋŋic â Hiwiŋic Lebanoŋ tikio jurambiŋ jaŋe hâcne. Jaŋe Baali‐Herimoŋ tikionec raku Hamati haeo hata raʒikac mâreŋ ŋondeŋ ira jurambiŋ. 4 Jaŋe Israe ŋic jaŋere eesâic, Wofuŋzi apa ŋosafâc‐jeŋic jaŋere sâcmutâc Moserao râewec i reŋkeniŋmu me mâcne, irec fuŋne manaocte mana‐jareme jumbiŋ hâcne. 5 Irec Israe ŋic jaŋe Kanaaŋ ŋic, Hitiŋic, Amori ŋic, Periʒi ŋic, Hiwiŋic â Jebusi ŋic jaŋere ŋondeŋko jumbiŋ. 6 Ehuc qâpuc jaŋere otâfâc i jaŋacne ŋonâŋfâc eniŋte rocjopambiŋ. Â jaŋacne otâfâc ine jaŋere ŋokâfâc jarembiŋ. Iŋuc ehuc jaŋere nemufâc kiŋaŋ qajarembiŋ wâc.

7 Erâ Israe ŋic jaŋe Wofuŋ Anutu‐jeŋicte nikec‐jopame Baali â Aseroti kiŋaŋ qajarehuc Wofuŋzi maname sâqoreekac i embiŋ. 8 Irec Wofuŋte kimbeŋzi Israe ŋic jaŋerao ʒocbâruŋhec faharewec. Eha Mesopotamia ŋicwofuŋ Kusaŋ‐Risataim ere meo râec‐jopawec. Eme Israe ŋic jaŋe jara 8 Kusaŋ‐Risataim kiŋaŋ qacnembiŋ. 9 Eme Wofuŋ kio wâwâsic ecnepie batarac‐jopaocte ŋic moc âkendâŋne‐jarewec. Eme Kalebe ɋaticne Kenaʒire ŋokâ Otinie eki batarac‐jopawec. 10 Wofuŋte Mârozi neŋgoc ŋecneha Israe ŋic jaŋerao mumutara gie bawec. E ʒika qaocte rahame Wofuŋzi Mesopotamia ŋicwofuŋ Kusaŋ‐Risataim e meticnao râewec. Râeme tâpiri‐ticnezi Kusaŋ‐Risataim siricke‐fârewec. 11 Eme mâreŋ ira wama fuarâ foha jara 40 tarawec. Ehame Kenaʒi ŋokâ‐ticne Otinie hâmowec.

12 Eme Israe ŋic jaŋe Wofuŋte maio wiac hehesicne mocwâc embiŋ. Ehame Wofuŋzi Moabi ŋicwofuŋ Egeloŋ hâbi hecneme hume Israe ŋic jaŋe Wofuŋte maio wiac hehesicne embiŋte râsi fisi‐jarewec. 13 E Amoŋŋic â Amaleke ŋic rocjopame Israe ŋic râsi fisi‐jarerâ bawahac‐jopambiŋ. Ehuc hâmu gie hae i ro rauc embiŋ. 14 Eme Israe ŋic jaŋe jara 18 Moabi ŋicwofuŋ Egeloŋte kiŋaŋ qahuc jumbiŋ.

15 Eme Israe ŋic jaŋe Wofuŋ kio wâwâsic ecnepie ŋic moc ʒâŋene Ehudu, Gerare ŋokâ, Benjamiŋte ɋâric, meticne qaqana, eki batarac‐jopaocte âkendâŋne‐jarewec. Eme Israe ŋic jaŋe erao sahac taha wiac râepie rame Moabi ŋicwofuŋ Egeloŋtao barawec. 16 Â Ehudu e jahacne sâqe moc bawec, bune râpene mictara â ʒoricne‐ticnere sâc 18 inses. I hâcne fâre‐ticnere ŋaqimaŋko mariewec. 17 Erâ sahac taha i bararâ Moabi ŋicwofuŋ Egeloŋ râcnewec, Egeloŋ e ŋic biuc wokemaŋ sâkohec juwec. 18 Eme Ehudu e sahac taha i râcneme tarame ŋic taha reŋke rambiŋ jaŋe râec‐jopame risiembiŋ. 19 Ehame e jahacne ine Giligali heririŋ qânâ ɋâŋguru ira domarâ mocwâc risierâ muwec: “O ŋicwofuŋ, no biŋedâŋ soŋne moc bajukopac.” Iŋuc mume ŋicwofuŋ e dâŋfânâŋ nac baocte jazawec. Ehuc rereŋfâc‐ticne jaŋe sorec‐jopame fic râpenao hufârembiŋ. 20 Eme ŋicwofuŋ e bucticne sawa roro ficticnao ŋehame Ehuduzi maŋfuŋnao rawec. Erâ muwec: “No Anuturaonec dâŋ moc gore biŋe bajukopac.” Eme ŋicwofuŋ e ŋeŋe‐ticnaonec faharewec. 21 Ehame Ehudu e meqana‐ticnezi fâre‐ticnere gâjoŋkonec sâqe unuckerâ buticnao âeckewec. 22 Âeckeme sâqe tâpâcne mâmâc bumaŋnao raʒiwec. Eme mi unuckewecte wokemaŋzi bârârâŋneme bumaŋ‐ticnao fowec. Fohame hone wefuwec. 23 Eme Ehudu e ŋicwofuŋte ficmotâc basanaŋkerâ motâc pitickoa râpenao hurâ rawec.

24 Rame mi ʒoraha ŋicwofuŋte kiŋaŋŋicfâc jaŋe fisimbiŋ. Ehuc ficmaŋ‐ticnere motâc herâ basanaŋkekicne honerâ ʒiŋuc manasumbiŋ: “E ficpiticko raʒiocte motâc sanaŋne hejec.” 25 Eme woŋec juipierâ maŋjeŋic gâckewec. Eme ʒuhuckerâ motâc hehe jaha fome honerâ kimotec rorâ motâc batarambiŋ. Ehuc fekicne‐jeŋic e ɋâriŋko hâmocne foha honembiŋ.

26 Jaŋe woŋec juhapie jaha Ehudu e wiserâ qânâ ɋâŋguru ocniŋucnao Seira haeo rawec. 27 Ehuc Eferaimte tiki mâreŋko fisirâ qeŋ qawec. Erâ Israe ŋic micne bajareme tiki mâreŋkonec hurâ rambiŋ. 28 Rahuc Israe ŋic jazarâ muwec: “Ajoc, bâjâpecnuniŋ, Wofuŋ e râsifâc‐ŋeŋic Moabi ŋic hâcne ŋoŋere meo râec‐jopakac.” Iŋuc mume jaŋe bâjâpepie hurâ Jordaŋ opâ rendacnao Moabi ŋic jaŋe fotâcnenʒipiŋte sakare‐fârembiŋ. Ehuc ŋic moczi moc fotâcneocte mi mana‐jarembiŋ. 29 Eme Israe ŋic jaŋe Moabi ŋic sahac ɋiɋic â sanaŋne 10 tauseŋ qâririŋ hâmocne jopambiŋ. Ŋic moczi moc mi wise‐jâmbâŋkewec. 30 Eme dameŋ ira Israe ŋic jaŋe Moabi ŋic bawahac‐jopapie jaŋere mic sâcko jumbiŋ. Ehame mâreŋ ira wama fuarâ foha jara 80 tarawec.

31 Irec faicnao Anatare ŋokâ Samegari eki juwec. E Filisa ŋic 600 ɋaru‐ticnezi qâhâmoc‐jopawec. Erâ eki iŋuc jaha Israe ŋic batarac‐jopawec.