1 Ehudu hâmome Israe ŋic jaŋe Wofuŋte maio wiac mamakâcne mocwâc heɋârembiŋ. 2 Ehame Wofuŋzi Kanaaŋ ŋicwofuŋ Jabiŋ Hazoro haeo juwec ere meo râec‐jopawec. Â momorifâc‐ticne jaŋere micne Sisera e ine Harose‐Goim haeo juwec. 3 E ʒikare keretac 900 aeŋzi bakicne focneha jara 20 Israe guru bâʒâic‐jopahuc ro waha âte ejarewecte Israe ŋic jaŋe Wofuŋzi bafic‐jopaocte kio wâwâsic ecnembiŋ.

4 Ehame dameŋ ira Lapidoti ŋonâŋ‐ticne Debora e porofete ŋokac juhuc Israe ŋic jaŋerao mumutara gie bawec. 5 E Eferaim tiki mâreŋko Rama â Bete hae ŋondeŋ‐jekicko hâmu moc e jahacne wase bakicne irec fuŋnao ŋejujec. Eme Israe ŋic jaŋe mumutara gie baocte ira fisihuc jumbiŋ. 6 Eme e Abinoam ŋokâ‐ticne Baraki Naftali mâreŋko Kedesi haeo juwec e dâŋ râecnehuc hefârewec. Eme fisime âzâcnerâ muwec: “Israere Wofuŋ Anutu e ʒiŋuc mukac: ‘Go rarâ Naftali guruonec â Sebuloŋ guruonec ŋicfâcge 10 tauseŋ Taboro tikio hetumaŋ‐jopac. 7 Eme no Jabiŋte momori guru micne‐jeŋic Sisera e momorifâc‐ticne â ʒikare keretac‐ticnehec fârepe fisiha Kisoŋ opâo bâfuacmu. E noni gore meo râepemu.’ ” 8 Mume Barakizi Debora âzâcnerâ muwec: “Goki nohec razo mutec rapemu. Â goki nohec mi racmuo ine no wâc mi rapemu.” 9 Eme ŋokaczi muwec: “No gohec rajâmbâŋkepemu. Mâc go hata rakomec i go gahacne mumuteŋ fuaocte mi rakomec. Wofuŋ e Sisera ŋokac mocte meo râeocmu.” Iŋuc murâ Debora e faharerâ Barakihec Kedesi haeo rapic. 10 Eme Barakizi Sebuloŋ â Naftali guru Kedesi haeo raniŋte hefârec‐jopawec. Eme ŋic 10 tauseŋ jaŋe bâjâperâ fembiŋ. Â Debora e wâc ehec mâmâc rafewec.

11 Eme Keniŋic Hebere e Keniŋic guru gâcne Mose kimo‐ticne Hobabi ere ɋâricfâc behec‐joparâ rawec. Raku Kedesi hae heririŋ Za‐Ananim haeo boriŋfuŋko boze‐ticne bawec.

12 Eme Abinoam ŋokâ‐ticne Baraki e biac Taboro tikio fejec, Sisera iŋuc âzâcnepie 13 manarâ ʒikare keretac aeŋzi bakicne 900 erâ ŋicfâc‐ticne jumbiŋ i rocjopame Harose‐Goim haeonec Kisoŋ opâo rambiŋ. 14 Eme Deborazi Baraki âzâcnerâ muwec: “Ajoc faharec, dameŋ ʒi hâcne Wofuŋzi Sisera megao râekac. Wofuŋ e bânie‐garekac hâcne.” Irec Baraki e Taboro tikionec ŋicfâc‐ticne 10 tauseŋ jaŋe bâjâpepie hurâ rambiŋ. 15 Ehame Wofuŋzi Sisera â ʒikare keretac â momorifâc‐ticne Barakire meo râec‐jopame ʒikazi jopawec. Eme Sisera e ʒikare keretac‐ticnaonec wiserâ waha kikezi rawec. 16 Barakizi ʒikare keretâc â Sisera momorifâcne jâpec‐joparâ raku Harose‐Goim haeo fisirâ ʒikazi jopa‐fârewec. Ŋic moc mi akic‐jopambiŋ.

17 Ehame Sisera e wiserâ raku Keniŋic Hebere ŋonâŋ‐ticne Jaele ere bozeo fisiwec. I ʒiŋucte: Hazoro ŋicwofuŋ Jabiŋ â Keniŋic Hebere gurufâcne ŋondeŋ‐jeŋicko wama fowec. 18 Irec Jaelezi waha rarâ Sisera bâfuahuc âzâcnerâ muwec: “Bomboŋ‐nane, ʒira norao warec, mi hâwicguoc.” Eme Sisera e manarâ ere bozeo raʒiwec. Ehame ŋokac e qoruc ɋâfoŋnezi rufacnewec. 19 Eme Siserazi ŋokac ʒiŋuc âzâcnewec: “Opâre hâmokopacte piticne mac moc naretec nazapo.” Eme ŋokac e susu ʒopo moc tapane rorâ râcneme nâme mocwâc rufacnewec. 20 Iŋuc eme ŋic e ŋokac âzâcnerâ muwec: “Motâcko domazemec. Eme ŋic i me i moczi fisirâ wio‐gareocmu: ‘Ʒira ŋic moc juŋgopieŋ me?’ Eme muzemec, aricne.” 21 Iŋuc âzâcneme Hebere ŋonâŋ‐ticne Jaele e bozere fâzâ moc â hama rorâ kamic kamic jaha rarâ fâzâ i nakinao heme fotâcnerâ ŋifec mâreŋko kiwec. Ŋic e betaŋkerâ guŋ qâŋɋâŋne fowecte iŋuc ecneme hâmowec hâcne. 22 Ehame Baraki e Sisera jâperâ raku fisime Jaelezi waha ra bâfuarâ ʒiŋuc âzâcnewec: “Waretec noni ŋic basakic e gowatupe.” Eme e ŋokacte bozemaŋko raʒiwec. Raʒirâ Sisera e hâmocnezi nakinao bozere fâzâ kisoŋhec fome honewec.

23 Eme ʒoaŋ ira hâcne Anutuzi Kanaaŋ ŋicwofuŋ Jabiŋ bawahahuc Israe ŋic jaŋere meo râewec. 24 Eme Israe ŋic jaŋere tâpirizi Kanaaŋ ŋicwofuŋ Jabiŋtao boc faharerâ fahare ekume ŋicwofuŋ e bâsirowembiŋ.