5
Debora â Baraki jahere gae
1 Debora â Abinoamte ŋokâ Baraki jahe dameŋ ira gae ʒiŋuc hepic:
2 “Ŋic jaŋe buafec jaha fuapie
Israe soŋaŋ jaŋe micne bajarembiŋ,
irec Wofuŋ mumbiaŋkeniŋ!
3 “O ŋicwofuŋ â fekicne, ŋoŋe hazec râerâ manahapie
woŋgâŋ qahuc Wofuŋ Israere Anutu ʒeri gae hecnepemu.
4 Wofuŋ, go Seiri â Edom tiki mâreŋkonec warehuc
asasai âtehaŋtec mâreŋ ɋiɋiteckeme
sambâŋ ropieha karorac jaŋe opâ hoŋkembiŋ.
5 Eme Sinai ocniŋucnao tiki jaŋe
Israere Wofuŋ Anutu ere maio qiriŋ qambiŋ.
6 “Anata ŋokâ‐ticne Samegari â Jaele jahere dameŋko
guruhec rac warec ee i tarame hatapecne ŋic jaŋe
hata piticnao sawa rac warec embiŋ.
7 Israe guruo qâzuckerâ juju i omaehame
Debora go Israe guruo neŋgoc tinac fua taniŋkemeŋ.
8 Jaŋe nemu furune hone wosâc ejarembiŋko
ʒikazi haere motâcko fisiwec.
Dameŋ ira maro me sându wiac
Israe guruo moc honekicne me?
9 Israe guruonec mumutâc ŋic buafec jaha fuambiŋ
jaŋerao maŋnane kâcɋene fokac.
Wofuŋ mumbiaŋkezo.
10 “Becâsic qaŋqaŋko rac warec eeŋgopieŋ
â fofo qoruc furi sâkoo ŋeeŋgopieŋ
â hatao kikezi jueŋgopieŋ
ŋoŋe irec biŋe musaweniŋ.
11 Opâ fifia tomao gae woŋgâŋ ehuc
Wofuŋzi eebapa biaŋ Israe hae sâc bâfuakac
irec biŋe murâ mu enʒepieŋ.
Eme Wofuŋte ŋicfâc jaŋe haesac motâcko humbiŋ.
12 “Ajoc, Debora, go faharec!
Faharerâ gae moc hec!
O Abinoamte ŋokâ Baraki,
go faharerâ râsifâcge ʒikao rocjopakicne
jaŋe kâpâcwâruo bacjopa rac.
13 Iŋuc fuame Wofuŋte ŋicfâc fekicne uuc ʒanʒaŋne
jaŋe tâpirihec râsi fisi‐jarembiŋ.
14 Benjamiŋ ŋicfâc ŋoŋere râpeo
Eferaim mâreŋkoneczi wahambiŋ.
Jaŋe gâtâ‐jeŋic i Amaleke mâreŋko fokac.
Makiri guruonec ine mumutâc ŋic jaŋe wahambiŋ.
Ehame Sebuloŋ guruonec momori micne jaŋe wahambiŋ.
15 Isasa guruonec fekicne jaŋe ine Deborahec fisimbiŋ.
Eme Isasazi Baraki micne reŋkewec.
Ehuc wâneŋko jume ju boc embiŋ.
Ehame ŋifec Rubeŋte guruo ine maŋ ŋeŋemâc fuawec.
16 Go wemocte lama sapa ŋondeŋko dameŋ ʒora
lama guru jaŋere qeŋ qapie manacmurâ woŋec jumeŋ?
Rubeŋ guru jaŋerao maŋ mâmâcne fuawec.
17 Gileade e Jordaŋ ŋifecnao jusanaŋkewec.
 Daŋ guru jaŋe wemocte wokeo kiŋaŋ gie bambiŋ?
Ase guru jaŋe hâwecmecko juhuc
hâwec raʒikicnao ŋesanaŋkembiŋ.
18 Sebuloŋ guru jaŋe ine juju‐jeŋicte manabâc mi embiŋ
â Naftali jaŋe wâc tiki hae mâreŋ‐jeŋicko iŋuc jaha embiŋ.
19 “Ŋicwofuŋ jaŋe fisirâ ʒika qambiŋ.
Wahapie Kanaaŋ ŋicwofuŋ jaŋe wâc
Tanaki haeo Megido opâ heririŋko ʒika qambiŋ.
Erâ sifu râsifâc‐jeŋic jaŋere mateŋ moc mi rombiŋ.
20 Sambâŋkonec bâpiŋ jaŋe
hata‐jeŋic sâc juhuc Siserahec qaqac embiŋ.
21 Kisoŋ opâ ɋiɋicnea gasackehuc foekac
izi râsi amec‐jopa rawec.
O maŋnane, go tâpirihec erâ âtec‐jopac!
22 “Eme becâsic kike fânâŋ sâko fuakac,
becâsic jaŋe wisehuc gasacke sâqoreŋgopieŋ.
23 “Wofuŋte aŋelo e ʒiŋuc mukac:
‘Meroʒi hae rune jaŋe
Wofuŋzi Israe momorifâc‐jeŋic bafic‐jopahame
mi fisimbiŋte, hae‐jeŋic i sâweckezo.’
24 “Keniŋic Hebere ere ŋonâŋ Jaele e
ŋokac sasawa jaŋere femicne,
ŋokac bozeo ŋec juc eeŋgopieŋ
jaŋere ŋondeŋko e hâcne mumbiaŋkezo.
25 E Siserazi opâre numucneme susu râcnewec.
Susu râqârekicne i ŋicbomboŋ râqâcko bafisicnewec.
26 Erâ meticnezi fâzâ rowec.
Ehuc fâre‐ticnezi gieŋic jaŋere hama rorâ
Sisera qanʒaŋnewec.
E qizec‐ticne qanʒaŋnehuc
naki‐ticne âke mârâŋkewec.
27 Eme kike fuŋnao waha qarâ hâmocne fowec.
28 “Eme Sisera neŋgoc‐ticne e qâqâtâc kataŋ aaŋ bakicne
ira firâ râqârewec. Ehuc muwec:
‘Wemocte ʒika keretac‐ticnezi biac mi warekac?
 wemocte keretac fâfâre becâsic
jaŋere kike fânâŋ dameŋ ʒoranehec ekac?’
29 Eme ŋokac maŋɋârâŋhec
jaŋe irec fârine âzâcnembiŋ.
Ehame e sifu dâŋticne i hâsi fâri jaha muhuc domawec.
30 ‘Jaŋe ʒikare mateŋ i bâfuarâ rohuc
bâtâc mi baŋgopieŋ me?
Ŋic sâc ŋokac naru mocjaha me jajahec mecne?
Siserare ŋaqi jâweczi rikekicne
â mateŋ gâcne hawari biaŋ
erâ upe‐nanere eri qoqonaŋ jajahec bafisi‐nareocmu mecne.’
31 “O Wofuŋ, râsifâcge jaŋe iŋuc hâcne sipirickembiŋ.
 âgofâcge jaŋe ine ʒoaŋ tâpirihec wefuekac iŋucne.”
Eme mâreŋ ira jara 40 wama fuarâ fowec.