1 Eferaim ŋic jaŋe tumaŋne‐fârerâ Zafoŋ mâreŋko rarâ Jefita ʒiŋuc muhuc âzâcnembiŋ: “Go wemocte mi hefârec‐nâpohuc Amoŋŋic jopazore bucge rameŋ? Irec nâŋe ficgehec mâmâc ʒoczi rikecgunaŋmu.” 2 Eme Jefitazi jazarâ muwec: “No â ŋicfâc‐nane nâŋe Amoŋŋic jaŋehec juju gie sâko bahuc hefârec‐nopapene ŋoŋe jaŋere meonec mi batarac‐nâpombiŋ. 3 Irec sâcne mi bafic‐nâponiŋmu, iŋuc manarâ juju‐nane qaisockehuc Amoŋŋic jaŋehec qaqac enaŋte rambeŋ. Ehame Wofuŋzi menaneo râec‐jopawec. Eme ŋoŋe wemocte râsi fisi‐nareŋgopieŋ?” 4 Jefita e iŋuc murâ Gileade ŋicfâc‐ticne rocjopa‐fâreme Eferaim jaŋehec qaqac embiŋ. Eme Gileade ŋic jaŋe Eferaim jopambiŋ. Jaŋe ʒiŋuc mumbiŋte: “Gileade ŋic ŋoŋe Eferaim â Manase ŋondeŋ‐nâŋeckonec wisembiŋ.” Gileade hae i Eferaim â Manase jaŋere mâreŋko ŋewecte iŋuc mumbiŋ. 5 Eme Gileade ŋic jaŋe Eferaim ŋic jopaniŋte Jordaŋ opâ rendacne sasawa i somâcke‐fârembiŋ. Ehame Eferaim ŋic wisembiŋ jaŋeraonec moczi fisirâ opâ fotâcneocte mume Gileade ŋic jaŋe ʒiŋuc wiocnembiŋ: “Go Eferaim ŋic moc me?” Wiocnepie “Aricne” muwecko ine 6 jaŋe âzâcnerâ mumbiŋ: “Eme go ‘Shiboleti’ muc.” Iŋuc mupie “Siboleti” mume jaŋe manapie fâretiŋ jaha mi ewecte ine Jordaŋ opâ rendacnaoa basanaŋkerâ qâhâmombiŋ. Iŋuc ekupie Eferaim ŋic 42 tauseŋ hâmombiŋ.

7 Eme Jefita e Israe ŋic jaŋere mumutara ŋic jara 6 juwec. Eme Gileade ŋic Jefita e hâmome Gileade mâreŋko hae‐ticnao duckembiŋ.

8 Eme Jefitare faicnao Betelehem haeonec Ibezaŋzi Israe ŋic jaŋerao mumutara gie bahuc juwec. 9 E ŋokâfâc‐ticne 30 jumbiŋ. Â otâfâcne 30 jaha jumbiŋ, jaŋe ŋicko râec‐jopaocte ŋicguru gâcne jaŋerao râec‐jopame rambiŋ. Ehuc joŋaofâc‐ticne 30 jaha guru gâcne jaŋeraonec ŋokâfâcne jaŋere ŋonâŋ rocjopawec. Eme Ibezaŋ e jara 7 Israe ŋic jaŋerao mumutara gie bahuc juwec. 10 Juku hâmome Betelehem haeo duckembiŋ.

11 Eme Ibezaŋte faicnao Sebuloŋ ŋic Eloŋ eki Israe ŋic jaŋerao mumutara gie bahuc juha jara 10 tarawec. 12 Eme jufeku Sebuloŋ ŋic Eloŋ e hâmome Sebuloŋ mâreŋ‐ticnao Ajaloŋ haeo duckembiŋ.

13 Ere faicnao Piratoŋ ŋic Hileliere ŋokâ Abadoŋzi Israe ŋic jaŋerao mumutara gie bahuc juwec. 14 Ere ŋokâfâc 40 â ŋosafâc‐ticne ine 30 jumbiŋ. Jaŋe doŋgi motecne 70 jaŋere faio rac warec ehuc jumbiŋ. Eme Abadoŋ e jara 8 Israe ŋic jaŋerao mumutara gie bahuc juwec. 15 Jufeku Piratoŋ ŋic Hileli ŋokâ‐ticne Abadoŋ e hâmome Amaleke ŋic jaŋere tiki mâreŋ Eferaim ira hâcne Piratoŋ haeo duckembiŋ.