1 Eme Israe ŋic jaŋe Wofuŋte maio wiac mamakâcne mocwâc embiŋ. Iŋuc epie Wofuŋzi Filisa ŋic jaŋere meo râec‐jopame jara 40 jumbiŋ.

2 Ehame Daŋŋic jaŋere guruonec Zora haeo ŋic moc juwec ʒâŋene Manoa. Eme Manoa ŋonâŋ‐ticne e hufiŋne juwec. 3 Ehame Wofuŋte aŋelozi ŋokac e fuacnerâ âzâcne muwec: “Manakic, go hufiŋne juhuc naru motec moc mi rocjopaekomec. Ʒi ine kiwechec erâ motec moc rocmu. 4 Irec go rucgereŋge bahuc waiŋ me opâ sanaŋne gâcne moc mi mac nâzemec. Erâ wâcwiac muac‐ŋopakicne i nâ bâuac mi ezemec. 5 Manakic, go motec moc kiweckerâ rocmu. Rorâ qizec susuc‐ticne moc mi bâtâcnezemec. Motec e fua fuahuc izia sowa bâtâcko juhuc Anuture biŋe juocmu hâcne. Eme eki hâcne fuŋkerâ Israe ŋic Filisa ŋic jaŋere meonec batarac‐jopaocte gie baocmu.” 6 Iŋuc mume ŋokac e rarâ ŋowe‐ticne ʒiŋuc âzâcnewec: “Anuture ŋic moczi norao ware fisijec. Ʒâŋe mai‐ticne i Anuture aŋelo ʒâŋe mai tinac, qeŋ bipinehec. No e wenirec warejec i mi wiocnepac. Erâ wâc e ʒâŋe‐ticne moc mi nazajec. 7 Mâc kecʒiŋuc ine nazajec: ‘Manakic, go motec moc kiweckerâ rocmu. Irec go waiŋ me opâ sanaŋ gâcne moc mi nâzemec. Erâ wâcwiac muac‐ŋopakicne i nâ bâuac mi ezemec. Motec e fuahuc izia sowa bâtâcko Anuture biŋe juha hâmoc dameŋ‐ticne maickeocmu.’ ”

8 Eme Manoazi Wofuŋ wâsickehuc muwec: “O Wofuŋ Anutu, go kiŋaŋŋicge soremeŋ e nâherao mocwâc wareocte numu‐garekopac. Warerâ motec fuame weniŋuc ecnenacmu i mu qazuc enâctezejec.”

9 Eme Anutuzi Manoare dâŋ manarâ aŋelo‐ticne mocwâc soreme ŋokac e gieo ŋehuc juhame fisiwec. Dameŋ ira ine ŋowe‐ticne Manoa e ŋonâŋ‐ticnehec mâmâc mi jupic. 10 Irec ŋokaczi ʒocnehec gasackerâ ra ŋowe‐ticne ʒiŋuc âzâcnewec: “Manakic, ŋic jucne fisiwec e ʒi mocwâc ware fua‐narekac.” 11 Iŋuc mume Manoa e faharerâ ŋonâŋ‐ticne bâjâperâ ra ŋic wiocnerâ muwec: “Ŋic goki hâcne ŋokac ʒi dâŋ âzâcnemeŋ me?” Mume ŋiczi muwec: “No hâcne.” 12 Eme Manoazi muwec: “Dâŋgezi sanaŋkeocmuo ine motec sâcmutâc weniŋuc ecnehuc giene bacnezo?” 13 Iŋuc mume Wofuŋte aŋelozi Manoa âzâcne muwec: “Ŋokac ʒi dâŋ sasawa âzâcnepo irec sâcko rucgereŋ‐ticne bahuc juzejec. 14 E muckonec wiac sasawa fuaekac, waiŋ mecne, erâ opâ sanaŋ gâcne mecne â wiac muac‐ŋopakicne i nâ bâuac moc mi ezejec. Wiac sasawa mutâcnecnepo i aimuŋ jaha soŋaŋkezejec.”

15 Mume Manoazi Wofuŋte aŋelo âzâcnerâ muwec: “Nâhehec ŋehaŋtec noniŋ motecne moc hezurâ rike bâmoc egarenac.” 16 Iŋuc mume Wofuŋte aŋelozi Manoa âzâcnerâ muwec: “Ʒira ŋepemurâ mukomec, erâ sifu nânâ qowige mi nâpemu. Go bâzi moc rikezo mukicko ine Wofuŋ taha bacnezemec.” E Wofuŋte aŋelo i Manoazi mi mana tarawec. 17 Irec wiocnerâ muwec: “Go ʒâŋege mo? Juku dâŋgere fârine fuame bubiaŋ manahuc mu ʒeri egarenacmu.” 18 Iŋuc mume Wofuŋte aŋelozi âzâcne muwec: “Ʒâŋe‐nane i furu, irec wemocte wio‐narekomec?” 19 Iŋuc âzâcneme Manoa e noniŋ motecne erâ nânâ wiac i rorâ qânâ faio Wofuŋte biŋe râewec. Ehame jahere ʒâŋe faio Wofuŋte mâsi moc fuawec. 20 Eme alataonec ʒocbâruŋzi sawao feme Manoa â ŋonâŋ‐ticne jahe fi rârâqârehuc domahapire Wofuŋte aŋelozi alatare ʒocbâruŋ maŋko fewec. Feme jahe ʒâhe ʒâŋe mai‐jekic mâreŋko hetutuckerâ fopic.

21 Eme Wofuŋte aŋelozi Manoa â ŋonâŋ‐ticne mocwâc mi fua‐jactewec. Eme Manoazi ʒiŋuc manawec: I Wofuŋte aŋelo. 22 Ehuc ŋonâŋ‐ticne âzâcnerâ muwec: “Ʒi Anutu honeperecte hâmo‐jâmbâŋkenacmu i.” 23 E iŋuc mume ŋonâŋ‐ticnezi muwec: “Wofuŋ e nâfozo murâ wemocko taha bâzi â qowi bâzi menâheckonec rozac. Erâ wiac sasawa nâfotujec â biŋedâŋ mufua‐nâctejec i wemocko wâc nâsâzâc.” 24 Eme ŋokac e motec moc rowec. Rorâ ʒâŋe‐ticne Simsoŋ muwec. Eme Wofuŋzi motec e jambuŋkeha soka sanaŋ ewec. 25 Eme Zora â Esitaoli hae ŋondeŋ‐jekicko Mahanedaŋ hae ŋewec ira juhame fuŋkerâ Wofuŋte Mârozi esoc qafeŋ ecnehuc juwec.