1 Dameŋ ira Israe ŋic jaŋerao ŋicwofuŋ moc mi juwec. 2 Ehame Daŋte ɋâricfâc jaŋe mâreŋ moc rauckerâ juniŋte basambiŋ. Jaŋe Israe guruo mâc juwefumbiŋ hâcne. Irec Daŋte ɋâricfâc jaŋe guru‐jeŋic sâc irecnec ŋic tâpirihec râec‐jopapie 5 eme mâreŋ hone tâcne‐fâreniŋte Zora â Esitaoli haeonec sorec‐jopahuc ʒiŋuc jazambiŋ: “Ŋoŋe rarâ mâreŋ hone tâcneniŋ.” Iŋuc jazapie raku Eferaim tiki mâreŋko fisirâ Mikare haeo fombiŋ. 3 Fisimbiŋ ʒoaŋ ira Mikare fic bâqiŋkehuc Lewire guruonec ŋic ere dâŋmarac manambiŋ. Ehuc bâŋorierâ ŋic e ʒiŋuc muhuc wiocnembiŋ: “Mozi egareme waremeŋ? Hae ʒira wemo gie bahuc juekic?” 4 Iŋuc wiocnepie Mikazi weniŋuc ehuc rome taha bapa‐ticne erâ juwec irec binaŋ bajarewec. 5 Eme jaŋe ʒiŋuc âzâcnembiŋ: “Nâŋe hata juŋgopeneŋ ʒizi fârinehec eocmu me mâcne i manazo enârekacte Wofuŋ mu wioc ecnec.” 6 Iŋuc âzâcnepie taha bapazi ʒiŋuc jazawec: “Sâcne raniŋ! Hata raŋgopieŋ i Wofuŋzi hone manac efârekac.”

7 Eme ŋic 5 jaŋe fahare raku Laisi haeo fisimbiŋ. Fisirâ ʒiŋuc honembiŋ: Jaŋe Sidoŋŋic jumbiŋ irec sâc juhâc qâhâmombiŋ: Erâ ojowa â manabâc tâmiric juhuc mâreŋko wiac forakac i moc mi basambiŋ. Erâ moneŋ mafa sâkohec juhuc Sidoŋŋic mecne, erâ wâc ŋic gâcne jaŋehec ʒuʒuhuc â nâ nareŋ gareŋ moc mi embiŋ. 8 Eme ŋic 5 jaŋe Zora â Esitaoli haeo risiepie qomâfâc‐jeŋic jaŋe wio‐jarerâ mumbiŋ: “Dâŋ binaŋ enârepie mananaŋ.” 9 Iŋuc jazapie jaŋe mumbiŋ: “Ajoc, ŋoŋe faharepie jopazo ranaŋ; mâreŋ i guec sâkonehec honembeneŋ. Irec nâŋâc ŋepe fope tâmiric onʒoŋ jaha rarâ mâreŋ i ro rauc enaŋ. 10 Nâŋâc rarâ izia ŋicguru qac qâoma juŋgopieŋ jaŋerao fisinaŋmu. Mâreŋ i roma roma bakicne fokac; Anutuzi menâŋecko râewec hâcne. Mâreŋ ira wiac moc mi basazo.”

11 Iŋuc mupie Daŋte mâreŋko Zora â Esitaoli hae ŋepic irecnec ŋic 600 ʒika qaniŋte ʒawierâ fahare rambiŋ. 12 Raku Juda mâreŋko Kiriati‐Jearim haeo teuŋ âterâ fombiŋ. Iŋuc embiŋte Kiriati‐Jearim hae heririŋ ʒoaŋ huhunaopec mâreŋ ŋondeŋ fokac irec ʒâŋe i Daŋte teuŋ iŋuc mumbiŋ, erâ wâc ʒiŋuczia muhuc juŋgopieŋ jaha. 13 Eme irecnec raku Eferaim tiki mâreŋko Mikare haeo fisimbiŋ.

14 Ehuc ŋic 5 Laisi mâreŋ hone tâcneniŋte rambiŋ jaŋe âgofâc‐jeŋic ʒiŋuc jazambiŋ: “Fic ʒi ŋeraŋgopieŋ jaŋere ŋondeŋko fic mocte maŋnao qoqonaŋ ŋaqi erâ jâc â siliwazi ɋâŋ hekicne ŋekac i moc manaŋgopieŋ me? I weniŋuc enaŋmu irec moc mana wosâc eniŋ.” 15 Eme jaŋe bâŋorierâ Mikare haeo raʒirâ Lewire guruonec ŋic ere ficko fisirâ ʒoaŋ biaŋ mucnembiŋ. 16 Eme Daŋte ɋâricfâc ŋic 600 jaŋe ʒikare wiac‐jeŋichec ficmotâckopec hae ʒoŋao domambiŋ. 17 Taha bapa e ficmotâcko momori ŋic 600 jaŋehec domaha ŋic 5 mâreŋ hone tâcneniŋte rambiŋ jaŋe ficmaŋko raʒirâ jâczi ɋâŋ hekicne â qoqonaŋ ŋaqi, erâ metâ wiac â siliwazi ɋâŋ bakicne i rombiŋ. 18 Ŋic i jaŋe Mikare ficko raʒirâ jâczi ɋâŋ hekicne qoqonaŋ ŋaqi â metâ wiac â siliwazi ɋâŋ bakicne i ropie taha bapazi wio‐jarerâ muwec: “Ŋoŋe wemo eŋgopieŋ?” 19 Eme jaŋe âzâcnerâ mumbiŋ: “Go dâŋ beherâ ware bâjâpec‐nâpoc, ehuc mamac enârerâ taha bapa‐nâŋec juzemec. Go ŋic mocjahare ficko taha bapa jucmu izi sâckeocmu, me Israe guruo garikiŋ moc jaŋerao jutec sâckeocmu me?” 20 Iŋuc mupie taha bapa e bune biaŋkewec. Bune biaŋkeme qoqonaŋ ŋaqi â metâ wiac erâ jâczi ɋâŋ hekicne i rorâ ŋondeŋ‐jeŋicko hume rambiŋ.

21 Eme jaŋe faharehuc ŋokac naru motec â bulimakao erâ mafa wiac‐jeŋichec ejarepie bâniembiŋ. 22 Eme jaŋe Mikare haeonec rapie mi ʒoraha Mika e ŋicfâc‐ticne hetumaŋ‐jopame Daŋte ɋâricfâc jâpec‐joparâ rambiŋ. 23 Raku bâfuac‐joparâ owacke‐jarepie jaŋe forisierâ Mika ʒiŋuc muhuc wiocnembiŋ: “Go fuŋne wemocte ŋic guru sâko keci rocjopatec wareŋgopieŋ?” 24 Eme Mikazi ʒiŋuc bâtikie‐jarewec. “Ŋoŋe ɋâŋnane rohuc taha bapa‐nane mâmâc jowa wisepie hapetac ekopac hâcne. Ehuc wemocte ʒiŋuc wio‐nareŋgopieŋ: ‘Go wemocte warekomec?’ ” 25 Iŋuc mume Daŋte ɋâricfâc jaŋe ʒiŋuc âzâcnembiŋ: “Go hahaŋne bahuc dâŋ boc mi mutec mananʒepeneŋ. Nâŋere ŋondeŋko ŋic gâcne ʒâʒâicne juŋgopieŋ jaŋe go gahacne â wiacfâcge mâmâc ŋopanʒipiŋte.” 26 Daŋte ɋâricfâc jaŋe iŋuc âzâcnehuc ʒuhuckerâ rambiŋ. Rapie Mika e, jaŋe ŋic tâpiri sâkohec, iŋuc honec‐joparâ hae‐ticnao risiewec.

27 Daŋte ɋâricfâc jaŋe Mikazi wiac bawec i ameckehuc taha bapa‐ticne mâmâc jowa raku ŋic guru Laisi haeo manabâc tâmiric jumbiŋ jaŋerao fisirâ ʒikazi jopahuc hae i ʒoczi turuŋkepie ʒawec. 28 Hae i Sidoŋ hae heririŋ mi ŋewec, â hae irec rune jaŋe ŋicguru gâcne jaŋehec nâ nareŋ gareŋ‐jeŋic mi fowec irec moczi moc mi ŋezickembiŋ. Hae i Bete‐Rehobo wâneŋko ŋewec. Eme Daŋte ɋâricfâc jaŋe hae i mocwâc heɋârerâ bahuc ira ŋec juc embiŋ. 29 Ehuc irec ʒâŋe apa‐jeŋic Daŋ ere wase bambiŋ. Daŋ e Jakobore bifuŋko fuawec. Â hae irec ʒâŋe ine mârâc jaha Laisi mujumbieŋ. 30 Eme Daŋte ɋâricfâc jaŋe jâczi ɋâŋ hekicne i hâcne âkendâŋnepie domawec. Ehame Geresomte ŋokâ Jonataŋ, Mosere ŋosa hâcne, e â ŋokâfâc‐ticne jaŋe Daŋte guru jaŋere taha bapa erâ juhapie Asiria ŋic jaŋe Israe ŋic kâpâcwâruo bacjopa rambiŋ. 31 Erâ Daŋte guru jaŋe Mikazi ɋâŋ hewec i âkendâŋnepie domawec. Ine Anuture ufuŋzi Silo haeo dameŋ ʒora ŋewec irec sâc doma‐jarewec hâcne.