1 Israe ŋic jaŋerao ŋicwofuŋ moc mi juwec dameŋ ira Lewire guruonec ŋic moczi Eferaim tiki mâreŋ râpenao jaba juhuc Juda mâreŋko Betelehem haeonec ŋokac moc ʒuhuckerâ rome mamare ewec. 2 Eme ŋokac eki hâcne aaric manacnehuc wiserâ Juda mâreŋko Betelehem haeo rarâ mamac‐ticnere ficko mosa 4 juwec. 3 Ira juhame ŋowe‐ticnezi mu bâmiriŋ ecnehuc jowame risienicte rawec. Ehuc kiŋaŋŋic‐ticne â doŋgi jajahec rocjoparâ rawec. Ra fisime ŋokaczi mamac‐ticnere ficko jowa feme kimo‐ticnezi honerâ bubiaŋ sâko manawec. 4 Manarâ sakareme ʒoaŋ jahec â moc ehec juwec. Juku risiezo eme kimo‐ticnezi nânâ opâ bâmockeme nârâ fopic. 5 Izi hae fureme ʒoaŋ gie bapa 4 eha faharerâ raocte ʒawiewec. Ʒawieme ŋokac mamac‐ticnezi kimo‐ticne ʒiŋuc âzâcnewec: “Nânâ piticne mac moc nârâ sanaŋkerâ razemec.” 6 Mume jahe waha ŋehuc nânâ opâ nâpic. Ehuc ŋokacte mamaczi kimone ʒiŋuc âzâcnewec: “Go manatec sâckeme sifu ŋafe ʒi sawa fozemec.” 7 Eme ŋic e faharerâ razo eme kimo‐ticnezi ʒoɋac ecnekume mocwâc fowec. 8 Izi hae fureme ʒoaŋ gie bapa 5 ira furic uupictea fahare razo eme ŋokacte mamaczi ʒiŋuc âzâcnewec: “Nânâ piticne garepe nâqiŋnerâ ŋehaŋtec ʒoaŋ oteweme razemec.” Iŋuc âzâcneme waha ŋehuc nânâ nâpic. 9 Eme ŋic e ŋonâŋ‐ticne â kiŋaŋŋic‐ticne rocjofame razo ehapie kimonezi ʒiŋuc âzâcnewec: “Manakic, ʒi ʒoaŋ oteweme hae ŋafezo ekacte sifu fonaŋ. Hae biac qâhâpozo ekacte mana uruepie fonaŋ. Eme tomâcko furic uupicte faharerâ râec‐ŋopape raku hae‐ŋeŋicko fisinʒepieŋ.”

10 Ehame ŋic e ŋafe moc hae ijaha mocwâc foocte mi ecneme faharerâ ŋonâŋ‐ticne â kiŋaŋŋic‐ticne erâ doŋgi jajahec sate hejactekicne rocjopame rambiŋ. Raku Jebusi hae, Jerusalem hâcne, i bâqiŋkembiŋ. 11 Eme jaŋe Jebusi hae bâqiŋkehapie hae ŋafezo eme kiŋaŋŋiczi bomboŋ‐ticne ʒiŋuc âzâcnewec: “Nâŋâc Jebusi ŋic jaŋere haeo raʒirâ fonaŋ.” 12 Iŋuc mume bomboŋ‐ticnezi ʒiŋuc âzâcnewec: “Jaŋe Israe ŋic aricne, jaŋe ŋic furune juŋgopieŋ irec jaŋere haeo mi raʒinʒepeneŋ. Nâŋâc sifu fotâcnerâ Gibea haeo ranaŋ.” 13 Iŋuc murâ kiŋaŋŋic‐ticne ʒiŋuc âzâcnewec: “Warepie hae ŋekopirec kecocna rarâ Gibea me Rama haeo fonaŋ.” 14 Iŋuc mume jaŋe fotâcnerâ raku Benjamiŋte guru jaŋere hae Gibea i bâqiŋkehapie hae ŋafewec. 15 Eme jaŋe Gibea haeo foniŋte raʒimbiŋ. Raʒirâ hae ʒoŋao ŋehapie ŋic moczi moc mi hefârec‐jopawec.

16 Ehame ŋicraŋɋa moc e hae owâeme gieonec fisiwec. Ŋic e ine Eferaim tiki mâreŋkonec. E Gibea haeo jaba juwec. Â hae irec ŋic jaŋe ine Benjamiŋte guruonec. 17 Eme ŋicraŋɋa e fime rame ŋic hae ʒoŋao ŋepie honec‐joparâ ʒiŋuc muhuc wio‐jarewec: “Ŋoŋe wenirec warerâ wena razo eŋgopieŋ?” 18 Iŋuc muhuc wio‐jareme Lewire guruonec ŋic eki ʒiŋuc âzâcnewec: “Nâŋe Juda mâreŋko Betelehem haeonec Eferaim tiki mâreŋ râpenao ranaŋte ware ŋeŋgopeneŋ. No mâreŋ irecnec hâcne. Betelehem haeo rapo irecnec risie warekopac. Ehame ŋic moczi ficticnao moc mi râecnukac. 19 Nâŋe doŋgi jahere nânâ erâ wâc ŋic nâŋe nâŋâcne nânâ opâ sâcne fonârekac. Wiac moc mi basaŋgopeneŋ.” 20 Iŋuc mume ŋicraŋɋazi ʒiŋuc âzâcnewec: “Sâcne, manabâc mi eniŋ. Wiac irec me irec eŋareme bafic‐ŋopapemu, mâc, hae ʒoŋao ine mi foniŋ.” 21 Iŋuc murâ hefârec‐jopame ficticnao fembiŋ. Ehame doŋgi jahe nânâ gumec‐jofawec. Eme jaŋe kike‐jeŋic ʒure‐fârerâ waha ŋehuc nânâ opâ nâmbiŋ.

22 Jaŋe manabâc tâmiric nâ ʒeri ehuc ŋehapie hae irec ŋic repicne jaŋe fic orâŋkerâ domahuc motâcko heickembiŋ. Ehuc fic irec rune ŋicraŋɋa hâcne e ʒiŋuc âzâcnembiŋ: “Ŋic gore ficko hefâjec ŋekac e râetec wahame bâsâqorenaŋ.” 23 Iŋuc mupie ŋicraŋɋa e fickonec waharâ ʒiŋuc jazawec: “Âgo bureŋ, iŋuc misac, ŋic nore ficko wefujec i hone‐bipiehuc wiac hehesicne â mamakâcne keci mi eniŋ. 24 Manaŋgopieŋ, otâ‐nane ʒeŋoŋne â ŋic ere ŋonâŋ fic ʒira ŋekopirec. Irec jahe râec‐jofape hufâpire ro fârec ejactehuc manaŋgopieŋ sâc ejactenʒepieŋ. Â ŋic keci erao ine wiac mamakâcne i moc mi eniŋ.” 25 Ŋic jaŋe ine qizec qahuc domambiŋ. Iŋuc epie ŋic e ŋonâŋ‐ticne menao rorâ fâre ra behe‐jarewec. Eme jaŋe ŋafe ʒora bara e bâsâqorehuc juhapie bec furic bame behepie rawec. 26 Eme hae botâŋne bawahame ŋokac e rarâ ŋowe‐ticnezi fic fowec irec motâcko rândiŋke qarâ foha hae fure taniŋkewec.

27 Fure taniŋkeme ŋowe‐ticne e faharerâ raocte motâc rorâ honewec: Ŋonâŋ‐ticne motâcfuŋko meticne qâsiŋnerâ fowec. 28 Honerâ ʒiŋuc âzâcnewec: “Faharetec ranaŋ.” Iŋuc mume dâŋ okacne moc mi bâtikiecnewec. Iŋuc honerâ qâŋɋâŋ‐ticne doŋgi faio râerâ hae‐ticnao barawec. 29 Raku ficticnao fisirâ ŋonâŋ‐ticne râeme foha sâqe rorâ hezuwec. Hezukume dâkâ piic piic 12 eme Israe mâreŋ sâckehuc râeme rawec. 30 Wiac i honembiŋ jaŋe ʒiŋuc mumbiŋ: “Israe ŋic Aigita mâreŋkonec wefumbiŋ â ʒi juŋgopeneŋ dameŋ ŋondeŋ ira wiac iŋucne moc mi fuame honembeŋ. Irec tumaŋnerâ fârine weniŋuc muc manac eraŋgopieŋ i mutaniŋkepie mananaŋ.”