20
Benjamiŋte guru râsi fisi‐jarembiŋ
Eme Daŋ haeonec raku Bere‐Seba haeo fisikac erâ wâc Gileade mâreŋ mâmâc, mâreŋ ŋondeŋ irec Israe kikefuŋ jaŋe fahare‐fârerâ maŋ mocjaha ehuc Wofuŋ mai ecneniŋte Mizipa haeo tumaŋnembiŋ. Ehame Israe kikefuŋ guru‐jeŋic sâc irecnec ŋic micne jaŋe Anuture ŋicfâc bânie‐jarehuc ʒika wiac‐jeŋichec fisiku qâturepie ʒare‐jeŋic 400 tauseŋ ewec. Ehame Benjamiŋte ɋâricfâc jaŋe dâŋ ʒiŋuc manambiŋ: Israe ŋic guru gâcne sâko jaŋe Mizipa haeo tumaŋneŋgopieŋ. Eme Israe ŋic jaŋe tutumaŋ ira ʒiŋuc muhuc wiwioc embiŋ: “Wiac mamakâcne keci weniŋuc jaha fuawec irec moc mupie mananaŋ.” Iŋuc mupie Lewire guruonec ŋic, ŋokac‐ticne sipirickepie hâmowec, eki ʒiŋuc jazawec: “Ŋonâŋ‐nane nâhe Benjamiŋte guru jaŋere hae Gibea ira fonacte fisirâ ŋepec. Ira ŋehapere hae rune jaŋe ŋafeo nuniŋte manasuhuc fisi fic orâŋkembiŋ. Ehuc ŋonâŋ‐nane ro fârec ecnekupie hâmowec. Eme no ŋonâŋ‐nane rorâ hezupe dâkâ piic piic eme Israe mâreŋ forakac sâc râepe fâwec. Jaŋe wiac mutucne ehuc Israe guruo mamakâc sâko bâfuambiŋ hâcne. Manaŋgopieŋ, Israe ŋic sasawa ŋoŋe muc manac ehuc iŋuc me iŋuc ezo i ʒiŋuczia mupaŋkeniŋ.”
Eme ŋic sasawa jaŋe maŋ mocjaha ehuc ʒiŋuc mumbiŋ: “Nâŋâcnaonec moczi fic hae‐ticnao moc mi risie‐jâmbâŋkezejec. Nâŋâc Gibea hae râsi fisicnenaŋte Anutu wiocnepene eki mutâcne‐nâreocmu irec sâc enʒepeneŋ. 10 Nâŋâc momori 100 jaŋere nânâ roniŋte ŋic 10 â wâŋ tauseŋ jaŋere 100 â 10 tauseŋ jaŋere tauseŋ iŋuc rowosâec‐jopapene ranʒepieŋ. Eme momori jaŋe Benjamiŋte guru jaŋere hae Gibea ira ferâ okacne bazucnenʒepieŋ. Jaŋe Israe guruo hata bâsifuckehuc wiac sindaŋne embiŋ hâcne.” 11 Ehame Israe ŋic jaŋe Gibea hae râsi fisicneniŋte tumaŋnehuc maŋ mocjaha embiŋ.
12 Eme Israe ŋic guru gâcne sâko jaŋe Benjamiŋte guru jaŋerao dâŋ ʒiŋuc muhuc râepie rafârewec: “Wiac mamakâcnezi ŋoŋere ŋondeŋko fuarâ fokac. 13 Irec ŋoŋe Gibea haeo ŋic hehesicne juŋgopieŋ jaŋere dâŋ mutarapie jopanaŋ. Ehuc Israe guruo wiac repicne fokac i bârârienaŋ.” Iŋuc jazapie Benjamiŋte guru jaŋe Israe ŋic âgofâc‐jeŋic jaŋere dâŋ mi reŋkembiŋ. 14 Iŋuc ehuc Benjamiŋte guru jaŋe hae‐jeŋickonec Israe ŋic guru gâcne sâko jaŋehec ʒika qaniŋte Gibea haeo tumaŋnembiŋ. 15 Eme Benjamiŋte guru jaŋe hae‐jeŋickonec ʒikahec faharekupie ŋic 26 tauseŋ ewec. I Gibea hae rune mi wosec‐jopakicne. Jaŋe ine ŋic qac momorihec 700 rowosâec‐jopambiŋ. 16 Erâ guru‐jeŋickonec ŋic 700 rowosâec‐jopambiŋ jaŋe hâcne mejeŋic qaqana. Jaŋe qânâ moc tacbaŋko râerâ qapie qizec susuc mi ririocmu. 17 Ehame Benjamiŋte guru jaŋe tâmiric Israe ŋic guru gâcne sâko jaŋeraonec sawa momori ŋic ʒika‐jeŋichec 400 tauseŋ baʒawiec‐jopambiŋ.
18 Iŋuc erâ Israe ŋic jaŋe Bete haeo ferâ Anutu wiocnehuc mumbiŋ: “Nâŋeraonec guru wenimoizi bânie‐nâreme Benjamiŋte guru jopazo fenaŋmu?” Eme Wofuŋzi muwec: “Judare guruzi bâniezejec.”
19 Eme hae fureme Israe ŋic jaŋe faharerâ Gibea hae râsi fisicneniŋte hae mendâŋko teuŋ âtembiŋ. 20 Ehuc Gibea hae somâckehuc orâŋkerâ fombiŋ. 21 Ehame ʒoaŋ ira Benjamiŋte guru jaŋe Gibea haeonec waharâ Israe ŋic 22 tauseŋ jopambiŋ. 22 Iŋuc fuame Israe ŋic jaŋe ʒoɋac erâ ʒika fuŋkehuc orâŋkembiŋ mâreŋ ŋondeŋ ijaha mocwâc orâŋkerâ fombiŋ. 23 Eme Israe ŋic jaŋe Bete haeo ferâ Wofuŋtao kio wâwâsic ehuc juhapie hae ŋafeme Wofuŋ mu wioc ecnehuc mumbiŋ: “Benjamiŋte guru âgofâc‐nâŋec râsi mocwâc fisi‐jarenaŋmu me?” Eme Wofuŋzi muwec: “Sâcne, ferâ râsi fisi‐jareniŋ.”
24 Eme hae fureme Israe ŋic jaŋe Benjamiŋte guru râsi mocwâc fisi‐jarembiŋ. 25 Ehame ŋifec Benjamiŋte guru jaŋe râsi rojarehuc Gibea haeonec wahambiŋ. Ehuc Israe ŋic 18 tauseŋ jopambiŋ. Ŋic jopakicne jaŋe ʒika‐jeŋichec sasawa. 26 Iŋuc fuame Israe momori ŋic sasawa jaŋe Bete haeo ferâ Wofuŋte maio kio wâwâsic ehuc nânâ sowa juhapie hae ŋafewec. Iŋuc ehuc qowi bâzi â wama bâzi rikecnembiŋ. 27 Dameŋ ira Anuture ʒâʒâfic katapazi Bete haeo ŋejujec. Eme Aroŋte ŋosa Pinehasi, Eleaʒare ŋokâ hâcne, e dameŋ ira taha bapa juwec. 28 Ehame Israe ŋic jaŋe Wofuŋ mu wioc ecnehuc ʒiŋuc mumbiŋ: “Nâŋe Benjamiŋte guru âgofâc‐nâŋec jopanaŋte mocwâc fenaŋmu me sifu behenaŋmu?” Eme Wofuŋzi muwec: “Feniŋ, no tomâcko meŋeŋicko râec‐jopapemu hâcne.”
29 Irec Israe guru jaŋe ŋic gâcne Gibea hae somâckeniŋte râec‐jopambiŋ. 30 Eme hae mocwâc fureme Israe ŋic jaŋe Benjamiŋte guru râsi fisi‐jarerâ bâbâni embiŋ iŋuc ehuc Gibea hae mocwâc orâŋkembiŋ. 31 Ehame Benjamiŋte guru jaŋe Israe ŋic jopaniŋte haeonec waharâ rambiŋ. Eme Israe ŋic jaŋe eatuc‐jopahuc wisepie bâjâpec‐joparâ rambiŋ. Ehuc bâbâni embiŋ irec sâc ehuc hae sahao Israe ŋic jâpec‐jopa raku Bete â Gibea hae hata sosohoc‐jekicko ira ŋic 30 jopambiŋ. 32 Ehuc Benjamiŋte guru jaŋe mumbiŋ: “Bâbâni bawahac‐jopambeŋ iŋuc bawahac‐jopaŋgopeneŋ.” Ehame Israe ŋic jaŋe ine mumbiŋ: “Nâŋâc eatuc‐jopahuc wisepene hae beherâ hatao fânʒepieŋ.” 33 Iŋuc murâ Israe ŋic jaŋe dodoma‐jeŋickonec âte sue rarâ Baali‐Tama haeo birickembiŋ. Eme Israe ŋic gâcne Geba haere ʒoaŋ huhunaopec ira somâ râerâ fombiŋkonec quruŋ herâ faharembiŋ. 34 Eme Israe guru sâc irecnec ŋic 10 tauseŋ bâwosâec‐jopakicne jaŋe Gibea hae râsi ecnehuc fisipie ʒikazi ɋârâŋke‐jâmbâŋkewec. Ehame Benjamiŋte guru jaŋe sisipiriczi bâmbeŋ‐joparâ fowec i moc mi ʒâŋitambiŋ. 35 Ehame Wofuŋzi Israe ŋic jaŋere ʒâŋe faio Benjamiŋte guru bawahac‐jopawec. Eme Israe ŋic jaŋe ʒoaŋ ira Benjamiŋte guruonec ŋic ʒika‐jeŋichec 25 tauseŋ â 100 jopa miziembiŋ. 36 Iŋuc fuame Benjamiŋte guru jaŋe dockembiŋ hâcne.
Eme Israe ŋic jaŋe ŋic gâcne Gibea hae somâckerâ foniŋte râec‐jopambiŋ jaŋe manapaŋ‐jopahuc Benjamiŋte guru hae hejarembiŋ. 37 Eme somâ râerâ fombiŋ ŋic i jaŋe bâruŋ jaha Gibea haeo ferâ ŋic ŋokac ʒikazi imac‐jopambiŋ. 38 Erâ Israe ŋic guru sâko â ŋic gâcne somâ râerâ fombiŋ jaŋere ma ine hae turuŋkepie ʒahuc hosâc sâko fahareocte musereckembiŋ. 39 Eme guru sâko jaŋe honerâ ʒika qaniŋte forisiembiŋ. Ehame Benjamiŋte guru jaŋe fuŋkerâ jâpec‐jopa raku Israe ŋic 30 jopambiŋ. Ehuc ʒiŋuc mumbiŋ: “Bâbâni ʒika qahuc ejarembiŋ irec sâc imac‐jopaŋgopeneŋ hâcne.” 40 Iŋuc muhapie ma mukicne hosâc izi haeonec ŋezuhuc feme Benjamiŋte guru jaŋe forisierâ honehuc weaŋkembiŋ. 41 Ehame Israe ŋic jaŋe risiepie Benjamiŋte guru jaŋe sisipiriczi maic‐jopawec i honerâ hâbi‐jeŋic ŋeŋgoroŋkewec. 42 Ŋeŋgoroŋkeme Israe ŋic râpec‐joparâ mâreŋ burocnaopec wisehapie ʒikazi rocjopawec wâc. Ehame Israe momori gâcne haeo jumbiŋ jaŋe waharâ âgofâc‐jeŋic bafic‐jopapie orâŋ bârâŋ ejarehuc jopambiŋ. 43 Ehuc Benjamiŋte guru jopa jâpec ejare raku Gibea hae ŋifecne ʒoaŋ wewefunaopec toma‐jeŋicko fisirâ bawahac‐jopa‐jâmbâŋkembiŋ. 44 Eme Benjamiŋte guruonec ŋic momori wânʒâŋ 18 tauseŋ jaŋe hâmombiŋ. 45 Eme gâcne jaŋe wiserâ mâreŋ burocnaopec Rimoŋ qânâ hârâcko rambiŋ. Ehame ŋic 5 tauseŋ hatao qâhâmoc‐jopambiŋ, ehuc ʒoɋac erâ jopa jâpec ejare raku Gidom haeo fisirâ ŋic 2 tauseŋ sâqezi âke hâmoc‐jopambiŋ. 46 Eme Benjamiŋte guruonec ŋic momori wânʒâŋ ʒika‐jeŋichec 25 tauseŋ jaŋe ʒoaŋ ira hâmombiŋ. 47 Ehame ŋic 600 jaŋe wiserâ mâreŋ burocnaopec Rimoŋ qânâ hârâcko rarâ ira juhapie mosa 4 tarawec. 48 Eme Israe ŋic jaŋe risierâ Benjamiŋte guruonec ŋic â qowi bâfuac‐jopambiŋ sâc ʒikazi imac‐jopambiŋ. Ehuc mâreŋ ira hae ŋerawec i ʒoc turuŋkepie ʒafârewec.