21
Benjamiŋte guru jaŋe ŋokac rocjopambiŋ
Israe ŋic jaŋe Mizipa haeo dâŋ ʒiŋuc mupaŋkembiŋ: “Nâŋâcnaonec moczi otâ‐ticne Benjamiŋte guru moc mi jarezejec.” Eme Israe ŋic jaŋe Bete haeo fisirâ ŋehuc Anuture maio ki mamakuc ehuc juhapie hae ŋafewec. Eme ʒiŋuc mumbiŋ: “O Israere Wofuŋ Anutu, wiac ʒi wemocte Israe guruo fuame ŋic guru moc omaekac?” Izi hae fureme ŋic jaŋe furic uupicte faharerâ alata moc bambiŋ. Ehuc ira qowi bâzi â wama bâzi rikembiŋ. Ehuc Israe ŋic jaŋe ʒiŋuc muhuc wiwioc embiŋ: “Guru wenimoi jaŋe tutumaŋko Wofuŋ mai ecneniŋte mi fisimbiŋ?” Guru moc jaŋe Wofuŋ mai ecneniŋte Mizipa haeo mi fisimbiŋ jaŋere hâcne manasuhuc ʒiŋuc mujomirembiŋ: “Jaŋe hâmo‐jâmbâŋkenʒepieŋ.” Eme Israe ŋic jaŋe Benjamiŋte guru âgofâc‐jeŋic jaŋere busâqoc manahuc ʒiŋuc mumbiŋ: “Miŋecgac Israe ŋic nâŋâcnao guru moc omaekac hâcne. Irec nâŋâc weniŋuc ehuc ʒikare nâfocne jaŋere ŋonâŋfâc bâfuac‐jopanaŋmu? Nâŋâc otâfâc‐nâŋec moc mi jarenaŋte Wofuŋte ʒâŋeo ɋetickehuc mupaŋkembeŋ i.”
Iŋuc muhuc ʒiŋuc wiwioc embiŋ: “Weni jaŋe Wofuŋ mai ecneniŋte Mizipa haeo mi fisimbiŋ?” Iŋuc murâ honembiŋ, Jabesi‐Gileade haeonec ŋic jaŋe moc mi fisimbiŋ. Eme ŋic biric‐joparâ Jabesi‐Gileade haeonec ŋic basac‐jopambiŋ hâcne. 10 Irec Israe kikefuŋ jaŋe ŋic qac momori 12 tauseŋ sorec‐jopahuc ʒiŋuc mutâcne‐jarembiŋ: “Ŋoŋe rarâ Jabesi‐Gileade hae rune kâcɋene â piticne ʒikazi jopa‐fârenʒepieŋ. 11 Ehuc wiac kecʒiŋuc enʒepieŋ: Ŋic sasawa â ŋokac, naru ʒeŋoŋne mocwâc mi juŋgopieŋ jaŋe ʒeŋgoma jopanʒepieŋ.” 12 Eme jaŋe iŋuc ehuc Jabesi‐Gileade hae rune jaŋeraonec naru ʒeŋoŋ, ŋicte fuŋne mi manakicne, 400 bâfuac‐jopambiŋ, ehuc Kanaaŋ mâreŋko Silo hae ŋewec ira bacjopa rambiŋ.
13 Eme Israe kikefuŋ sasawa jaŋe Benjamiŋte guru Rimoŋ qânâ hârâcko jumbiŋ jaŋehec âgo ʒuʒuhuc mocwâc fuaocte dâŋ râepie rawec. 14 Rame Benjamiŋte guru jaŋe risiembiŋ. Risiepie Israe ŋic jaŋe Jabesi‐Gileade haeonec ŋokac jopahuc gâcne akic‐jopambiŋ ŋokac i jaŋe ŋonâŋfâc‐jeŋic eniŋte jarembiŋ. Erâ sifu sâcjeŋic mi ewec. 15 Eme Wofuŋzi Israe guruo sawa sâko bâfuawecte Israe ŋic jaŋe Benjamiŋte guru jaŋere busâqoc manambiŋ.
16 Eme Israe kikefuŋ micnefâc‐jeŋic jaŋe ʒiŋuc mumbiŋ: “Benjamiŋte guruo ŋokac jopa miziekicnere ŋic tucne jaŋere ŋokac wenirec bâfuac‐joparâ jarenaŋmu?” 17 Ehuc ʒuhuckerâ mumbiŋ: “Israe kikefuŋko guru moc mi omae‐jâmbâŋkezejec. Irec Benjamiŋte guruo ʒikare nâfocne juŋgopieŋ jaŋe fua sawec ejâmbâŋkenʒepieŋ. 18 Erâ nâŋâc sifu otâfâc‐nâŋec sâcne mi jarenaŋmu. I ʒiŋuc mupaŋkembeŋ irec: ‘Moc e Benjamiŋte guru ŋokac jareocmu e sâwecte biŋe ezejec.’ ” 19 Iŋuc muhuc ʒiŋuc mumbiŋ: “Manaŋgopieŋ, Wofuŋte hombaŋ jara sâc Silo haeo fuaekac. Hae i Bete hae faicnao, erâ wâc Bete haeonec hata sâko Sikem haeo fekac irec ʒoaŋ wewefunao â Lebona hae juwicnao ŋekac.” 20 Iŋuc murâ Benjamiŋte guru mutâcne‐jarehuc kecʒiŋuc mumbiŋ: “Ŋoŋe rarâ waiŋ gieo soŋkerâ fohuc ruc banʒepieŋ. 21 Ehame Silo haeonec ŋokac naru jaŋe gae woniŋte fisipie ŋoŋe waiŋ gieonec wefurâ rusâc ŋonâŋfâc‐ŋeŋic rocjoparâ mâreŋ‐ŋeŋicko risienʒepieŋ. 22 Ehame mamac seŋfâc‐jeŋic jaŋe nâŋerao warerâ muheŋɋâŋ epie ʒiŋuc jazanaŋmu: ‘Nâŋere erâ mana urue‐jareniŋ. Ine ʒiŋucte: Nâŋe ʒika qambeŋko ŋic rusâc ŋokacfâc‐jeŋic moc mi akic‐jopambeŋ, me ŋoŋe wâc mi jarembiŋ. Iŋuc enʒapiŋ muzac ŋoŋe ʒi kiŋ hurenʒapiŋ hâcne!’ ” 23 Eme Benjamiŋte guru jaŋe iŋuc ehuc gae wombiŋkonec ʒare‐jeŋicte sâc ŋokac rocjoparâ wisembiŋ. Ehuc mâreŋ‐jeŋicko risierâ hae heɋârerâ bahuc ira ŋeŋe juju embiŋ. 24 Ehame Israe ŋic jaŋe dameŋ ira Silo haeonec faharerâ guru‐jeŋic sâc rafârembiŋ.
25 Dameŋ ira Israe ŋic jaŋerao ŋicwofuŋ moc mi juwec. Israe ŋic jaŋe maŋjeŋiczi wiac manapie sâckewec sâc erambiŋ.