2
Wofuŋ e Israe ŋic qaqatara‐jeŋicte tutuc qajarekac
1 Wofuŋte dâŋ norao ʒiŋuc fuawec: 2 “Go Jerusalemko ra dâŋ kecʒiŋuc mutec ŋic hazec‐jeŋicko huzejec, Wofuŋzi ʒiŋuc mukac:
Go socɋâri juhuc maŋge norao domawec
â biŋe‐nane juhuc maŋjauŋ enaremeŋ,
erâ mâreŋ sawao â he sarac mi eenao bâjâpecnumeŋ
no irec manasukopac.
3 Israe ŋic jaŋe dameŋ ira Wofuŋ nore tiriŋicfâc jumbiŋ,
nânâ bâbâsu‐nane hâcne.
Eme irec kosa nâmbiŋzi kiŋ nâfuambiŋ,
ehame sisipiriczi fai‐jeŋicko fewec.
Wofuŋ nore dâŋ iŋuc.”
4 Jakobore kikefuŋ â Israere kikefuŋ gurune gurune ŋoŋe Wofuŋte dâŋ mananiŋ. 5 Wofuŋ e kecʒiŋuc mukac:
“Mamacfâc‐ŋeŋic jaŋe wemo wiacte mana‐narepie sâqoreme
behecnurâ nemu jabane jaŋerao qohotahuc
jaŋacne wâc ŋic jabane embiŋ?
6 Ehuc ʒiŋuc moc mi mumbiŋ,
‘Aigita mâreŋkonec jowac‐nâpome wefumbeŋ
â mâreŋ sawao, mâreŋ burocne hârâc‐ticnehec
kereŋne â dapâcnehec, ŋiczi sicne fotâc
me ŋec juc mi eeŋgopieŋko jowa qataŋ enârewec,
Wofuŋ e wena?’
7 Eme no mâreŋ moc jufu gie‐ticnehec ira fârine
â mâriri fokac i nâ gapec eniŋte râec‐ŋopapo.
Ŋoŋe ine ira fisirâ mâreŋ no nahacne biŋe fowec
i bâsâqorehuc bâbiepie mamakâcne ewec.
8 Taha bapa jaŋe ʒiŋuc mu wioc mi embiŋ,
‘Wofuŋ e wena?’
Sâcmutâc dâŋ mamana jaŋe mi mana taracnumbiŋ,
soŋaŋ jaŋe râpecnumbiŋ,
porofete jaŋe Baali nemu ere ʒâŋeo findaŋdâŋ mumbiŋ,
ehuc bafic‐jopaniŋte tâpiri mi fojareekac
jaŋerao qohotambiŋ.
9 “Irec hâcne no ŋoŋehec mecne,
ɋâricfâc‐ŋeŋic jaŋehec mecne
dâŋgie mocwâc mi bahuc jupemu,
Wofuŋ nore dâŋ iŋuc.
10 Ŋoŋe hâwec fotâcnerâ Kipiro nucko raniŋ,
me Kedara mâreŋ ira kiŋaŋ sorec‐jopapie
ra fuŋne ŋazapie mana‐hâmoniŋ,
ehuc wiac kecʒiŋuc moc fuawec me mâcne
i honeniŋ.
11 Ŋicguru moc weni jaŋe nemufâc‐jeŋic
behec‐joparâ furune moc rocjopambiŋ?
Eme jaŋere nemufâc i nemu fârine aricne.
Nore ŋicfâc jaŋe ine huriri‐jeŋic no behecnurâ
nemu moc mi babafic‐jopane i rombiŋ.
12 O sambâŋ, go irec hâcne weaŋkezemec,
go fâfârerâ ɋarac ɋarac hâhâwicne qazemec,
Wofuŋ nore dâŋ iŋuc.
13 Ŋicfâc‐nane jaŋe sâqocne jajahec bâfuac‐jofaeŋgopieŋ,
moc i opâ ʒâŋe jujune no hâcne behecnueŋgopieŋ,
â moc i opâ nombâŋ mâreŋ hahaŋkekicnao ropie
opâ hurâ rafâreekac.
14 “Israe e kiŋaŋ qaqa me? Me niŋgiŋko fuawec me?
Irec wemocte ro bâtâtiec ecneeŋgopieŋ?
15 Laioŋ jaŋe ere owackeeŋkopieŋ,
kâcɋene owackeeŋgopieŋ hâcne,
mâreŋ‐ticne imackembiŋ â hae sâko‐ticne ŋerakac
i turuŋkepie ʒame niniŋ siarereŋ fuawec forakac.
16 Erâ i sawa mâcne, Memfisi â Tapanese haeonec
jaŋe qizec rogarepie utu pârâc juzemec.
17 Wiac i sasawa gahacne kiŋte erâ faigao fekac i!
Go Wofuŋ Anutuge no hata jowacguzo muekopac sâc
râpecnuekic hâcne.
18 Eme ʒi wemo wiac moc bâfuacmurâ
Nilu opâ nâzore Aigita mâreŋko rakomec?
Me wemo wiac moc bâfuacmurâ
Eufrata opâ nâzore Asia mâreŋko rakomec?
19 Gahacne hehesiczi bâtiŋguocmu
â qaqataragezi okacne bazu‐gareocmu.
Irec ʒiŋuc hone mana tarac ezemec:
Wofuŋ Anutuge no behecnuekic â araŋ mi banareekic
i wiac hehesicne â hâtâne,
Anutu Tâpiri Ɋuŋɋasaŋ Wofuŋ nore dâŋ iŋuc.
Baali nemu kiŋaŋ qajarehuc wâwânâŋhec embiŋ
20 “Go mârâc jaha fuŋkerâ kiŋaŋ giege
hetarahuc juwefumeŋ â niŋgiŋge hetâcnemeŋ,
ehuc mumeŋ, ‘No kiŋaŋ moc mi qapemu.’
Erâ ine tiki toŋne toŋne ira mecne,
â jâc dodomane sasawa irec fuŋnao mecne
sasec ŋokac iŋucne waha fomeŋ.
21 No waiŋ ukicne biaŋne â fârine sasawa saracgupo,
eme go weniŋuc erâ ŋerisiehuc waiŋ kâteo fuakicne
â waiŋ jawane irec sâc emeŋ?
22 Irec go sahacge moŋgeŋ uucnezi hecmuo
me saife bocjahazi ʒurecmuo ine
kiŋ bahacge i nore maio sifu wânâŋ jaha foocmu,
Wofuŋ Anutu nore dâŋ iŋuc.
23 Go weniŋuc erâ muekic, ‘No wânâŋhec mi juekopac,
no Baali nemu jaŋerao mi qohotaekopac.’
Go wâneŋ uuruŋko hurâ weniŋuc ehuc juekic i honec,
erâ wiac ebac emeŋ i manasuc me!
Go kamele ŋokacne kike afec
hata‐ticne kosa rac warec eekac iŋucne.
24 Go kâte doŋgi ŋokacne iŋucne,
e mâreŋ sawao juku maŋticne ewec,
eme su qahuc nokafe boc heekac,
mozi andac‐ticne sâcne bawahaocmu?
Moczi e bâfuaocte ecneekaczi babasa gie sâko mi bahuc
su qaqa dameŋ‐ticnao ra biac bâfuaocmu.
25 Kikegao wic fuazacte soŋaŋkezemec,
â maracge kereŋkezacte manabâc ezemec.
Goki ine mukomec, ‘Aricne, mi epemu,
no ŋic jabane jaŋere enareekacte
jaŋerao qohotapemu hâcne.’
26 “Fiuc roro ŋic moc bâfuapie qurutuaocmu
irec sâc jaha Israe kikefuŋ â ŋicwofuŋfâc‐jeŋic,
fekicnefâc‐jeŋic, taha bapa â porofetefâc‐jeŋic
mâmâc qurutuaniŋmu.
27 Jaŋe jâc âzâcneeŋgopieŋ, ‘Goki hâcne mamac‐nâŋec,’
â qânâ âzâcneeŋgopieŋ, ‘Goki hâcne rocnâpomeŋ.’
Jaŋe no mi maicnuhuc râpecnumbiŋ hâcne.
Ʒârâ dameŋ‐jeŋicko ine mueŋgopieŋ, ‘Faharerâ bafic‐nâpoc me!’
28 Hâc, ŋaŋacnere manasuhuc
nemufâc‐ŋeŋic bâfuac‐jopambiŋ jaŋe weni?
Ejarepie fahareniŋ me! Eme ʒârâ hâriŋ dameŋ‐ŋeŋicko
sâcne bafic‐ŋopaniŋmu me weniŋuc irec fuŋne taniŋkezejec.
O Juda kikefuŋ, go haege ŋerakac
irec sâc jaha nemufâcge doma raŋgopieŋ hâcne.
29 “Ŋoŋe wemocte dâŋgie nareeŋgopieŋ?
Ŋoŋe ʒeŋgoma râpecnumbiŋ i,
Wofuŋ nore dâŋ iŋuc.
30 No naru motecfâc‐ŋeŋic bâtiŋ‐jopa‐bipiepo,
jaŋe bâbâtiŋ‐nane qâsuambiŋ.
Ʒika‐ŋeŋiczi laioŋ iŋucne erâ
porofetefâc‐ŋeŋic nâcjopawec.
31 O mâreŋ ʒirec rune, ŋoŋe Wofuŋ nore dâŋ mananiŋ:
No Israe kikefuŋ ŋoŋe mâreŋ burocne
me mâreŋ dapâc qisiric iŋucne
moc eŋarehuc jupo me?
Ŋicfâc‐nane, ŋoŋe wemocte ʒiŋuc muŋgopieŋ:
‘Nâŋe rambaŋko juŋgopeneŋ,
irec gorao mi risie fanaŋmu?’
32 Ŋokac ʒeŋoŋ moczi eri qoqonaŋ‐ticnere moc nikeckeocmu?
Me ŋic mocte ŋokac biŋe moczi heticne erinehec
moc beheme foocmu me?
Ŋicfâc‐nane ŋoŋe ine nore ʒoaŋ gie bapa
wowosene tâmiric nikec‐ŋopawec.
33 “Go boe sau hatage racmurâ
mana sarickehuc guriŋne baekic.
Irec hata hehesicne âtehuc
juku biac maŋge ewec.
34 Ehame ŋaqigao qarâ suriŋnezi bahacmâc
jaŋere soc bohotaekac,
jaŋe ine wiac moc fiuc rohapie
mi bâfuac‐jopameŋ, aricne.
35 Erâ goki wiac i sasawa mana‐bipiehuc mukomec,
‘No kiŋ tâmiric, kimbeŋ‐ticne norao fowec i omaewec.’
Manakic, ‘No sâqocne mi bapo,’
go iŋuc mukicte dâŋko râecgupemu.
36 Go wemocte manabâc tâmiric
ra rowec ware rowec ekomec?
Asiria ŋic jaŋe behecgupie qurutuameŋ
iŋuc jaha Aigita ŋic jaŋere erâ qurutuacmu.
37 Ehuc jaŋeraonec wâc mimi busâqoc faio wahazemec,
erâ dopecguniŋte woric‐jopameŋ
jaŋe hâcne Wofuŋ noni qikiŋ‐jopapo,
irec jaŋerao jujuhâmo sâcne mi bâfuacmu.”