10
Wofuŋ burecne â Anutu fârine
O Israe kikefuŋ, ŋoŋe Wofuŋzi dâŋ ŋazakac i mananiŋ. E kecʒiŋuc mukac hâcne:
“Ŋoŋe qâpuc gurune gurune jaŋere hata âtepie
maŋŋeŋic mi ezejec,
jaŋe sambâŋko sowi fuame honerâ hâwic‐jopaekac,
ŋoŋe ine mi hâwic‐ŋopazejec.
Kâteo jâc qapie metâ bapa e râriczi he fasaec ekume
wiac ŋicmezi ba akic ekicne fuaekac.
Erâ siliwa â golzi ba eric ecnerâ rândiŋkezacte
hama â biriŋzi qasanaŋkeekac.
Nemuɋâŋfâc‐jeŋic jaŋe ŋiczi wipe wiac hâhâwic ejareniŋte
gieo ŋic hawari baeŋgopieŋ iŋucne,
jaŋe dâŋ moc mi mueŋgopieŋ â hata juju‐jeŋic mi fokacte
ŋiczi hâpoc‐jopa raeŋgopieŋ hâcne.
Jaŋe wiac hâhâwicne moc bâfuaniŋte tâpiri
mi fojarekacte jaŋere mi hâwic‐ŋopazejec,
ŋifec ine wiac biaŋne moc eniŋte
iŋuc jaha tâpiri mi fojarekac.”
O Wofuŋ, go iŋucne moc mi jujâmbâŋkekac,
go tâpirihecte fekicne jukomec,
ʒâŋe biŋege i qeŋ bipinehec fokac hâcne.
Mo ŋiczi ŋicne ŋicne jaŋere Wofuŋ Sâko gore mi hâwickeocmu?
Go hâcne araŋ bagarezo!
Ŋicne ŋicne mamanafâc‐jeŋic jaŋere ŋondeŋko
â guriŋ bapa gie baeŋgopieŋ jaŋerao
go iŋucne moc mi jujâmbâŋkekac, aricne.
Jaŋe mutucne â maŋ tâmiric sasawa;
nemuɋâŋte qaqazu gie bapa i wiac racne,
jaŋe jâc sawa.
Tarasisi haeonec siliwa qajacnekicne,
â Ufaʒi mâreŋkonec gol bafisieŋgopieŋ.
Eme ɋâŋ qâqâtâc bapa â golzi wiac bapa jaŋe basarickeeŋgopieŋ,
ehuc ŋaqi âmuc âmucne â bâbâroŋ hejarepie huekac;
wiac i sasawa metâ bapa jaŋere meqâreŋ hâcne.
10 Wofuŋzi ine Anutu fârine â Anutu jujune,
erâ Wofuŋ Sâko juweczi juocmu sanaŋ.
Mâreŋzi kimbeŋ‐ticnere ɋiɋiteckeekac
â ŋicne ŋicne jaŋe aaric‐ticnere sâcne
mi sanaŋkerâ domaniŋmu.
 
11 Irec jaŋere ʒiŋuc munʒepieŋ: “Nemu jaŋe sambâŋ â mâreŋ mi bâfuac‐jofambiŋ, jaŋe mâreŋko â sambâŋ rurumaŋko sirowe‐fârenʒepieŋ.”
 
12 Anutu e ine tâpiri‐ticnezi mâreŋ bâfuawec
â maŋɋârâŋ‐ticnezi mâreŋ sâko mâreŋ irec hobeteŋne râewec,
erâ mamana‐ticnezi sambâŋ qaratiewec.
13 Eki mume ɋuŋ heme sambâŋko hoere fânâŋ fuawec,
eki hâcne mâreŋ qaŋeŋnaonec karorac ejareme fahareŋgopieŋ.
 bâbâric bâfuame hoe heekac,
erâ rowaŋ‐ticnaonec mâŋâŋ soreme fisiekac.
14 Ŋic jaŋe ʒeŋgoma mutucne â mamana tâmiric,
golzi wiac bapa jaŋe ɋâŋ qâqâtâc‐jeŋicte erâ qurutuaeŋgopieŋ;
nemuɋâŋ‐jeŋic i wiac eatucne, juju tâmiric hâcne.
15 Jaŋe wiac racne â gâgâwinehec,
bâbâtiŋ dameŋ maic‐jopame siroweniŋmu.
16 Anutuzi Jakobore rowaŋ jukac e jaŋere sâc aricne,
eki hâcne wiac sasawa bâfua‐fârewec.
Israe ŋic jaŋe fuŋfuŋfâc‐ticne;
ʒâŋe‐ticne Anutu Tâpiri Ɋuŋɋasaŋ Wofuŋ.
Juda kikefuŋ sisipiric fuacnewec
17 Somâmaŋko jukomec go mâreŋge behecmurâ
mafa wiacge ro qâzuc ec!
18 Wofuŋzi ʒiŋuc mukac hâcne:
“Manaŋgopieŋ, no mâreŋ ʒirec rune dameŋ ʒi hâcne
fific bacjopahuc hetapaic‐jopape
fuŋne‐jeŋic mana taranʒepieŋ.”
 
19 Jei, nu bâʒâic enarekicne i hâhâwicne,
â wicnane i mi bâbâsomiene.
No ine ʒiŋuc manapo: “Hucnane ine hâcne,
no irec ʒâic sanaŋkerâ manazepac.”
20 Qoruc boze‐nane ima bakicne,
â qoruc bozere muc wiac i tâcne‐fârekicne;
naru motecfâc‐nane jaŋe behecnurâ ratâmirembiŋ,
qoruc boze‐nane i moczi mocwâc mi fâreocmu,
â seli qoruc‐nane wâc mi ɋetickepie waha domaocmu.
21 Lama soŋaŋ jaŋe mutuc matacne jumbiŋ,
ehuc Wofuŋte mu wioc mi embiŋ;
irec gie bapie fâri tâmiric ewec,
â lama guru‐jeŋic i tâtie‐fârewec.
 
22 Hazec râeniŋ, dâŋ biŋe fuakac!
Mananiŋ, biac warekac i!
Fânâŋ sâko faic mâreŋkonec warekac hâcne,
i Juda hae sâko ŋerakac sâc ima bafâreme
kâte qâto jaŋere ŋeŋe hae eocte.
 
23 O Wofuŋ, no manakopac, mâreŋŋic e juju hata‐ticne
e jahacne tâpirio âte siŋkerâ sâcne mi raocmu,
erâ moc e hata‐ticne rahuc fâretiŋ raocte
tâpiri wâc mi focnekac.
24 O Wofuŋ, go aaricko mâcne, tiŋnegere sâcko
bâtiŋnuzemec,
omaezipore iŋuc enarezemec.
 
25 Kimbeŋge ŋicne ŋicne go kâuc bacguŋgopieŋ jaŋere faio hoŋkec,
ʒâŋege mi riwaseckeeŋgopieŋ jaŋerao hâcne;
jaŋe Jakobo ki qâsuc ecnembiŋ,
ki qâsuc ecnehuc nâmiziembiŋ,
ehuc hae mâreŋ‐ticne imackembiŋ.