11
Ʒâʒâfic hetâcnembiŋ
1 Wofuŋtaonec dâŋ Jeremiarao fisiwec i kecʒiŋuc: 2 “Ʒâʒâfic kecʒirec dâŋ i Judare ŋicfâc â Jerusalem hae rune jazatec mananiŋ. 3 Ehuc muzemec, Wofuŋ Israere Anutu e ʒiŋuc mukac: Ŋic moc e ʒâʒâfic kecʒirec dâŋ mana rereŋ mi eocmuzi sâwecte biŋe ezejec. 4 No dâŋ i hâcne mimiŋnefâc‐ŋeŋic Aigita mâreŋkonec â ʒârâ ʒâpâonec jowac‐jopa wahahuc jaza mutâc epo, ehuc mupo: No dâŋ ŋaza mutâc epo sâc mana rereŋ efârenʒepieŋ. Eme ŋoŋe ŋicfâc‐nane juhapie noni Anutu‐ŋeŋic juzepac. 5 Erâ mimiŋnefâc‐ŋeŋic dâŋ mupaŋke‐jarepo irec fârine bâfuahuc mâreŋ moc susu â baŋac qâmbâriŋkeekac i jarezepac; eme irec sâc fuawec fokac hâcne.” Mume mupo, “Wofuŋ, iŋuc hâcne fuaoc.”
6 Eme Wofuŋzi ʒiŋuc nazawec: “Go dâŋ i sasawa Juda hae ŋerakac ira mecne â Jerusalem haere hata forakac ira mâmâc muromackehuc muzemec. Ŋoŋe ʒâʒâfic kecʒirec dâŋ manarâ reŋkenʒepieŋ. 7 No mimiŋnefâc‐ŋeŋic Aigita mâreŋkonec jowac‐jopa wahahuc fuŋkerâ uŋ sawaŋ hati ejare warehuc ʒiŋuc jazahuc jupozi jukopac: Dâŋnane reŋkeniŋ. 8 Jaŋe ine mana rereŋ mi embiŋ â hazec‐jeŋic ira wâc mi râembiŋ, aricne, jaŋe ru sâc maŋjeŋic râŋgeŋne â hehesicne irec sâcko jumbiŋ. Eme no irec hâcne ʒâʒâfic kecʒirec dâŋ reŋkeniŋte mutâcne‐jare‐bipiehape mi reŋkembiŋte dâŋ muwarekicne irec fârine jaŋere faio fefâreocte mupo.”
9 Eme Wofuŋzi ʒuhuckerâ nazawec: “Juda kikefuŋ â Jerusalem hae rune jaŋe no râsi enareniŋte mumockembiŋ i manakopac. 10 Jaŋe mimiŋnefâc‐jeŋic jaŋere hata hehesicnao risiembiŋ; jaŋe hâcne dâŋnane mananiŋte qikiŋnembiŋ, ehuc nemu jabane jaŋerao qohotahuc kiŋaŋ qajarembiŋ. Israe â Juda kikefuŋ jaŋe mimiŋnefâc‐jeŋic jaŋehec ʒâʒâfic epo i hetâcnembiŋ hâcne. 11 Irec Wofuŋ no ʒiŋuc mukopac: Manakic, noni mupe sisipiriczi fua‐jarerâ moc mi bâtiric‐jopaocmu, ehame wira wâwâsic enarepie mi mana‐jarepemu. 12 Eme Juda hae ŋerakac irec rune jaŋe mecne â Jerusalem ŋecjucfâc‐ticne jaŋe mecne hosâc rike‐jarehuc jueŋgopieŋ jaŋerao ra wâsic‐jopanʒepieŋ; jaŋe ine ʒârâ hâriŋ dameŋko sâcne mi bafic‐jopa‐jâmbâŋkeniŋmu. 13 O Juda, go haege ŋerakac irec sâc jaha nemufâcge bâfuac‐jopameŋ, â Jerusalem haeo hata forakac irec sâc Baali nemu hosâc âsu rikecneniŋte alata wiac bambiŋ.
14 “Goki ine ŋicguru i jaŋere erâ mi numuzemec, me jaŋere erâ mu huacbuc wâc mi ezemec; jaŋe ʒârâ hâriŋ dameŋ‐jeŋicko wira wâwâsic enarepie mi mana‐jâmbâŋkepemu hâcne. 15 Joroc biaŋ‐nane e wiac hehesicne ewecte ficnaneo wemocko ʒuhuckerâ juocmu? Mumupaŋ me qowi bâzi ririkege izi sâqocnege sâcne bâtâmire‐gareme ʒeri bubiaŋ ecmu me? 16 Wofuŋ no ʒâŋege mârâc ʒiŋuc mupo, ‘Oliwa jâc dutu ɋâri fie ruruckekicne â fâri rarau’, fânâŋ sâko fuame fuŋnao ʒoc ruqepe tieŋ taeŋne ʒâseŋke‐fâreocmu. 17 Anutu Tâpiri Ɋuŋɋasaŋ Wofuŋ noni hâcne Israe â Juda kikefuŋ sarac‐jopapo, ʒi ine hehesic‐jeŋicte erâ wiac hâhâwicne fua‐jareocte mukopac; jaŋe bâiŋnuniŋte Baali nemu hosâc âsu rikecnehuc jumbiŋ hâcne.”
Jeremia râsi ecnembiŋ
18 Wofuŋ e maŋbâwiŋ enareme manapo;
e dameŋ ira hâcne eebapa‐jeŋicte fuŋne nowatume
hone tarapo.
19 No lama motec urucne hezuniŋte
ro baraeŋgopieŋ iŋucne jupo,
ehuc, râsi enarehuc dâŋ kecʒiŋuc mumockembiŋ
i kâuc bapo:
“Jâc fâri wâmbuŋne i sipirickehuc jujune jaŋere mâreŋkonec qâfiepene
ʒâŋe‐ticnere mocwâc mi manasuzo.”
20 Anutu Tâpiri Ɋuŋɋasaŋ Wofuŋ,
go ine mumutara ŋic tiŋne,
go maŋ mamanasu ba esâic ecneekiczi
ine okacne bazu‐jarecmu i nowatutec honezepac,
no dâŋnane gorao râepe fokac hâcne.
21 Anatoti haeonec ŋiczi juju‐nane sipirickeniŋte dâŋne birickehuc mueŋgopieŋ, “Go gupene hâmozicte Wofuŋte ʒâŋeo findaŋdâŋ mi muzemec.” 22 Irec Anutu Tâpiri Ɋuŋɋasaŋ Wofuŋ e ŋic i jaŋere ʒiŋuc mukac: “Manakic, no qa bâtiŋ ejarepemu, ehame ŋicmotecfâc‐jeŋic jaŋe ʒikare nânâ eniŋmu, erâ ŋokâ otâfâc‐jeŋic jaŋe nânâre hâmo sipiric eniŋmu. 23 Jaŋere ŋic ʒanʒaŋne moc mi juniŋmu, no hâcne Anatoti rune jaŋere faio bâbâtiŋ dameŋ‐jeŋicko wiac hâhâwicne mupe feocmu.”