HIOBE
MITI RAŊɊAo Hiobere binaŋ â dâŋ biri ʒora i papia moc bucticne râekicne fokac. Papia i mo mitiŋiczi qâreŋkewec, ʒâŋene mi fuakacte kâuc baŋgopeneŋ.
Hiobe e Kanaaŋ mâreŋ irec ʒoaŋ wewefunaopec mâreŋ mocko juwec. E Anuture fuŋne manahuc araŋ bacnewec â kiŋaŋ qacnehuc juwec. Â Anutuzi jambuŋkekume moneŋ mafa‐ticne, lama noniŋ bulimakao, kamele becâsicfâcne erâ wâc kiŋaŋ qaqafâcne sawe mâririackerâ jucnembiŋ. Jahacne otâ ŋokâfâc 10 jumbiŋ.
Eme Sataŋ qoqoric rune eki Hiobe Anuturao qorickeâ muwec: E moneŋ mafare erâ gorao qohotakac. Iticne arictac eme behecguocmu. Iŋuc mume Anutuzi manacneha Sataŋ e Hiobe eesâic hâhâwicne bâfuacnewec. Ʒoaŋ mocjahao hae qowifâcne â kiŋaŋ qaqafâcne erâ otâ ŋokâfâcne hâmo sipiric efârembiŋ. Wiac iŋucne fuacneme Hiobezi sifu Anutu mi behehuc ʒiŋuc muwec: “Anutuzi narewec, Anutuzia nowac rokac, irec Wofuŋte ʒâŋe muteŋkekopac.” Eme irec faicnao Sataŋzi sahacnao wicwakoc bâfuacneme ʒâic hâhâwicne manahuc ŋewec.
Ʒâic â busâqoc i manahuc ŋehame âgofâcne 3 jaŋe mu bâmunaŋ ecneniŋte fisimbiŋ. Fisi qâsuerâ ŋeku dâŋ kecʒiŋuc âzâcnembiŋ: “Anutu e tiŋne rune. Irec mâreŋŋic kosa mi enâreekac. Go ine ʒârâ hâriŋ â ʒâic serereŋ hâhâwicne fua‐gareme honerâ muŋgopeneŋ: Go bahac ŋemâcne moc bâfuarâ hesoŋkekomec. Irec bahacge mufuarâ maŋge bârisietec Anutuzi mocwâc âgo egarehuc jauŋ bacguocmu.” Iŋuc mupie Hiobezi bahac mickeme dâŋ mu herisic mâretec jâmbâŋ ehuc ŋembiŋ sanaŋ. Hiobezi ine kecʒiŋuc muhuc mickewec: “No bahac moc mi bâfuapo, â Anutu maŋzi wâc mi behekopac. Eki ine jâmbomac behecnume fuŋne basarâ buʒâic hâhâwicne manakopac. Buʒâic manape hone‐bipiehuc ŋoŋe irec fainao bâʒâicnuhuc jaha ŋeŋgopieŋ.” Eme dâŋ mu hetikic erambiŋ i afecne mâcne.
Hiobe e ine eesâicko mi dockewec, mâc busâqoc dâŋ muraku gâcne wâc musifuckewec. Eme ʒâhec Anutuzi ɋuŋ parandaŋ maŋnao fuacnerâ fuŋne‐ticne mujaŋgeŋkecnewec. Erâ irec faicnao Hiobe e dâŋ hehesicne gâcne muwec irec busâqoc maname Anutuzi sahacne bâpiaŋkeme ɋiɋic qawec, erâ jambuŋkeme ɋâric mocwâc fuacnembiŋ â hae qowi me moneŋ mafa ine fekicne jâmbâŋ tahackewec. Eme jufeku ŋicqizec jâmbâŋ erâ hâmowec.
Hiobe e mo dameŋko juwec, me papia‐ticne i mo mitiŋiczi qâreŋkewec me mo dameŋko qâreŋkekicne i mocwâc mi mana sanaŋkeŋgopeneŋ.
Papia maŋnao gaŋne gaŋne dâŋ forakac ine kecʒiŋuc:
Hio 1:1–5. Ira Hiobe mitio juju‐ticnere dâŋ â Sataŋte qoqoric dâŋ fokac.
Hio 1:6–12. Hiobe eesâic hâhâwicne fuacnewec.
Hio 1:13–22. Hiobezi eesâicko sanaŋkewec.
Hio 2:1–10. Eesâic ʒuhuckerâ fuacneme sanaŋkewec jaha.
Hio 2:11–13. Âgofâcne 3 jaŋe mu bâmunaŋ ecneniŋte fisimbiŋ.
Hio 3—37. Ira, jaŋe Hiobehec dâŋ mu hec hetikic erambiŋ irec binaŋ forakac.
Hio 38—41. Ira Anuturaonec dâŋ okacne fua‐jarewec irec dâŋ fokac. Eme dâŋ irec maŋnao ine qizecne ʒiŋuc fua taniŋkekac: Anutu e wiacte wiac irec Wofuŋ juweczi jukac.
Hio 42. Ira Hiobezi fuŋne‐ticne mufuakac, erâ Hiobe e mocwâc ɋiɋic qame Anutuzi jambuŋkeme ɋâricfâcne mocwâc fuacnembiŋ â moneŋ mafa fekicne fuacnewec wâc.
Hiobere papia irec fuŋne kecʒiŋuc honeŋgopeneŋ: Maŋnao dâŋ forakac izi huc ʒâic â hâmocte mu wioc ehuc dâŋ fuŋne fuŋne kosa woseeŋgopeneŋ irec okacne nâzâocte qâreŋkekicne. Ookac dâŋ qaocte qâreŋkekicne hâcne. Ŋic buc buc juju â eebapa‐nâŋec sâqoreme okacne huc ʒâic fua‐nâreekac mupene mi sâkeekac. Ookac dâŋ iŋucne i Hioberao fâri tâmiric ewec hâcne. Huc ʒâic â hâmoc izi mamanasiŋte fuŋne babataniŋ fuŋmoc, Hiobere papia qizeczi iŋuc hâcne nâzâ nâwotuc ekac.
1
Hiobezi Anutu araŋ bacnehuc juwec
1 Uzi mâreŋko ŋic moc juwec ʒâŋene Hiobe. E Anutu araŋ bacnehuc erao qohota sanaŋkewec, erâ bahac tâmiric â siocmâc juhuc sâqocne qikiŋnewec. 2 Ehame ŋokâfâcne 7 â otâfâcne jahec â moc fuarâ jucnembiŋ. 3 Â qowifâc‐ticne ine kecʒiŋuc jumbiŋ: Lamafâc‐ticne 7 tauseŋ, kamelefâc‐ticne 3 tauseŋ, bulimakaofâc‐ticne ŋicne 1 tauseŋ â doŋgifâc‐ticne ŋokacne ine 500, iŋuc jumbiŋ. Ehame kiŋaŋŋicfâc‐ticne guru sâko jucnehapie ʒoaŋ wewefunaopec ŋic gurune gurune jurambiŋ jaŋe siric‐jopa‐fârehuc ŋic ʒâŋe biŋe sâkohec juwec. 4 Ŋokâfâc‐ticne jaŋe ine buc buc dameŋ‐jeŋic maickeme sâc tiwâ bâzi bâmockehuc hahac ɋa â seŋfâc‐jeŋic jaŋehec nâniŋte hefârec‐jopa jumbieŋ. 5 Eme tiwâ bâzi nâpie tarame Hiobe e hae fufurecte faharerâ ŋokâ otâfâc‐ticne jaŋe bahac fâsâc eniŋte manasuhuc jaŋere erâ taha bâzi rike jujec. E ʒiŋuc muhuc iŋuc ejujec: “Ŋokâfâc‐nane jaŋe wiac i ehuc sâqocne bâfuarâ Anutu bunao bambieŋ mecne.” Hiobe e dameŋ sâc iŋuc hâcne ejujec.
6 Eme ʒoaŋ mocko aŋelo jaŋe Wofuŋte maio tumaŋnehapie Sataŋ e ŋondeŋ‐jeŋicko mâmâc fisirâ domawec. 7 Eme Wofuŋzi Sataŋ ʒiŋuc muhuc wiocnewec: “Go wenirec warekomec?” Iŋuc wiocneme Sataŋzi dâŋ ʒiŋuc bâtikiecnewec: “No mâreŋ sâc fotâcne‐fârehuc juku warekopac.” 8 Iŋuc mume Wofuŋzi Sataŋ ʒiŋuc âzâcnewec: “Go iŋuc juhuc kiŋaŋŋic‐nane Hiobe e moc hone manac ecnemeŋ me? Manakic, mâreŋko ŋic e iŋucne moc mi juŋgopieŋ, e bahac tâmiric â siocmâc juhuc Anutu no araŋ banarerâ sâqocne qikiŋneekac.” 9 Iŋuc mume Sataŋzi Wofuŋ ʒiŋuc âzâcnewec: “Manakic, Hiobe e go araŋ mâc mi bagareekac. 10 Goki e jahacne â ŋokac naru motecfâcne erâ wiac focnekac sasawa i ŋezic‐jopa‐fâreekic, ehuc wiac ebac eekac sâc i jambuŋketec fua biaŋ efâreha lama bulimakaofâc‐ticne sawe mâririackeeŋgopieŋte iŋuc eekac. 11 Irec no ʒiŋuc gazakopac: Go wiac focnekac sasawa i jâoc rofâretec acmâc jaha sâwecgurâ behecguocmu.” 12 Iŋuc mume Wofuŋzi dâŋ kecʒiŋuc âzâcnewec: “Sâcne, wiac focnekac sâc i gore meo râe‐fârekopac, irec iŋuc me iŋuc ecnezo murâ ecnec, mâc sahac‐ticne ine mi bâuazemec.” Iŋuc âzâcneme Sataŋ e Wofuŋ beherâ rawec.
Hiobezi eesâicko sanaŋkewec
13 Eme ʒoaŋ mocko Hiobere ŋokâ otâfâc jaŋe hahac‐jeŋicte ficko tiwâ bâzi nâhuc ŋembiŋ. 14 Ŋehapie kiŋaŋŋic moczi Hioberao fisirâ kecʒiŋuc muwec: “Bulimakaofâcge ŋicne jaŋe gieo mâreŋ bâfâuckehuc jumbieŋ â doŋgifâcge jaŋe ŋifecnao sopâc nâhuc domambieŋ. 15 Ehame Sabaŋic jaŋe ututuŋ jaha râsi fisirâ kiŋaŋŋicfâcge ʒikazi qâhâmoc‐jopahuc doŋgi bulimakao ʒeŋgoma ro bacjopa rambiŋ. Eme no buc wiserâ biŋe gazapemurâ warekopac.” 16 E dâŋ muha muha izia kiŋaŋ motec moczi fisirâ ʒiŋuc muwec: “Anuturaonec ɋuŋ parandaŋ sâko heha bâbâriczi waha lamafâcge â soŋaŋfâc‐jeŋic ʒâhâmoc‐jopame no buc wiserâ biŋe gazapemurâ warekopac.” 17 Eme e dâŋ mi mutaraha kiŋaŋ motec moczi fisirâ ʒiŋuc muhuc âzâcnewec: “Kaldea ŋic guru jahec â moc jaŋe fisirâ kiŋaŋŋicfâcge ʒikazi qâhâmoc‐jopahuc kamelefâcge amec‐jopa rambieŋ. Eme no buc wiserâ biŋe gazapemurâ warekopac.” 18 E dâŋ muha muha izia kiŋaŋ motec moczi fisirâ Hiobe dâŋ ʒiŋuc muhuc âzâcnewec: “Ŋokâ otâfâcge jaŋe hahac‐jeŋicte ficko nânâ opâ nâhuc ŋembieŋ. 19 Ŋehapie mi mâreŋ sawaonec mâŋâŋ ɋicwânʒâŋneheczi fisirâ fic ro bafaharerâ beheme waharâ qanʒaŋnehuc qâhâmoc‐jopa‐fârezejec i. Eme no buc wiserâ biŋe gazapemurâ warekopac.”
20 Iŋuc mume Hiobe e faharerâ busâqoc manahuc ŋaqi‐ticne bâsuckewec. Ehuc qizec‐ticne ʒafe ruacnerâ mâreŋko hetutuckerâ fowec. 21 Ehuc dâŋ kecʒiŋuc muwec: “No neŋgoc bumaŋkonec metariŋ fuapo, irec hâmorâ metariŋ jaha rapemu, Wofuŋzi narewec, Wofuŋzia nowac rokac, irec Wofuŋte ʒâŋe muteŋkekopac.”
22 Hiobe e wiac iŋuc fuacneme Anutu mana sâqorecnehuc bahac moc mi bâfuawec.