JONA
Porofete gâcne jaŋere papia honepene moc ekac, â Jonare honepene moc ekac. I kecʒiŋucte: Maŋnao dâŋ forakac i Jonazi mu qâreŋ mi ewec. Jona e hâmome jara 300 juwefuku Israe ŋic jaŋe kâpâcwâruonec risierâ mocwâc mâreŋ‐jeŋicko juhapie ŋic moczi Jonare dâŋ gâcne qâreŋkekicne fowec ira iticnehuc Jonare binaŋ bahuc qâreŋkewec, manapene iŋuc ekac. Erâ sifu Jona e Anuture giedâŋ qatarazo ewec irec dâŋ mufuakacte, â Wofuŋ Anutu buuruc â maŋjauŋ‐ticnere fuŋne mujaŋgeŋkekacte papiare manapene furi sâko ekac.
Papia i ʒoricne aricne, gaŋticne 4 sawa, erâ sifu findaŋdâŋ â Anuture dâŋ farine â furi sâko mufua‐nârekac. Dâŋ fârine kecʒiŋuc hâcne: Anuturao buurac â maŋjauŋ fokac izi qâpuc jaŋerao fotâcnekac wâc. Dâŋ izi hâcne Jona papia‐ticnere dâŋqizecne ekac.
Jonare binaŋ qâreŋkewec ŋic ere fuŋne ʒiŋuc fua taniŋkeme honeŋgopeneŋ: Ŋic e Judaŋic jaŋere maname sâqorewec i kecʒiŋucte: Israe ŋic jaŋe Anutuzi rowosâec‐jopame ŋicgurufâc‐ticne moc buc embiŋte maŋfefe ehuc ŋicguru gâcne sâko qaisoc‐jopambiŋ â mana wahac‐jopambiŋ. Qâreŋŋic eki ine porofete Jesaja ere dâŋte sâcko jaha Anutu aki anonoc â buuruc‐ticnere fuŋne kecʒiŋuc mutaniŋkewec: Anutu e mâreŋŋicfâc‐ticne sasawa, miti mamana â qâpuc, nâŋâcnere maname furi sâko ekacte busâqoc mana‐nârehuc akic‐nâpoocte muekac. Dâŋ iŋucne i Judaŋic jaŋe kâpâcwâruo jumbiŋ dameŋ irec juwicnao moc mi mupie fua jujec. Izi wâc ʒiŋuc mufua‐nârekac: Jonare papia i dameŋ irec juwicnao mâcne, dameŋ irec faicnao qâreŋkekicne. Mâc Jona jahacne juhame wiac fuawec i ine jâmbomac kâpâcwâru dameŋ juwicnao fua‐fârewec.
Eme Jona e mo dameŋko juwec? Israe ŋic jaŋere ŋicwofuŋ Jeroboam II eki juhame juwec. Jeroboam II e ine jara 787–747 dameŋ ŋondeŋ ira ŋicwofuŋ juwec. Erâ Ŋicwofuŋ jaŋere papia II, gaŋ 14:25 ira porofete moc ʒâŋene Jona ere dâŋ qâreŋkekicne fokac i binaŋ‐ticne ʒira bahuc qâreŋkekicne Jona ere hâcne.
Papia maŋnao dâŋ kecʒiŋuc mutaniŋkekicne: Wofuŋ Anuture mamana birio dâŋ fokac i ŋiczi mi mamana tarane. Qâreŋŋic e sambâŋ Mamac‐nâŋecte fuŋne iŋuc hâcne nâzâ nâwotuc eocte Jonare binaŋ bahuc qâreŋke‐nârewec. Nâŋâc Anuture fuŋne hone manac erâ e warecke sâqorehuc dapecnerâ muteŋ bâteŋ ecnenaŋte qâreŋkewec hâcne. Mamanasiŋko Wofuŋte fuŋne jâmbâŋ mana taranaŋte nâzâ qazuc ehuc Jonare binaŋ banârewec. Erâ moc ʒiŋuc mananaŋ: Qâreŋŋic e dameŋ ira Juda kikefuŋ jaŋe biac miti kiŋaŋ gie baniŋte baafec‐jopawec, Jesu e mâreŋko mi wahahame.
1
Wofuŋzi Jona giedâŋ mucneme wisewec
1 Wofuŋte dâŋ Amitaire ŋokâ Jona erao kecʒiŋuc fuawec: 2 “Ajoc, go ʒawierâ Niniwe hae sâkoo rac, erâ hae irec rune uŋdâŋ jazac, sindaŋ‐jeŋicte fânâŋzi norao fisikacte hahaŋne bahuc jazazemec hâcne!” 3 Jonazi ine Wofuŋte ʒâŋe maionec wiserâ Tarasisi haeo raocte Jope haeo hurawec. Ira woke moc Tarasisi haeo razo eha bâfuawec. Erâ Wofuŋ wisecnerâ jaŋehec Tarasisi haeo raocte woke furine barâ fewec.
4 Eme Wofuŋzi mume mâŋâŋ hâhâwicne qame hâwec sâqore‐jâmbâŋkeme wokezi fâuckezo ewec. 5 Eme wokeŋic jaŋe hâwic‐jopame nemufâc‐jeŋic ru sâc wira wâwâsic ejarembiŋ. Erâ wokezi afeckeocte wokere mafa wiac gâcne i hâwecko behepie huwec. Jona e ine woke fâhâŋnao hurâ guŋsanaŋ fowec. 6 Ehame wokere kapiteŋzi hurâ Jona ʒiŋuc muhuc dâŋ mucnewec: “Go fuŋne weniŋucte guŋ fokomec? Ajoc, faharerâ nemuge wira wâwâsic ecnec, eme eki mecne busâqoc mana‐nârehuc ŋezic‐nâpoha mi sipirickenaŋmu.”
7 Eme jaŋe jaŋackoaŋ kecʒiŋuc mumbiŋ: “Ajoc, qaŋgec qanaŋ, eme more erâ wiac hâhâwicne ʒi fua‐nârekac irec fuŋne taniŋkezejec.” Jaŋe iŋuc murâ qaŋgec qapie Jona âke fuawec. 8 Âke fuame ʒiŋuc wiocnembiŋ: “Go nâzâc, wiac ʒi more erâ fai‐nâŋecko fekac? Go wemo gie bahuc juekic erâ wenirec warekomec? Go mâreŋ wenirec erâ ŋicguru weni jaŋeraonec?” 9 Eme eki ʒiŋuc muwec: “No Hebiraio ŋic, erâ no, sambâŋ Wofuŋ Anutu hâwec â mâreŋ bâfuac‐jofawec, e hâcne araŋ bacneekopac.” 10 Iŋuc mume ŋic jaŋe mâretec hâwic‐jopame ʒiŋuc muhuc âzâcnembiŋ: “Ec, go wemo wiac emeŋ?” E Wofuŋ wisecnewec irec fuŋne qanaŋ mufua‐jarewecte manasuhuc iŋuc âzâcnembiŋ.
11 Eme hâwec sâqore‐jâmbâŋkeha ʒuhuckerâ ʒiŋuc muhuc wiocnembiŋ: “Weniŋuc egarepene hâwec benoŋ baocmu?” 12 Eki muwec: “Rocnurâ hâwecko behecnupie hupe benoŋ baocmu. No manakopac, hâwec sâqore‐jâmbâŋkekac i nore erâ ekac hâcne.” 13 Ŋic jaŋe ine woke moŋgeŋkopec raocte samarierâ foickehuc gie sâko bambiŋ, hâweczi ine siri sâko qawecte eipiembiŋ. 14 Irec Wofuŋ wira wâwâsic ecnehuc ʒiŋuc mumbiŋ: “O Wofuŋ, go ŋic kecʒirec erâ mi bâsirowec‐nâpoc, go micdâŋgere sâcko wiac eekicte ŋic kecʒi hâwecko behepene hume irec kiŋ i nâŋerao mi batarazemec.” 15 Jaŋe iŋuc muhuc Jona rorâ hâwecko behepie hume benoŋ bawec. 16 Ŋic jaŋe ine Wofuŋte mâretec hâwic‐jopame bâzi hezu rikec ecnehuc wiac biaŋne gâcne eniŋte mumupaŋ dâŋ mumbiŋ wâc.
17 Ehame Wofuŋzi hâwec qowi sâko moc ecneme ware Jona ɋâckewec. Eme Jona e qowimaŋko foha ŋafe ʒoaŋ jahec â moc tarawec.