1 Wofuŋ e Israe ŋic râsifâc‐jeŋic jaŋeraonec batarac‐joparâ wama bâfua‐jareme juwefukuhapie jaha Josua e ŋicqizec jâmbâŋ ewec. 2 Ehuc Israe ŋic sasawa erâ soŋaŋ micne, mumutara ŋic â fekicnefâc‐jeŋic hetumaŋ‐jopa‐fârerâ kecʒiŋuc jazawec: “No ŋicqizec jâmbâŋ ekopac. 3 Wofuŋ Anutu‐ŋeŋiczi ŋoŋere erâ ŋic gurune gurune ʒi jaŋerao wiac sasawa ewec i hone‐fârembiŋ. E ŋoŋere erâ ʒika qawec hâcne. 4 Manaŋgopieŋ, Jordaŋ opâzi qâtâcneme raku ʒoaŋ huhunaopec Hâwec Sâkoo fisikac ira ŋic gurune gurune bawahac‐jopapo. Erâ ŋicguru gâcne juraŋgopieŋ jaŋere mâreŋ i guru‐ŋeŋicte sâcko bâtâc barâ ŋoŋere biŋe râepo wâc. 5 Wofuŋ Anutu‐ŋeŋiczi bânierâ guriŋ‐jopahuc jopa jâpec ejareocmu. Eme Wofuŋ Anutu‐ŋeŋic e mupaŋke‐ŋarewec irec sâcko mâreŋ‐jeŋic roniŋmu. 6 Erâ Mosere sâcmutâc papia qizecko wiac sasawa qâreŋkekicne fokac i aimuŋ jaha soŋaŋkehuc efârenʒepieŋ, moc mi ʒepieŋ. 7 Ehuc ŋic gurune gurune irec ʒanʒaŋnezi ŋondeŋ‐ŋeŋicko ʒuhuckerâ juŋgopieŋ jaŋehec sisifuc mi enʒepieŋ. Â nemufâc‐jeŋic jaŋere ʒâŋe mu bâuac, me jaŋere ʒâŋeo mumupaŋ dâŋ mumu me kiŋaŋ qaqajare, me dieŋzi herâ dadape‐jare i wâc moc mi ejâmbâŋkenʒepieŋ. 8 Ŋoŋe juwefuŋgopieŋ iŋucnea Wofuŋ Anutu‐ŋeŋictao qohota sanaŋkerâ junʒepieŋ. 9 Wofuŋ e ŋoŋe ʒira juniŋte ŋic gurune gurune tâpiri ɋicwânʒâŋ‐jeŋichec jopa jâpec ejare‐fârewec. Irec juwefuhapie ŋic moczi sanaŋkerâ râsi fifisi‐ŋare i moc mi fuawec erâ wâc mi fuakac. 10 Wofuŋ Anutu‐ŋeŋic e mupaŋke‐ŋarewec irec sâcko ŋoŋere erâ ʒika qaekacte ŋoŋeraonec mocjahazi ŋic 1 tauseŋ jaŋe ejareme sâcne wiseniŋmu. 11 Ʒi ine ŋaŋac juhâmoniŋte Wofuŋ Anutu‐ŋeŋic maŋzi ʒâficke‐jâmbâŋkenʒepieŋ. 12 Ŋoŋe mocwâc risierâ ŋic gurune gurune hetiric‐jopakicne ŋondeŋ‐ŋeŋicko juraŋgopieŋ, jaŋerao qohotahuc ŋokac nareŋ gareŋ eniŋmuo 13 ine Wofuŋ Anutu‐ŋeŋiczi ʒuhuckerâ ŋic gurune gurune ʒi jopa jâpec moc mi ejare‐jâmbâŋkeocmu. Jaŋe hâcne ŋoŋere bitiŋ eniŋmu, erâ wâc ŋâŋârâc‐ŋeŋic ehuc ŋifec â ŋifec qâʒâic‐ŋopaniŋmu â ʒârâ ehuc ʒâŋe‐ŋeŋicko âkec‐ŋopaniŋmu. Iŋuc fokuhame Wofuŋ Anutu‐ŋeŋiczi mâreŋ biaŋ ŋarewec ʒira oma‐fâreniŋmu.

14 “Ʒi hâmoc dameŋ‐nane qândâŋkekac. Wofuŋ Anutu‐ŋeŋiczi dâŋ biaŋne mupaŋke‐ŋarewec i ninic jaha fua‐fârewec i ŋoŋe maŋ mamanasu‐ŋeŋicko buc buc manasuŋgopieŋ. Mumupaŋ sasawa i moc mi wahahuc mupaŋkewec sâc deŋke‐fârewec. 15 Eme Wofuŋ Anutu‐ŋeŋiczi wiac biaŋne ŋoŋerao fuaocte mupaŋkewec sâc fuawec. E behepie ine irec sâc jaha ŋoŋerao wiac hâhâwicne sâko bâfuaocmu. Ehuc mâreŋ biaŋne ʒi ŋarewec irecnec bâsirowec‐ŋopaocmu. 16 E ʒâʒâfic‐ticne mutâcne‐ŋarewec i hetâcnehuc nemu dape‐jarehuc kiŋaŋ qajareniŋmuo iŋuc hâcne fuaocmu. Eme ŋoŋerao Wofuŋte kimbeŋzi bâruŋkeha mâreŋ biaŋ ŋarewec ʒira boc mi jufehuc biac omaeniŋmu.”