24
Israe ŋic jaŋe Anutuhec embiŋ
Josua e Israe ŋic guru sâc furu jaha Sikem haeo hetumaŋ‐jopawec. Ehuc soŋaŋ micne, mumutara ŋic â fekicnefâc‐jeŋic hefârec‐jopame Anuture maio fisimbiŋ. Eme Josuazi ŋic ŋokac sasawa kecʒiŋuc jazawec: “Israere Wofuŋ Anutu e ʒiŋuc mukac: ‘Mârâc sasac jaha jâmbâŋ apa ŋosafâc‐ŋeŋic jaŋe Eufrata opâ ocniŋucnao juhuc nemu gâcne araŋ bajare jumbieŋ. I jaŋeraonec moc Tera, Abraham â Naho jahere mamac. Eme no apa‐ŋeŋic Abraham e Eufrata opâ ŋifecnaonec rorâ jowa warepe Kanaaŋ mâreŋ ate‐fârewec. Ehame ɋâricfâc‐ticne bocjaha basawec‐jopapo, ehuc Isaka râcnepo. Eme Isakare ŋokâ jahec Jakobo â Esau bâfuac‐jofapo. Erâ Esau e Seiri tiki mâreŋ i ro rauc eocte râcnepo. Jakobo â ɋâricfâc‐ticne jaŋe ine Aigita mâreŋko humbiŋ. Ehame no Mose â Aroŋ jaŋerao sorec‐jofahuc Aigita mâreŋko wiac qeŋ bipinehec bâfuarâ jowac‐jopa wefupo. Erâ apa ŋosafâc‐ŋeŋic Aigita mâreŋkonec jowac‐jopape wareku Hâwec Bâbâroŋko fisimbiŋ. Ehame Aigita ŋic jaŋe apa ŋosafâc‐ŋeŋic bâjâpec‐joparâ ʒika keretac â momori ŋic becâsicfâc‐jeŋichec Hâwec Bâbâroŋko fisimbiŋ wâc. Eme apa ŋosafâc‐ŋeŋic jaŋe Wofuŋ no kio wâwâsic enarembiŋ. Enarepie jaŋe â Aigita ŋic ŋondeŋ‐jeŋicko dapâc qisiric bâfuapo. Ehuc mupe hâweczi Aigita ŋic qâuruc‐jopa‐fârewec. No Aigita mâreŋko wiac bâfuapo i hone‐fârembiŋ. Erâ mâreŋ burocnao dameŋ ʒora jâmbâŋ jumbiŋ. Erâ no bacŋopa warehuc jukuhape Jordaŋ ŋifecnao Amori ŋic jaŋere mâreŋko fisimbiŋ. Fisipie jaŋe ŋoŋehec ʒika bâfuapie meŋeŋicko râec‐jopape mâreŋ‐jeŋic ro rauc ehapie sâc bâsirowec‐jopapo. Eme Ziporo ŋokâ‐ticne Balake e Moabi ŋicwofuŋzi faharerâ Israe ŋic ŋoŋehec ʒika qawec. Ehuc Beoro ŋokâ‐ticne Bileamzi sâwec‐ŋopaocte dâŋ râecnewec. 10 Erâ no sifu Bileam dâŋticnere hazec moc mi râepo. Ehame jambuŋ‐ŋopawec. Eme no Balakere meonec batarac‐ŋopapo hâcne. 11 Eme ŋoŋe Jordaŋ opâ fotâcnerâ Jeriko haeo raʒimbiŋ. Raʒipie Jeriko ŋic jaŋe ŋoŋehec ʒika bâfuambiŋ. Erâ Amori ŋic, Periʒi ŋic, Kanaaŋ ŋic, Hitiŋic, Girigasi ŋic, Hiwiŋic â Jebusi ŋic jaŋe wâc iŋuc jaha embiŋ. Eme no meŋeŋicko râec‐jopa‐fârepo. 12 Iŋuc ehuc Amori ŋicwofuŋ jajahec hâhâwic sâko hejactepe hâbi‐jekic goroŋkeme wise‐ŋarepic. I ŋoŋere tepe me ʒika wiaczi gie i mi bawec. 13 No mâreŋ â fic hae ŋarepo i ŋoŋe giene mi bambiŋ. Erâ ira ŋeŋe juju ehuc waiŋ â oliwa nâeŋgopieŋ i ŋoŋe ŋaŋac he sarac wâc mi embiŋ.’
14 “Eme irec hâcne Wofuŋ araŋ bacnehuc maŋbiaŋko jauŋ fârihec kiŋaŋ qacnenʒepieŋ. Erâ apa ŋosafâc‐ŋeŋic jaŋe Eufrata opâ ocniŋucnao â Aigita mâreŋko nemu araŋ bajarerâ dape‐jarehuc jumbiŋ i behe‐fârerâ Wofuŋ kiŋaŋ qacnenʒepieŋ. 15 Me Wofuŋ kiŋaŋ qacneniŋte mi eŋarekacko ine miŋecgac jaha mo kiŋaŋ qacnezo muŋgopieŋ e mutaniŋkeniŋ. Apa ŋosafâc‐ŋeŋic jaŋe Eufrata opâ ocniŋucnao mâreŋ fokac ira nemu araŋ bajarehuc dape‐jarembiŋ i me mâreŋ‐jeŋicko ŋec juc eŋgopieŋ. Amori ŋic hâcne, jaŋere nemufâc dape‐jareniŋmu. No â wiacfâc‐nane nâŋe ine Wofuŋ kiŋaŋ qacnenaŋmu.”
16 Eme ŋic ŋokac jaŋe dâŋ kecʒiŋuc bâtikiecnembiŋ: “Nâŋe Wofuŋ râpeckerâ nemu kiŋaŋ qaqajare i moc mi ejâmbâŋkenaŋmu. 17 Wofuŋ Anutu‐nâŋec e jahac apa ŋosafâc‐nâŋec â nâŋe nâŋâcne Aigita mâreŋte niŋgiŋkonec batarac‐nâpowec. Ehuc fuŋne qaqa mâsi ʒâŋe fai‐nâŋecko bawec. Â hata jumbeŋ sâc eki aki anonoc enârehuc jowac‐nâpohame ŋic gurune gurune jaŋere ŋondeŋko fotâcnembeŋ. 18 Erâ nâŋe mâreŋ ʒira raʒinaŋte Wofuŋ e jahac Amori ŋic gurune gurune ʒira jumbiŋ jaŋe jopa jâpec ejarewec. Irec nâŋe wâc Wofuŋ kiŋaŋ qacnenaŋmu. Eki hâcne nâŋâcne Anutu fârine.”
19 Eme Josuazi ŋic ŋokac ʒiŋuc jazawec: “Wofuŋ e Tiri Anutu, e ʒoɋac‐ticnehec, irec ŋoŋe kiŋaŋ sâcne mi qacneniŋmu. E kiŋ bahac â qaqatara‐ŋeŋic moc mi behe‐jâmbâŋkeocmu. 20 Ŋoŋe nemu kiŋaŋ qajarehuc Wofuŋ fârine râpeckeniŋmuo ine wiac biaŋne eŋareweczi ŋerisierâ wiac hâhâwicne bâmâckehuc eŋarerâ sipiric‐ŋopaocmu hâcne.” 21 Eme ŋic ŋokac jaŋe Josua âzâcnembiŋ: “Aricne, nâŋe Wofuŋ kiŋaŋ qacnenaŋmu.” 22 Eme Josuazi ŋic ŋokac jazawec: “Ŋoŋe ŋaŋaczia fuŋne‐ŋeŋic muhuc Wofuŋ kiŋaŋ qacneniŋte mutaniŋkeŋgopieŋ hâcne.” Eme jaŋe mumbiŋ: “Nâŋe nâŋac fuŋne‐nâŋec muŋgopeneŋ.” 23 Eme eki muwec: “Irec nemu jabane bajuŋgopieŋ i bârârie‐fârerâ Israere Wofuŋ Anuturao maŋ mamanasu‐ŋeŋic râepie fosanaŋkezejec.” 24 Eme ŋic ŋokac jaŋe Josua âzâcnembiŋ: “Wofuŋ Anutu‐nâŋecte mic reŋkerâ kiŋaŋ qacnenaŋmu.” 25 Mupie Josuazi ʒoaŋ ira ŋic ŋokac jaŋe Anutuhec ʒâfic‐jopahuc Sikem haeo sâcmutâc â tiŋne jujure dâŋ mutâcne‐jare‐fârewec. 26 Ehuc dâŋ sasawa i Anutu sâcmutâc‐ticnere papia qizecko qâreŋkewec. Erâ qânâ sâko moc rorâ boriŋfuŋko Wofuŋte furu mâreŋ fowec ira âkendâŋneme domawec. 27 Erâ Josuazi ŋic ŋokac jazawec: “Qânâ ʒi honeŋgopieŋ, e Wofuŋzi dâŋ sasawa nâzâwec i mana‐fârekac. Eme ŋoŋe Anutu‐ŋeŋic enʒaŋauc ecnehuc eatuckeniŋmuo ine eki fuŋne‐ŋeŋic sâcne rituocmu.” 28 Eme Josuazi ŋic sasawa mâreŋ ro rauc embiŋ sâc sorec‐jopame râwiŋne‐fârembiŋ.
Josua â Eleaʒa jahe hâmopic
29 Wiac sasawa ewarehuc jumbiŋ irec faicnao Wofuŋte kiŋaŋŋic Nuŋte ŋokâ Josua e jara 110 bazurâ hâmowec. 30 Hâmome e jahacne mâreŋ Timina‐Sera Eferaim tiki mâreŋko Gasi tiki ŋekac irec faicnao duckembiŋ.
31 Eme Israe ŋic jaŋe Josuare dameŋko â ere faicnao Wofuŋzi Israe ŋic jaŋerao gie bame sâc hone manac embiŋ soŋaŋ i jaŋere dameŋko wâc Wofuŋ kiŋaŋ qacnehuc jumbiŋ.
32 Eme Israe ŋic jaŋe Josefere siec Aigita mâreŋkonec bawefumbiŋ i Sikem haeo Jakobozi mâreŋ dâkâne moc Sikemte mamac Hamoro ere ŋokâfâc jaŋeraonec moneŋ kâcɋene 100‐zi furine bawec ira duckembiŋ. Mâreŋ i hâcne Josefere ɋâricfâc jaŋe ro rauc embiŋ.
33 Eme Aroŋte ŋokâ Eleaʒa e wâc iŋuc jaha hâmowec. Eme jaŋe ŋokâ‐ticne Pinehasi ere hae Gibea, Eferaim tiki mâreŋko râcnembiŋ, ira duckembiŋ.