10
Nadaba â Abihu jahe bahac bâfuapic
1 Aroŋ ŋokâ jahec‐ticne Nadaba â Abihu jahe hosâc âsu ririkere ʒocrâqâc rorâ ʒoc ʒakicne â hosâc âsure wâcwiac râepic. Erâ Wofuŋzi mi mutâcne‐jacteha ere maio ʒoc furune rikepire gâpârewec. 2 Iŋuc epire Wofuŋte ʒocbâruŋzi fuarâ mai‐ticnao ʒâhâmoc‐jofawec. 3 Iŋuc fuame Mosezi Aroŋ ʒiŋuc âzâcnewec: “Wofuŋzi dâŋ ʒiŋuc muwec irec fârine fuakac hâcne: ‘Norao qohotahuc jueŋgopieŋ jaŋerao tiri juju‐nanere fuŋne bataniŋkepe ŋic ŋokac jaŋerao huriri qâreŋ‐nane fua taniŋkezejec.’ ” Iŋuc mume Aroŋ e mâc fâsâerâ domawec.
4 Eme Mose e Aroŋ wawa‐ticne Uʒiele ŋokâ jahecne Misae â Elizafaŋ jahe wira‐jacterâ ʒiŋuc jasawec: “Ŋohe âgo jahec‐ŋekic jahere qâŋɋâŋ tiri bozeonec hae râpeo reŋjofa hunic.” 5 Iŋuc mume jahe rarâ qâŋɋâŋ jahe ŋaqi‐jekiczi foŋjofarâ Mosezi mutâcne‐jactewec irec sâcko hae râpenao reŋjofa hupic. 6 Eme Mose e Aroŋ â ŋokâ jahec‐ticne Eleaʒa â Itama jaŋe ʒiŋuc jazawec: “Ŋoŋe hâmonʒipiŋte â Wofuŋzi kikefuŋ aaric mana‐jarezacte qizec susuc‐ŋeŋic behepie mi ʒorazejec â ŋaqi‐ŋeŋic wâc mi bâsuckenʒepieŋ. Qomâfâc‐ŋeŋic Israe kikefuŋ hâcne jaŋe ine Wofuŋzi manaha ʒoc fuarâ ŋic jahe ʒâseŋ‐jofawec irec ki soŋgâŋ ezo murâ enʒepieŋ. 7 Ŋoŋe Wofuŋzi wokemaŋ rua‐ŋarewecte, me hâmonʒipiŋte tutumaŋ qoruc bozere motâc beherâ mi hunʒepieŋ.” Eme Mosere dâŋ reŋkehuc iŋuc embiŋ.
Taha bapa jaŋere sâcmutâc gâcne
8 Eme Wofuŋ e Aroŋ dâŋ kecʒiŋuc muhuc âzâcnewec: 9 “Go mecne, ŋokâfâcge mecne, ŋoŋe hâmonʒipiŋte tutumaŋ qoruc bozeo raʒizo murâ waiŋ me opâ sanaŋ gâcne moc mi nânʒepieŋ; dâŋsanaŋ i mimiŋzi ɋâric bajunʒepieŋ. 10 Ŋoŋe wiac tirine â omane erâ wiac ɋaɋacne â wâwânâŋhec i ʒâŋitarâ mana wosâenʒepieŋ. 11 Ehuc noni Mose dâŋsanaŋ âzâcne mutâc epe mufua‐ŋarewec i Israe ŋic ŋokac qazu‐jare‐fârenʒepieŋ.”
12 Eme Mose e Aroŋ â ŋokâfâcne jaŋeraonec jajahec sawa jupic, Eleaʒa â Itama jaŋe ʒiŋuc jazawec: “Ŋoŋe taha bâzi Wofuŋte biŋe rikepie tiwâne foekac i wâc tirine jâmbâŋ ekacte rorâ alata heririŋko goreŋ tâmiric nânʒepieŋ. 13 I Wofuŋte biŋe rikekicnaonec go â ŋokâfâcge ŋoŋere biŋe qakicnere tiri haeo nânʒepieŋ. No iŋuc hâcne mutâcne‐narekicne. 14 Amec siecne fenʒoŋkekicne â ŋefacne bâzi rikekicne i go mecne â ŋokâfâcge mecne erâ otâfâcge jaŋehec mâmâc fic hae ɋaɋacne mocko nânʒepieŋ. Wiac i hâcne Israe ŋic ŋokac jaŋere wama bâzionec go â ŋokâfâcge ŋoŋere biŋe qakicne. 15 Ŋefacne bâzi rikeeŋgopieŋ â amec siecne fenʒoŋkeeŋgopieŋ i Wofuŋte maio fenʒoŋkehuc taha baniŋte wokemaŋ ʒocko rikeeŋgopieŋ ihec mâmâc bafisinʒepieŋ. Eme Wofuŋzi mutâcnewec irec sâcko go â ŋokâfâcge ŋoŋere biŋe erâ fohuc juzejec.”
16 Mose e iŋuc murâ sâqocne tâtâmire tahare noniŋ irec aijakic jaha mu wioc ewec. Ehuc, biac râepie ʒajec, iŋuc manarâ Aroŋ ŋokâfâcne jaŋeraonec jajahec jupic, Eleaʒa â Itama jahe aaric mana‐jactehuc ʒiŋuc jasawec: 17 “Ŋohe sâqocne tâtâmire taha i wemocte tiri haeo mi nâpirec? I wiac tirine jâmbâŋ hâcne, erâ Wofuŋte maio kikefuŋ jaŋere kiwiric rohuc kiŋjeŋic âsickenicte ŋacte taha ekicne. 18 Manakopirec, socticne i tiri boze maŋnao mi bafekicne. No mutâcne‐ŋactepo irec sâcko tiri bozeo nâpire muzac sâckezac. 19 Iŋuc mume Aroŋzi Mose ʒiŋuc âzâcnewec: Manakic, jahe miŋecgac Wofuŋte maio sâqocne tâtâmire taha â qowi bâzi‐jekic rikepirec, ehame sifu wiac hâhâwicne keci fua‐narejec. Me miŋecgac sâqocne tâtâmire taha nâpe muzac Wofuŋte maio sâckezac me?” 20 Eme Mose e dâŋ i manarâ maname fâsâewec.