1 Eme Wofuŋzi Mose â Aroŋ ʒiŋuc jasawec: 2 “Ŋohe Israe ŋic ŋokac kecʒiŋuc jazazepirec: Ŋoŋe mâreŋko qowi juraŋgopieŋ jaŋeraonec gâcne kecʒiŋuc nâcjopazo murâ nâcjopanʒepieŋ. 3 Kike râqâc‐jeŋic fâucke‐hâmokicne fuambiŋ â nânâ ŋâc hepie wefume nâeŋgopieŋ i jaŋe sâcne nâcjopaniŋmu. 4 Kike râqâc‐jeŋic fâuckekicne fuambiŋ me nânâ ŋâc hepie wefume nâeŋgopieŋ jaŋeraonec sifu kecʒiŋuc jaŋe mi nâcjopanʒepieŋ: Kamele e nânâ ŋâc heme wefume nâekac, mâc kike râqâc‐ticne mi fâuckekicnere manacnepie wâwânâŋhec ezejec. 5 Erâ qowi moc ʒâŋene roki beʒe e nânâ ŋâc heme wefume nâekac, mâc kike râqâc‐ticne mi fâuckekicnere manacnepie qowi wâwânâŋhec ezejec. 6 Me qowi moc ʒâŋene hea, e nânâ‐ticne ŋâc heme wefume nâekac, mâc kike râqâc‐ticne mi fâuckekicnere manacnepie wâwânâŋhec ezejec. 7 Erâ bec e kike râqâc‐ticne fâuckekicne, mâc nânâ nâhuc ŋâc mi heekacte manacnepie wâwânâŋhec jaha ezejec. 8 Qowi i jaŋere hâcne manapie wâwânâŋhec eha mi nâcjopanʒepieŋ â qâŋɋâŋ‐jeŋic ba bâuac wâc mi enʒepieŋ.

9 “Opâo qowi juŋgopieŋ gâcne kecʒiŋuc nâcjopazo murâ nâcjopanʒepieŋ: Hâwecko me opâo qowi dipa â garac‐jeŋichec sasawa juŋgopieŋ jaŋe sâcne nâcjopaniŋmu. 10 Qowi wiac gâcne gâcne hâwecko me opâo dipa â garac tâmiric gerec gerec bahuc juŋgopieŋ jaŋere ine manapie wiac mamakâcne ezejec. 11 Eme jaŋe mamakâcne jaha juhapie biuc‐jeŋic mi nânʒepieŋ â qâŋɋâŋ‐jeŋic honepie mamakâcne jaha ezejec. 12 Opâ qowi dipa â garac tâmiric sasawa honec‐jopapie mamakâcne efârenʒepieŋ.

13 “Wipe jaŋeraonec ine kecʒiŋuc jaŋere mamakâc‐ŋopame mi nâcjopanʒepieŋ, jaŋe wiac mamakâcne hâcne. Tucwipe, mombaŋ, keŋ, 14 bicqâreŋ, mebâroŋ â wipe iŋucne gâcne, 15 kâec kâec â wipe iŋucne gâcne, 16 qera, ŋafe wipe, kâte kaiŋɋaŋ, piʒu piʒu â wipe iŋucne gâcne, 17 bioc bioc, gararaweŋ, ɋâreŋ hâmoc, 18 mebâ, baro gâgâpâc, qeri, 19 qeʒo, baro qaŋqaŋ, bikuaŋ erâ mindi mindi.

20 “Gisic wiac fafakec‐jeŋichec â mekike‐jeŋic 4‐zi rac warec eeŋgopieŋ jaŋere manapie wiac mamakâcne jaha ezejec. 21 Mâc gisic wiac gâcne fakec‐jeŋichec â mekike‐jeŋic 4‐zi rac warec eeŋgopieŋ erâ kike‐jeŋic gâcnezi mâreŋko tara he ehuc raeŋgopieŋ jaŋe ine nâcjopazo murâ sâcne nâcjopaniŋmu. 22 Ʒiŋuc jaŋe sâcne nâcjopaniŋmu hâcne: Hâpic fuŋne fuŋne, ɋâuc bisirec fuŋne fuŋne, ɋirikiŋ fuŋne fuŋne, erâ hefuac fuŋne fuŋne. 23 Gisic wiac gâcne gâcne fakec‐jeŋichec â mekike‐jeŋic 4 jaŋere ine manapie wiac mamakâcne ezejec.

24 “Ŋoŋe qowi â gisic iŋucne nâhuc wâwânâŋhec eniŋmu hâcne; eme moc e qâŋɋâŋ‐jeŋic ba bâuac ehuc wâwânâŋhec erâ juha hae ŋafeocmu. 25 Me moc e qâŋɋâŋ‐jeŋic tofane moc rorâ baraocmu e ŋaqi‐ticne ʒurezejec, e jahacne ine wâwânâŋhec erâ juha hae ŋafeocmu. 26 Qowi kike râqâc‐jeŋic dâkâpeaŋ fâuckekicne fuambiŋ, me nânâ nâhuc ŋâc mi heeŋgopieŋ jaŋere manapie wâwânâŋhec ezejec. Irec moc e ba bâuac ejarerâ wâwânâŋhec eocmu. 27 Erâ qowi me kike tape‐jeŋic 4‐zi rac warec eeŋgopieŋ jaŋere wâc manapie wâwânâŋhec ezejec. Ehame moc e qâŋɋâŋ‐jeŋic ba bâuac ejareocmu e wâwânâŋhec erâ juha hae ŋafeocmu. 28 Me moc e qâŋɋâŋ‐jeŋic rorâ baraocmu e ŋaqi‐ticne ʒurezejec, e jahacne ine wâwânâŋhec erâ juha hae ŋafeocmu. Ŋoŋe qowi iŋucne hâcne honec‐jopapie wâwânâŋhec enʒepieŋ.

29 “Wiac kecʒiŋuc jaŋe mâreŋko guru sâko jueŋgopieŋ jaŋere wâc manapie wâwânâŋhec ezejec: Qâqâto, ʒuc, fârio fuŋne fuŋne, 30 râoŋ, gugume, rekâ, gurac erâ kambarec. 31 Qowi piic piic i jaŋere hâcne manapie wâwânâŋhec ezejec, ehame ŋic moczi qâŋɋâŋ‐jeŋic ba bâuac ehuc wâwânâŋhec erâ juha hae ŋafeocmu. 32 Me qâŋɋâŋ‐jeŋiczi wiac moc jâczi bakicne, me ŋaqi, me qowi sahac, me târu, me giere wiac i me i he heuac ejareme wâwânâŋhec eniŋmu. Irec wiac iŋucne i opâo râepie hurâ foha hae ŋafeme ɋaɋackezejec. 33 Me qowi iŋucnezi hapecko me kuʒio hume wiac maŋnao fokac izi wâwânâŋhec eme kuʒi qanʒaŋnenʒepieŋ. 34 Hapec iŋucnao opâ fokac i nânâ faio hesiepie wâwânâŋhec eocmu, me hapec irecnec opâ nâpie wâwânâŋhec jaha eocmu. 35 Me qâŋɋâŋ‐jeŋic moczi waha qahuc wiac i me i he heuac ecneme wâwânâŋhec eocmu. Irec nânâ ʒaza qânâ nombâŋ me ʒafe he heuac ejacteme hezuc hemasec ejactenʒepieŋ. Jahe wâwânâŋhec epicte honec‐jofapie wâwânâŋhec jaha ezepirec. 36 Qowi iŋucne moczi opâ ʒâŋeo me opâ nombâŋko hume opâzi sifu ɋaɋacnea foocmu; mâc qowi opâo hukicne i ŋic moczi ba bâuac ehuc wâwânâŋhec eocmu. 37 Me qowi i jaŋere qâŋɋâŋte dâkâne moczi hândâŋ titiere biŋe râekicne irec fainao ferâ heuame hândâŋ izi sifu ɋaɋacne foocmu. 38 Mâc hândâŋ i qanaŋ opâ hehapie ʒâhec qâŋɋâŋ iŋucnezi heuame ine manapie wâwânâŋhec ezejec.

39 “Qowi nâcjopaniŋte mana‐ŋarekicne jaŋeraonec moc hâmome ba bâuac ecneniŋmu ine wâwânâŋhec erâ juhapie hae ŋafezejec. 40 Me ŋic moc e qowi hâmocne i nâocmu e ŋaqi‐ticne ʒurerâ wâwânâŋhec erâ juha hae ŋafezejec. Me moc e qowi hâmokicne rorâ baraocmu e wâc iŋuc jaha ŋaqi‐ticne ʒurerâ e jahacne wâwânâŋhec erâ juhame hae ŋafezejec.

41 “Gisic wiac piic piic mâreŋko gerec gerec bahuc jueŋgopieŋ jaŋe wiac mamakâcne eŋgopieŋte mi nâcjopanʒepieŋ. 42 Qowi wiac foforâ jueŋgopieŋ me mekike‐jeŋiczi babarâ raeŋgopieŋ me mekike‐jeŋic bocjaha, erâ wiac sasawa mâreŋ faio gerec gerec bahuc jueŋgopieŋ jaŋe wiac mamakâcne eŋgopieŋte mi nâcjopanʒepieŋ. 43 Ŋoŋe wiac gerec gerec bahuc jueŋgopieŋ jaŋe ba bâuac ejarehuc mi makârenʒepieŋ, ŋoŋe juju‐ŋeŋic hegâpârenʒipiŋte wiac i ba bâuac ejarehuc wâwânâŋhec mi enʒepieŋ. 44 No Wofuŋ Anutu‐ŋeŋic jukopac hâcne, no tiri jukopacte ŋoŋe juju‐ŋeŋic bâtirihuc tiri jaha junʒepieŋ. Ŋoŋe mâreŋko wiac gerec gerec bahuc jueŋgopieŋ jaŋe ba bâuac ejarehuc wâwânâŋhec mi enʒepieŋ. 45 No Wofuŋ‐ŋeŋiczi Anutu‐ŋeŋic jupemurâ Aigita mâreŋkonec jowac‐ŋopa wefupo, irec no tiri jukopacte ŋoŋe tiri jaha erâ junʒepieŋ.”

46 Dâŋ ʒizi wipe qowi â wiac jujune sasawa opâo me mâreŋko gerec gerec bahuc jueŋgopieŋ jaŋere sâcmutâc. 47 Ŋoŋe wiac wâwânâŋhec â ɋaɋacne me qowi gâcne nâniŋte me mi nâniŋte muŋarekicne i ʒâŋitarâ mana wosâec‐jopaniŋte dâŋ i hâcne râe‐ŋarekicne.