1 Wofuŋzi Mose kecʒiŋuc âzâcnewec: 2 “Go Israe ŋic ʒiŋuc jazazemec: Ŋic moc e Wofuŋte maio mumupaŋ‐ticnere fârine e jahacne me ŋic mocte okacne moneŋ râezo murâ ine irec sâcmutâc kecʒiŋuc forakac irec sâcko râezejec: 3 Ŋic jara‐ticne 20‐onec 60‐o tarakac jaŋere erâ siliwa moneŋ 50 râezo, ine furufic moneŋte hawari mukicne irec sâc. 4 Me mumupaŋ izi ŋokac mocte manasuhuc mukicnao ine siliwa moneŋ 30 râezo. 5 Me ŋic ŋokac jara‐jeŋic 5‐konec 20‐o taraocmuo ine ŋicte okacne siliwa moneŋ 20 â ŋokacte okacne moneŋ 10 râezo. 6 Me ŋic ŋokac jara dameŋ‐jeŋic mosa wâŋkonec raku jara 5‐ko fisiocmuo ine ŋicte okacne siliwa moneŋ 5 â ŋokacte okacne moneŋ 3 râezo. 7 Me ŋic ŋokac jara dameŋ‐jeŋic 60 me jara 60 jâururâ feocmuo ine ŋicte okacne siliwa moneŋ 15 â ŋokacte okacne moneŋ 10 râezo. 8 Me ŋic e hapetac juhuc moneŋ mukicne i râezo eipieocmuo ine taha baparao jowa rapie eki ŋic fuŋne‐ticne mana tarazejec. Ehuc ŋic e moneŋ wezimuc sâcne râeocmu i mana tarahuc irec sâc râeocte mucnezejec.

9 “Me qowi Wofuŋ taha rikecneeŋgopieŋ qowi iŋucne moc Wofuŋte biŋe qambiŋko ine manapie tirine ezejec. 10 Ŋic moc e qowi iŋucne mocwâc bârârierâ âkehoc‐ticne moc rârâe i mi ezejec, e qowi biaŋnere okacne sâqocne mi râezejec â qowi sâqocnere okacne biaŋne wâc mi râezejec. Me sifu âkehoc‐ticne râezo mume ine qowi mârâc râekicne â âkehoc‐ticne ʒâhec râekicne jahe mâmâc jaha Wofuŋte biŋe ezepirec. 11 Me ŋic moczi qowi wâwânâŋhec Wofuŋ mi rikecneeŋgopieŋ iŋucne moc râezo murâ ine qanaŋ taha baparao barazejec. 12 Eme taha bapa eki, qowi biaŋne me sâqocne irec dâŋ mutarame manapie sâckezejec. 13 Me ŋic e qowire okacne moneŋ râezo murâ ine furine mukicne irec sâc erâ 5‐konec wâŋ ʒuhuckerâ râezejec.

14 “Me ŋic moc e ficticne Wofuŋte biŋe qaocmuo ine taha bapazi fic i biaŋne me sâqocne irec fuŋne hone manac ehuc furine muzejec, eme dâŋ muocmu irec manapie sâckezejec. 15 Me ŋic e ficticne Wofuŋte biŋe qawec i mocwâc e jahacne biŋe eocte manasurâ ine furine mukicne irec sâc erâ 5‐konec wâŋ ʒuhuckerâ râeme e jahacne biŋe ezejec.

16 “Ŋic moc e mamac ŋosafâc‐ticne jaŋere merâfâc mâreŋ bajukac irec dâkâne moc Wofuŋte biŋe qaocmuo ine mâreŋ ira wiac ukicne pake wezimuc râeniŋmu izi furire sâc mufuazejec, padi ukicne pake wâŋ irec furine siliwa moneŋ 50 ezejec. 17 Ŋic e mâreŋ‐ticne sabata jara hombaŋko Wofuŋte biŋe qaocmuo ine furine mukicne i furu jaha rozejec. 18 Me ŋic e mâreŋ‐ticne sabata jara hombaŋ faicnao sawa Wofuŋte biŋe qaocmuo ine irecnec fuŋkerâ wose rakupie sabata jara hombaŋ moc maickeocmu dameŋ ŋondeŋ ira jara wezimuc foocmu irec sâc manahuc furine bawahanʒepieŋ. 19 Me mâreŋ‐ticne Wofuŋte biŋe qaocmu i mocwâc furine bazo murâ ine mâreŋte furi mukicne irec sâc erâ 5‐konec wâŋ ʒuhuckerâ râeme e jahacne biŋe fozejec. 20 Me mocwâc furine bazo mi ecneocmuo me moneŋte erâ ŋic moc mutaracneocmuo ine furi bapare sâc mocwâc mi eocmu. 21 Aricne, mâreŋ i sabata jara hombaŋko behepie Wofuŋte biŋe tirine eha taha bapazi rauckezejec. 22 Me ŋic moc e merâfâc mâreŋ mâcne, mâreŋ furune moc furine bakicne i Wofuŋte biŋe qaocmuo 23 ine taha bapazi mâreŋ Wofuŋte biŋe qakicne dameŋ ira fuŋkerâ wose rakume sabata jara hombaŋ maickeha jara wezimuc eocmu irec sâc ʒoaŋ ijaha furine râeme Wofuŋte taha tirine ezejec. 24 Sabata jara hombaŋko ira ine mâreŋ i mocwâc mârâc rune ere biŋe ezejec, mamac ŋosafâc‐ticne jaŋere meonec rorâ bajuwec erao hâcne risiezejec. 25 Furine sasawa ine furufic moneŋte hawari fokac irec sâc efârezejec. Gera moneŋ 20 izi siliwa moneŋ wâŋ irec sâc ezejec.

26 “Qowi mârâc fufua i biac Wofuŋte biŋe ekacte ŋiczi Wofuŋte biŋe mocwâc mi qanʒepieŋ; bulimakao me lama, qowi iŋucne i Wofuŋte biŋe mukicne hâcne. 27 Me qowi iŋucnezi sahac fâsâc mi fuawecko ine runezi furine mukicne irec sâc erâ 5‐konec wâŋ ʒuhuckerâ râeme e jahacne biŋe ezejec. Me eki furine mi baocmuo ine ŋic moczi furine mukicne irec sâc sawa râeme ere ezejec.

28 “Ŋic moc e ŋic me qowi me hae mâreŋ wiac sipirickeocte mukicne i Wofuŋte biŋe qame ŋic moczi irecnec furine mi bazejec. Wiac sisipiricte biŋe mukicne sasawa i Wofuŋzi honeme tirine jâmbâŋ ekac. 29 Ehame ŋic moc sisipiricte biŋe râembiŋko moczi furine moc mi bazejec, e hâmocte biŋe ekac hâcne.

30 “Mâreŋkonec wiac sasawa, wiac ukicne me jâchândâŋ, irecnec hâcne teŋkonec wâŋ i Wofuŋte biŋe, eki honeme tirine ekac. 31 Wiac teŋkonec wâŋ râezo mukicne irec okacne ŋic moczi moneŋ râezo murâ ine furine mukicne irec sâc erâ 5‐konec wâŋ ʒuhuckerâ râezejec. 32 Erâ lama bulimakao â qowi sasawa soŋaŋ‐jeŋic jâuruhuc rahapie gunu‐ticnezi wose qârâwiŋ ejarehuc teŋkonec wâŋ bâtirieocmu i Wofuŋzi honeme tirine eocmu. 33 Ehame ŋic moczi, qowi i biaŋne me sâqocne, iŋuc mu wioc ehuc okacne mi râezejec. Me sifu râeocmuo ine qowi qanaŋ bâwosâekicne i mecne erâ okacne râekicne i mecne mâmâc jaha râec‐jofame tirine ezepirec, jahe furi bapare sâc mi ekopirec.”

34 Sâcmutâc dâŋ i hâcne Wofuŋzi Israe ŋic jaŋere biŋe Sinai tikio Mose râcnewec.