ƷARE BIRI
Papia qizec irec maŋnao taha bapare sâcmutâc gâcne ʒuhuckerâ râekicne. Erâ Israe ŋic jaŋe Sinai tikionec faharerâ mâreŋ tuhuo rahuc juhapie jara 40 tarawec, dameŋ irec maŋnao wiac fua rawec irec binaŋ sasawa forakac. Erâ moc ine Mosezi Sinai tikio mecne, erâ juku ʒâhec Moabi mâreŋko fisipie Israe ŋic dâkâne dâkâne wosec‐jopahuc ʒare‐jeŋic qâreŋkewec, ʒare biri i mâmâc râekicne fokac. Irec hâcne papia ʒâŋene ƷARE BIRI mukicne.
Mose e Anuture kiŋaŋŋic biaŋnezi ŋicgurufâc‐ticne jaŋe wiac ŋemâcne fuŋne fuŋne fua‐jareme hehesic bocjaha bâfuapie Anuture maio sacfozic ejarehuc jaŋere erâ numuhuc juha Anutuzi buuruc‐ticnere erâ ŋezic‐jopahuc hone maiŋ ejare jujec, irec binaŋ bakicne fokac hâcne.
Papia irec dâkâne sâko jahec â moc fokac.
Dâkâne 1:
Ʒar 1:1Ʒar 10:10. Gaŋ wiac irec maŋnao Israe ŋic jaŋe Sinai tikionec faharerâ raniŋte ʒaʒawie gie bambiŋ irec binaŋ bakicne fokac.
Dâkâne 2:
Ʒar 10:11—Ʒar 21. Ira ine Sinai tikionec fuŋkerâ rahuc juku Jordaŋ opâ ocniŋucnao Moabi mâreŋko fisimbiŋ irec dâŋ binaŋ ehuc qâreŋkekicne.
Dâkâne 3:
Ʒar 22—36. Gaŋ wiac irec maŋnao ine Moabi mâreŋko juhapie wemo wiac mo fua‐jarewec irec binaŋ mecne, erâ qaŋgec bapa Bileam ere binaŋ i mâmâc râekicne fokac.
1
Israe ŋic Sinai tiki mâreŋko wose qâreŋ ejarekicne
Israe ŋic jaŋe Aigita mâreŋkonec waharâ juhapie jara 2 irec mosa 2 â irec ʒoaŋ gie bapa 1 eha Wofuŋzi Sinai mâreŋ burocnao tutumaŋte qoruc bozeo Mose dâŋ kecʒiŋuc âzâcnewec: “Ŋoŋe Israe kikefuŋ sasawa wose qâreŋ ejarenʒepieŋ, ehuc fic sâc â guru sâc mamacfâc‐jeŋic jaŋere ʒâŋe biri forakac irec sâcko ŋic sasawa jaŋere ʒâŋe ronʒepieŋ. Aroŋhec ŋohe Israe ŋic jara‐jeŋic 20‐o domarâ fekac, ʒikao rarare sâc eŋgopieŋ jaŋere ʒare rofârezepirec. Ehame guru sâc irecnec micne bapa ŋoherao ʒuhuckenʒepieŋ. Ine ŋic kecʒiŋuc jaŋe hâcne ŋohehec ranʒepieŋ: Rubeŋ guruonec Sedeure ŋokâ Elizuru, Simeoŋ guruonec Zurisadaire ŋokâ Selunie, Juda guruonec Aminadare ŋokâ Nasoŋ, Isasare guruonec Zuarare ŋokâ Netanele, Sebuloŋte guruonec Heloŋte ŋokâ Eliaba, 10 Josefere ŋokâ Eferaim guruonec Amihudure ŋokâ Elisama, â Manase guruonec Pedazure ŋokâ Gamalie, 11 Benjamiŋte guruonec Gideonire ŋokâ Abidaŋ, 12 Daŋte guruonec Amisadaire ŋokâ Ahieʒe, 13 Ase guruonec Okoraŋte ŋokâ Pagiele, 14 Gadere guruonec Reguelere ŋokâ Elisafa, 15 Naftali guruonec Enaŋte ŋokâ Ahira.” 16 Ŋic i jaŋe hâcne kikefuŋkonec rowosâec‐jopakicne, jaŋe mamac ŋosafâc‐jeŋic jaŋere ɋâricfâc jaŋeraonec micne â Israe ŋic gurune gurune jaŋere fekicnefâc.
17 Eme Mose â Aroŋ jahe ŋic ʒâŋe‐jeŋic mukicne jaŋe rocjopapic. 18 Eme jaŋe mosa 2 irec ʒoaŋ gie bapa 1 ira kikefuŋ sasawa hetumaŋ‐jopambiŋ. Ehuc fic sâc â mamacfâc‐jeŋic jaŋere ʒâŋe biri forawec irec sâcko ŋic sasawa jara‐jeŋic 20‐o domarâ fekac jaŋe wose qâreŋ ejarembiŋ. 19 Wofuŋzi Mose mutâcnecnewec irec sâcko ehuc Sinai mâreŋ burocnao ʒare‐jeŋic rofârewec hâcne.
20 Israe mârâc motec‐ticne Rubeŋ, ere ɋâricfâc jaŋe fic sâc erâ mamacfâc‐jeŋic jaŋere ʒâŋe biri forawec irec sâcko wose qâreŋ ejarembiŋ. Ehuc ŋic sasawa jara‐jeŋic 20‐o domarâ fekac, erâ ʒikao rarare sâc embiŋ, 21 jaŋere ʒâŋe muhuc wosec‐jopakupie Rubeŋ guru ʒare‐jeŋic 46 tauseŋ 500 fuawec.
22 Simeoŋte ɋâricfâc jaŋe fic sâc erâ mamacfâc‐jeŋic jaŋere ʒâŋe biri forawec irec sâcko wose qâreŋ ejarembiŋ. Ehuc ŋic sasawa jara‐jeŋic 20‐o domarâ fekac, erâ ʒikao rarare sâc embiŋ 23 jaŋere ʒâŋe muhuc wosec‐jopakupie Simeoŋ guru ʒare‐jeŋic 59 tauseŋ 300 fuawec.
24 Gadere ɋâricfâc jaŋe fic sâc erâ mamacfâc‐jeŋic jaŋere ʒâŋe biri forawec irec sâcko wose qâreŋ ejarembiŋ. Ehuc ŋic sasawa jara‐jeŋic 20‐o domarâ fekac, erâ ʒikao rarare sâc embiŋ 25 jaŋere ʒâŋe muhuc wosec‐jopakupie Gadere guru ʒare‐jeŋic 45 tauseŋ 650 fuawec.
26 Judare ɋâricfâc jaŋe fic sâc erâ mamacfâc‐jeŋic jaŋere ʒâŋe biri forawec irec sâcko wose qâreŋ ejarembiŋ. Ehuc ŋic sasawa jara‐jeŋic 20‐o domarâ fekac, erâ ʒikao rarare sâc embiŋ 27 jaŋere ʒâŋe muhuc wosec‐jopakupie Juda guru ʒare‐jeŋic 74 tauseŋ 600 fuawec.
28 Isasa ere ɋâricfâc jaŋe fic sâc erâ mamacfâc‐jeŋic jaŋere ʒâŋe biri forawec irec sâcko wose qâreŋ ejarembiŋ. Ehuc ŋic sasawa jara‐jeŋic 20‐o domarâ fekac, erâ ʒikao rarare sâc embiŋ 29 jaŋere ʒâŋe muhuc wosec‐jopakupie Isasa guru ʒare‐jeŋic 54 tauseŋ 400 fuawec.
30 Sebuloŋte ɋâricfâc jaŋe fic sâc erâ mamacfâc‐jeŋic jaŋere ʒâŋe biri forawec irec sâcko wose qâreŋ ejarembiŋ. Ehuc ŋic sasawa jara‐jeŋic 20‐o domarâ fekac, erâ ʒikao rarare sâc embiŋ 31 jaŋere ʒâŋe muhuc wosec‐jopakupie Sebuloŋ guru ʒare‐jeŋic 57 tauseŋ 400 fuawec.
32 Josefere ɋâricfâc, Eferaimte ŋicguru hâcne, jaŋe fic sâc erâ mamacfâc‐jeŋic jaŋere ʒâŋe biri forawec irec sâcko wose qâreŋ ejarembiŋ. Ehuc ŋic sasawa jara‐jeŋic 20‐o domarâ fekac, erâ ʒikao rarare sâc embiŋ 33 jaŋere ʒâŋe muhuc wosec‐jopakupie Eferaim guru ʒare‐jeŋic 40 tauseŋ 400 fuawec.
34 Manasere ɋâricfâc jaŋe fic sâc erâ mamacfâc‐jeŋic jaŋere ʒâŋe biri forawec irec sâcko wose qâreŋ ejarembiŋ. Ehuc ŋic sasawa jara‐jeŋic 20‐o domarâ fekac, erâ ʒikao rarare sâc embiŋ 35 jaŋere ʒâŋe muhuc wosec‐jopakupie Manase guru ʒare‐jeŋic 32 tauseŋ 200 fuawec.
36 Benjamiŋte ɋâricfâc jaŋe fic sâc erâ mamacfâc‐jeŋic jaŋere ʒâŋe biri forawec irec sâcko wose qâreŋ ejarembiŋ. Ehuc ŋic sasawa jara‐jeŋic 20‐o domarâ fekac, erâ ʒikao rarare sâc embiŋ 37 jaŋere ʒâŋe muhuc wosec‐jopakupie Benjamiŋ guru ʒare‐jeŋic 35 tauseŋ 400 fuawec.
38 Daŋte ɋâricfâc jaŋe fic sâc erâ mamacfâc‐jeŋic jaŋere ʒâŋe biri forawec irec sâcko wose qâreŋ ejarembiŋ. Ehuc ŋic sasawa jara‐jeŋic 20‐o domarâ fekac, erâ ʒikao rarare sâc embiŋ 39 jaŋere ʒâŋe muhuc wosec‐jopakupie Daŋ guru ʒare‐jeŋic 62 tauseŋ 700 fuawec.
40 Asere ɋâricfâc jaŋe fic sâc erâ mamacfâc‐jeŋic jaŋere ʒâŋe biri forawec irec sâcko wose qâreŋ ejarembiŋ. Ehuc ŋic sasawa jara‐jeŋic 20‐o domarâ fekac, erâ ʒikao rarare sâc embiŋ 41 jaŋere ʒâŋe muhuc wosec‐jopakupie Ase guru ʒare‐jeŋic 41 tauseŋ 500 fuawec.
42 Naftalire ɋâricfâc jaŋe fic sâc erâ mamacfâc‐jeŋic jaŋere ʒâŋe biri forawec irec sâcko wose qâreŋ ejarembiŋ. Ehuc ŋic sasawa jara‐jeŋic 20‐o domarâ fekac, erâ ʒikao rarare sâc embiŋ 43 jaŋere ʒâŋe muhuc wosec‐jopakupie Naftali guru ʒare‐jeŋic 53 tauseŋ 400 fuawec.
44 Ŋic guru i jaŋe hâcne wose qâreŋ ejarekicne. Mose â Aroŋ erâ Israe ŋic micne 12 jaŋe wose qâreŋ gie i bambiŋ. Ŋic 12 i jaŋe ine Israe guru sâc â ficjeŋic sâc irec micne erâ jumbiŋ. 45 Jaŋe mamacfâc‐jeŋic jaŋere ʒâŋe biri forawec irec sâcko Israe ŋic sasawa jara‐jeŋic 20‐o domarâ fekac, erâ ʒikao rarare sâc embiŋ 46 jaŋere ʒare qâhâckekupie 603 tauseŋ 550 ewec.
Lewiŋic jaŋe tiri bozere soŋaŋ râec‐jopakicne
47 Lewi guru jaŋe ine mamacfâc‐jeŋic jaŋere ʒâŋe biri foipieha wose qâreŋ mi ejarekicne. 48 Wofuŋzi Mose kecʒiŋuc âzâcnewec: 49 “Ŋoŋe Lewi guru jaŋe mi wosec‐jopanʒepieŋ, â Israe ŋic gâcne jaŋerao ʒuhuc‐joparâ wose qâreŋ wâc mi ejarenʒepieŋ. 50 Jaŋe ine tiri boze â wâcwiac‐ticne sasawa irec soŋaŋ âkendâŋ‐jopanʒepieŋ. Jaŋe tiri boze â wâcwiac‐ticne sasawa reŋkenʒepieŋ, erâ kiŋaŋ‐ticne qahuc râreckerâ ficboze erâ ŋenʒepieŋ. 51 Izi ʒuhuckerâ raniŋte manasuhuc Lewiŋic jaŋe tiri bozere wiac qâzuckerâ reŋke ranʒepieŋ, me ŋemanahuc tiri boze mocwâc fârenʒepieŋ. Ehame ŋic omane moczi tiri bozere maŋfuŋko fisime qâhâmonʒepieŋ. 52 Israe ŋic gâcne jaŋe ine guru‐jeŋic â maqâreŋ‐jeŋic sâc qoruc boze‐jeŋic fârenʒepieŋ. 53 Anuture kimbeŋzi Israe kikefuŋ jaŋere faio fezacte Lewiŋic jaŋe tiri boze râreckehuc ŋec foc enʒepieŋ. Lewiŋic jaŋe hâcne tiri boze soŋaŋkehuc irec kiŋaŋ qaqa gie banʒepieŋ.” 54 Eme Israe ŋic jaŋe iŋuc ehuc Wofuŋzi Mose dâŋ mutâcnecnewec irec sâcko efârembiŋ hâcne.