5
1 Ʒi ine râec‐nâpohuc sac bambiŋ i somâc‐nâpokicne hâcne,
jaŋe Israe guriŋ bapa ŋicticne kâcbiŋzi mainao qaŋgopieŋ.
Guriŋ bapa ŋic moc Betelehem haeo fuaocmu
2 O Betelehem Efarata, go Judare hae wawahane,
gorao hâcne micne sâko moc fuarâ
Israe ŋicfâc‐nane gume jowac ejarezokac.
E fuŋne‐ticne mârâc sasac jaha fuarâ fowec.
3 Irec Wofuŋzi behec‐joparâ juhame
ŋokac moc motec roocte mukicne
ere dameŋ maickeocmu.
Eme dameŋ ira hâcne qomâfâc‐ticne nâfocne
jaŋe Israe kikefuŋ jaŋerao risieniŋmu.
4 Eme e qiŋ herâ domahuc lamafâc‐ticne Wofuŋte tâpirio,
â Wofuŋ Anutu‐ticnere ʒâŋezi batamaehame
hone soŋaŋ ejareocmu.
Eme jaŋe hâhâwic tâmiric juhapie
ʒâŋe biŋe‐ticnezi haŋ barâ raku mâreŋ qaŋeŋnao fisizejec.
5 Ehame eki wama bâfua‐nâreocmu.
Asiria ŋic jaŋe ware fisirâ mâreŋ‐nâŋecko âtepie
nâŋe soŋaŋ â ŋic fekicne bocjaha âkendâŋ‐jopapene râsi ejareniŋmu.
6 Erâ ʒikahec domahuc Asiria mâreŋ soŋaŋkenʒepieŋ,
i Nimorodi mâreŋko hâcne ʒikahec jaha domahuc
guriŋ bapa gie banʒepieŋ.
Asiria ŋic jaŋe mâreŋ‐nâŋecko fisirâ rocnâpopie
mejeŋickonec batarac‐nâponiŋmu hâcne.
7 Eme Jakobore ŋic ʒanʒaŋne jaŋe ŋicguru bocjaha
jaŋere ŋondeŋko Wofuŋtaonec titikuc iŋucne erâ juniŋmu,
me hoezi kecɋaŋ bâgunuckeekac irec sâc;
hoe titikuc e ŋicte woŋec mi foekac,
erâ ŋic jaŋerao ʒâŋe mi fiekac.
8 Laioŋzi kâte qowi gâcne jaŋere ŋondeŋko juekac,
erâ laioŋ motec ɋârizi lama guruo raʒihuc
lama bomac‐joparâ kisuc qâsuc‐jopahame
moczi sâcne mi batarac‐jopaocmu,
irec sâc Jakobore ŋic ʒanʒaŋne jaŋe ŋicne ŋicne,
â ŋicguru bocjaha jaŋere ŋondeŋko juniŋmu.
9 Ŋoŋe qacbochec erâ fific guguriŋfâc‐ŋeŋic sanaŋke‐jarenʒepieŋ,
ehuc râsifâc‐ŋeŋic bâsirowec‐jopa‐fârenʒepieŋ.
10 Wofuŋzi kecʒiŋuc mukac:
No dameŋ ira becâsicfâc‐ŋeŋic juŋgopieŋ
i bâsirowec‐jopapemu,
â keretac wiac‐ŋeŋic i ima bapemu.
11 Mâreŋ‐ŋeŋicko hae wiac ŋerakac i ima bapemu,
â ficsanaŋ wiac‐ŋeŋic sasawa i heroc qâropie‐fârepemu.
12 Meŋeŋiczi qaŋgec wiac bajueŋgopieŋ
i qape arictac eha
faŋfaŋdâŋ mumuŋic mocwâc mi juŋarenʒepieŋ.
13 Ɋâŋ qâqâtâc â nemure qânâ wâtuŋ wiac
ŋoŋerao doma rakac i henʒaŋ qanʒaŋnepemu,
eme ŋoŋe ŋaŋacne meqâreŋ wiac
i mocwâc mi fodape‐jarenʒepieŋ.
14 Ŋoŋerao Asera nemu ere ɋâŋwâtuŋ doma rakac
i qârândiŋkerâ hae wiac‐ŋeŋic ima bapemu.
15 Ŋicne ŋicne micrereŋ tâmiric jumbiŋ
jaŋe kimbeŋ aaric mana‐jarehuc okacne bazu‐jarepemu.