6
Wofuŋzi Israe ŋic dâŋko râec‐jopakac
1 Wofuŋzi dâŋ mukac i mananiŋ:
Ajoc, faharerâ tiki maic‐jopahuc dâŋgie baniŋ,
eme mâreŋ facne facne jaŋe dâŋmarac‐ŋeŋic mananiŋ!
2 Wofuŋ e dâŋgie baocmu i tiki ŋoŋe mananiŋ,
â mâreŋte hobeteŋ go irec hazec râec;
Wofuŋ e Israe ŋicfâc‐ticne jaŋehec
dâŋgie bahuc dâŋjeŋic mutaraocmu.
3 “O ŋicfâc‐nane, no wemo eŋarepo?
Weniŋuc eŋarepe tatakic bâfuambiŋ?
Irec mupie manape!
4 No Aigita mâreŋkonec jowac‐ŋopa warehuc
niŋgiŋkonec batarac‐ŋopapo hâcne.
No Mose â Aroŋ erâ Miriam jaŋe ejarepe
micne baŋarembiŋ.
5 O ŋicfâc‐nane, ŋoŋe Moabi ŋicwofuŋ Balakezi dâŋ manasu biric ehame
Beoro ŋokâ‐ticne Bileam eki okacne weniŋuc âzâcnewec i manasuniŋ.
Erâ Sitim haeonec Giligali haeo rahapie wiac fuawec
irec mâmâc manasurâ Wofuŋ eehâmo‐nanere fuŋne mana taranʒepieŋ.”
Wofuŋzi taha wenimoirec maname fârine eocmu
6 “No wemo wiac moc ameckehuc Wofuŋte maio fuarâ
Anutu Femicne dapecnezepac?
Qowi bâzi ririkene me bulimakao motec ɋâri
amec‐joparâ sâcne fuacnepemu me?
7 Wofuŋ e lama ŋicne wâŋ tauseŋ irec moc aŋackeocmu,
me opâ sâko teŋ tauseŋ irec sâc wokemaŋ opâ râcnepe maname biaŋkeocmu?
Me qaqatara‐nanere mârâc motec‐nane tahackepe sâckeocmu?
Soc biuc‐nanere fârine hâcne râcnepe
sâqocne hurepo i omaeocmu me?”
8 O mâreŋŋic, go weniŋuc jutec biaŋkeocmu
i gaza gowatuc ekicne;
go wiac tiŋne ebac ehuc maŋjauŋhec erâ
Anutugere maio maŋhuhuŋ jucmurâ
Wofuŋzi mugareekac hâcne.
9 Wofuŋ araŋ bacnepene biaŋkeekac.
Wofuŋte dâŋzi hae sâkoo ʒiŋuc fuakac:
“Mafa â haeru tumaŋneŋgopieŋ
ŋoŋe hazec râeniŋ!
10 Boreŋ ʒeŋaŋ kâŋgâc jowac rokicne,
me sigeli bâbâsifuc repicne
ŋic sindaŋne jaŋere ficko domakac jaha,
no irec moc nikecnuocmu me?
11 Me ŋic moc e sigeli â ŋemâc‐ticne bâsifuckerâ bajuekac,
ere manape kiŋfâsâc jukac eocmu me?
12 Hae ira moneŋ mafahec jueŋgopieŋ
jaŋe wiac repicne ebac eeŋgopieŋ,
â ŋecjucfâc‐ticne jaŋe burecdâŋ eeŋgopieŋ,
erâ nameŋ‐jeŋiczi eatuc gie baekac.
13 No irec hâcne fuŋkerâ kiŋgere erâ ima bacgupe
niniŋ siarereŋ fuarâ fozemec.
14 Ehuc nânâ nâtec sifu mi gapecguzejec,
â nânâre hâhâmo i gorao mi omaezejec.
Me wiac moc bârârierâ soŋketec sifu mi fogarezejec,
me moc fogareocmuo ine mupe ʒikare biŋe ezejec.
15 Go wiac hândâŋne gieo tietec
fârine fuame qa roro mi ezemec;
go oliwa hândâŋne âte pisickerâ
gahacne wokemaŋ opâne mi ruazemec,
go waiŋ hândâŋne âte pisickerâ opâne wâc mi nâzemec.
16 Ŋoŋe ŋicwofuŋ Omiri ere dâŋsanaŋ mana rereŋ embiŋ,
â Ahabare kikefuŋ jaŋere eebapa bâjâpembiŋ,
ehuc mamana biri‐jeŋicte sâcko jumbiŋ.
Eme no irec hâcne hae‐ŋeŋic ima bapemu,
â hae rune ŋoŋere mupe mu ruruc eŋarenʒepieŋ,
erâ ŋicne ŋicne jaŋe musoriŋ‐ŋopanʒepieŋ.”