4
Lewiŋic jaŋe giedâŋ mujarekicne
1 Wofuŋ e Mose â Aroŋ dâŋ kecʒiŋuc jasawec: 2 “Ŋohe Lewiŋic jaŋere guruonec Kohatire ɋâricfâc jaŋe fic sâc â mamacfâc‐jeŋic jaŋere ʒâŋe biri forakac irec sâc wose qâreŋ ejarezepirec. 3 Jara‐jeŋic 30‐o domarâ feku 50‐o tarakac â tutumaŋte qoruc boze maŋko kiŋaŋ gie bapare sâc eŋgopieŋ ŋic i jaŋe hâcne wose qâreŋ ejarezepirec. 4 Kohatire ɋâricfâc jaŋe tutumaŋte qoruc bozeo tiri gie kecʒiŋuc banʒepieŋ: 5 Israe ŋic jaŋe ŋec foc embiŋkonec faharerâ razo ehapie Aroŋ â ŋokâfâcne jaŋe tutumaŋ qoruc bozeo ferâ qoruc ââketâc tiri bozeo domakac i batararâ izi qorac tapa katapa qofackenʒepieŋ. 6 Irec fainao ine noniŋ sahac râerâ qoruc keŋkeŋnezi foŋkenʒepieŋ, ehuc reŋ wiac‐ticne esorienʒepieŋ. 7 Poroŋ furu mukicne irec teboo ine qoruc keŋkeŋne jaha râehuc fainao tela â hosâc âsure râqâc wiac erâ waiŋzi taha bâzi irec tase wiac hepie ŋerazejec; ehame poroŋ râepie ŋeekac i mâmâc râenʒepieŋ. 8 Izi ine wiac sasawa qoruc bâbâroŋzi qofacke‐fârerâ fainao noniŋ sahac râepie fohame reŋ wiac esorienʒepieŋ. 9 Iŋuc erâ qoruc keŋkeŋne moc rorâ lambe dodoma lambe‐ticnehec erâ qoruc bâbâtâc fitac â râqâc erâ wokemaŋ kiruŋ sasawa râekicne i sâocke‐fârenʒepieŋ. 10 Ehuc lambe dodoma â wâcwiac‐ticne sasawa i noniŋ sahaczi foŋke‐fârerâ reŋ faio râenʒepieŋ. 11 Erâ alata golzi bakicne i iŋuc jaha qoruc keŋkeŋne â noniŋ sahaczi qofackerâ reŋticne esorienʒepieŋ. 12 Ehuc taha giere râqâc wiac sasawa furufic maŋko bajueŋgopieŋ i wâc qoruc keŋkeŋne â noniŋ sahaczi foŋkerâ reŋ faio râerâ basanaŋkenʒepieŋ. 13 Izi ine bâzi ririke alata irec ʒafe hezurâ qoruc bâbâroŋzi behepie qomackezejec. 14 Erâ irec fainao alatare wâcwiac kecʒiŋuc taha giere bajueŋgopieŋ i râenʒepieŋ: Ʒocrâqâc, sarac â sapac erâ râqâc, alatare wâcwiac sasawa i hâcne râe‐fârerâ noniŋ sahaczi qofackerâ reŋ wiac‐ticne esorie‐fârenʒepieŋ. 15 Eme Aroŋ â ŋokâfâcne jaŋe furufic â irec wâcwiac sasawa qofacke‐fârepie tarame ŋic jaŋe raniŋte ʒawiehuc Kohatire ɋâricfâc jaŋe wiac i reŋkeniŋte afeckenʒepieŋ. Erâ hâmonʒipiŋte ine wiac tirine i ba bâuac moc mi enʒepieŋ. Kohatire ɋâricfâc jaŋe tutumaŋ qoruc bozere wiac i hâcne reŋkeniŋte mujarekicne.
16 “Eme taha bapa Aroŋ ere ŋokâ Eleaʒa eki wiac kecʒiŋuc soŋaŋkehuc juzejec: Lambe wokemaŋ, hosâc âsu biaŋ irec wiac, taha bâzi râehuc jueŋgopieŋ erâ rurua wokemaŋ. Ehuc tiri boze â irec maŋnao wiac fofârekac erâ furufic â wâcwiac‐ticne sasawa i mâmâc soŋaŋkehuc juzejec.”
17 Wofuŋzi Mose â Aroŋ dâŋ kecʒiŋuc jasawec: 18 “Kohatire ɋâricfâc jaŋe Lewiŋic jaŋere ŋondeŋko juhuc hâmo sipiric mi enʒepieŋ. 19 Irec jaŋe wiac tirine i maickerâ hâmonʒipiŋte kecʒiŋuc ejarenʒepieŋ: Aroŋ â ŋokâfâcne jaŋe furufic maŋko raʒirâ Kohatire ŋicfâc jaŋe ru sâc giedâŋ mujarenʒepieŋ. 20 Jaŋe jaŋacne ine hâmonʒipiŋte wiac tirine i honeniŋte maŋnao moc mi raʒinʒepieŋ.”
21 Wofuŋzi Mose kecʒiŋuc âzâcnewec: 22 “Go Geresoŋte ɋâricfâc jaŋe fic sâc â mamacfâc‐jeŋic jaŋere ʒâŋe biri forakac irec sâc wose qâreŋ ejarezemec. 23 Jara‐jeŋic 30‐o domarâ feku 50‐o tarakac, â tutumaŋ qoruc boze maŋko kiŋaŋ gie bapare sâc eŋgopieŋ, ŋic i jaŋe hâcne wose qâreŋ ejarezemec. 24 Eme Geresoŋte ɋâricfâc jaŋe wiac kecʒiŋuc reŋkehuc kiŋaŋ gie banʒepieŋ: 25 Tiri bozere ââketâc qoruc â tutumaŋ qoruc boze bupunehec erâ fainao lama sahac fokac i mecne erâ tutumaŋ qoruc boze motâcte ââketâc qoruc i mâmâc. 26 Erâ hae ʒoŋa kâcɋenere ââketâc qoruc â hae ʒoŋa piticnezi alata â tiri boze rârec‐jofahuc forakac irec motâcte ââketâc qoruc â muc erâ wâcwiac‐ticne gâcne, jaŋe wiac iŋucne hâcne reŋkenʒepieŋ. 27 Ehuc wiac irec gie gâcne fokac i wâc mâmâc ebac enʒepieŋ. Ehame wiac reŋkehuc gie baniŋmu sâc i Aroŋ â ŋokâfâcne jaŋe mutâcne‐jarehapie bafârenʒepieŋ. Erâ wiac reŋkeniŋte mujarekicne i ʒâŋene muhuc biricke‐jarepie reŋkenʒepieŋ. 28 Geresoŋte ɋâricfâc jaŋe tutumaŋ qoruc bozere kiŋaŋ gie iŋuc hâcne bahuc juhapie Aroŋte ŋokâ Itamazi hone soŋaŋ ejarezejec.
29 “Go Merarire ɋâricfâc jaŋe fic sâc â mamacfâc‐jeŋic jaŋere ʒâŋe biri forakac irec sâc wose qâreŋ ejarezemec wâc. 30 Ehuc jara‐jeŋic 30‐o domarâ feku 50‐o tarakac â tutumaŋ qoruc boze maŋko kiŋaŋ gie bapare sâc eŋgopieŋ, ŋic i jaŋe hâcne wose qâreŋ ejarezemec. 31 Jaŋe tutumaŋ qoruc boze irec kiŋaŋ gie bahuc wiac kecʒiŋuc reŋkerâ baranʒepieŋ: Tiri boze irec jâc wiac â babasanaŋ, erâ wâtuŋ â ŋesiŋ‐ticne. 32 Erâ hae ʒoŋare wâtuŋ doma rakac i jaŋere ŋesiŋ â fâzâ erâ muc â wâcwiac‐jeŋic sasawa. Ehame goki wiac reŋkeniŋmu i ʒâŋene muhuc biricke‐jaretec reŋkenʒepieŋ. 33 Merarire ɋâricfâc jaŋe taha bapa Aroŋ ere ŋokâ Itamazi hone soŋaŋ ejareha tutumaŋ qoruc bozere kiŋaŋ gie iŋuc hâcne bahuc junʒepieŋ.”
34 Mose â Aroŋ erâ kikefuŋte micne guru jaŋe Kohatire ɋâricfâc fic sâc â mamacfâc‐jeŋic jaŋere ʒâŋe biri forawec irec sâc wose qâreŋ ejarembiŋ. 35 Ehuc ŋic jara‐jeŋic 30‐o domarâ feku 50‐o tarakac â tutumaŋ qoruc boze maŋko gie bapare sâc embiŋ jaŋe hâcne wosec‐jopambiŋ. 36 Fic sâc wosec‐jopakupie ʒare‐jeŋic 2 tauseŋ 750 ewec. 37 Mose â Aroŋ jahe Wofuŋzi Mose mutâcnecnewec irec sâc Kohatire ɋâricfâc wosec‐jopapire tutumaŋ qoruc bozeo kiŋaŋ gie bambiŋ jaŋere ʒare iŋuc hâcne fuawec.
38-39 Geresoŋte ɋâricfâc jara‐jeŋic 30‐o domarâ feku 50‐o tarakac â tutumaŋ qoruc boze maŋko kiŋaŋ gie bapare sâc embiŋ, jaŋe fic sâc mamacfâc‐jeŋic jaŋere ʒâŋe biri forawec irec sâc wosec‐jopakicne. 40 Fic sâc â mamacfâc‐jeŋic jaŋere ʒâŋe biri forawec irec sâc wosec‐jopakupie ʒare‐jeŋic 2 tauseŋ 630 ewec. 41 Mose â Aroŋ jahe Wofuŋzi Mose mutâcnecnewec irec sâc Geresoŋte ɋâricfâc wosec‐jopapire tutumaŋ qoruc bozeo kiŋaŋ gie bambiŋ jaŋere ʒare iŋuc hâcne fuawec.
42-43 Merarire ɋâricfâc jara‐jeŋic 30‐o domarâ feku 50‐o tarakac â tutumaŋ qoruc boze maŋko kiŋaŋ gie bapare sâc embiŋ, jaŋe fic sâc â mamacfâc‐jeŋic jaŋere ʒâŋe biri forawec irec sâc wosec‐jopakicne. 44 Fic sâc â mamacfâc‐jeŋic jaŋere ʒâŋe biri forawec irec sâc wosec‐jopakupie ʒare‐jeŋic 3 tauseŋ 200 ewec. 45 Mose â Aroŋ jahe Wofuŋzi Mose mutâcnecnewec irec sâc Merarire ɋâricfâc wosec‐jopapic jaŋere ʒare iŋuc hâcne fuawec.
46 Mose â Aroŋ erâ Israe ŋic jaŋere micne guru jaŋe iŋuc ehuc Lewiŋic fic sâc â mamacfâc‐jeŋic jaŋere ʒâŋe biri forawec irec sâc ʒâŋe biri‐jeŋic rofârembiŋ. 47 Ŋic jara‐jeŋic 30‐o domarâ feku 50‐o tarakac â tutumaŋ qoruc boze maŋko kiŋaŋ gie bapa â mafa rereŋkere sâc embiŋ 48 jaŋere ʒare ropie 8 tauseŋ 580 ewec. 49 Wofuŋzi Mose dâŋ mutâcnecnewec i reŋkehuc ru sâc kiŋaŋ qaqa â mafa bapa gie mujarekicne. Iŋuc ehuc Wofuŋzi Mose mutâcnecnewec irec sâc ejarembiŋ hâcne.