1 Wofuŋzi Mose dâŋ kecʒiŋuc âzâcnewec: 2 “Go Israe ŋic jazatec ŋic wicsanaŋhec me sahac opâ‐jeŋic wahaekac me qâŋɋâŋ ba bâuac ejarehuc wâwânâŋhec eeŋgopieŋ jaŋe teuŋkonec bârâriec‐jopanʒepieŋ. 3 Ehuc ŋic â ŋokac mâmâc teuŋ râpenao râec‐jopapie teuŋ‐jeŋic mi hegâpâreʒepieŋ, no teuŋ‐jeŋic ira hâcne juekopac.” 4 Eme Israe ŋic jaŋe iŋuc ehuc ŋic wâwânâŋhec jaŋe teuŋ râpenao râec‐jopambiŋ. Wofuŋzi Mose âzâcnewec irec sâc hâcne embiŋ.

5 Eme Wofuŋzi Mose kecʒiŋuc âzâcnewec: 6 “Go Israe ŋic ʒiŋuc jazazemec: Ŋic me ŋokac moc e ŋiczi hehesic bâfuaeŋgopieŋ hehesic iŋucne moc bâfuahuc Wofuŋ râpeckerâ kiŋ bâfuaocmu 7 e hehesic‐ticne i mufuazejec. Ehuc wiac bâsifuckewec irec okacne i furu jaha râehuc furine 5‐konec wâŋ ʒuhuckezejec. 8 Wiac‐ticne sipirickewec ŋic ere soctofafâc moc mi juŋgopieŋko ine okacne i Wofuŋte biŋe qahuc taha bapa râcnezejec. Okacne i ine kiŋticne taraocte kiŋ tatara taha bâzire lama ŋicne râeocmu ira ʒuhuckerâ râezejec. 9 Ehame Israe ŋic jaŋe taha wiac me wiac‐jeŋic tirine gâcne taha baparao râeeŋgopieŋ i ere ezejec. 10 Ine hâcne, ŋic sasawa jaŋe wiac tirine taha bapa râcneeŋgopieŋ i ere biŋe jaha efârezejec.”

11 Eme Wofuŋzi Mose kecʒiŋuc âzâcnewec: 12 “Go Israe ŋic ʒiŋuc jazazemec: Ŋokac moczi qâsoriehuc ŋowe‐ticne eatuckeocmu, 13 me ŋowe‐ticne hesoŋkecnehuc ŋic mochec sasec gie bahuc wâwânâŋhec eocmu. Eme moczi hone manac mi ecnehuc fuŋne‐ticne mi bataniŋkeocmu. 14 Ehame bahac bâfuawec me mi bâfuawec i ŋowe‐ticnezi mi mana tarahuc sifu manauŋkeocmuo ine taha baparao jowa razejec. 15 Ehuc ŋokac iŋucnere taha râezo mukicne i mâmâc barazejec. Wiac kecʒiŋuc hâcne: Oto mocjahao poroŋ uucne fokac irecnec teŋkonec wâŋ; erâ taha bâzi i mamanauŋte bâzi ekacte wokemaŋ opâne me wiac âsu biaŋhec mi ʒuhuckezejec. Taha bâzi i fuŋne babataniŋ taha bâzi hâcne.

16 “Eme taha bapazi ŋokac e Wofuŋte maio barazejec. 17 Ehuc râqâc afezi bakicne moc rorâ opâ bâtirikicne hoŋkeme hume irec fainao tiri bozere rufe fiame huzejec. 18 Ehuc taha bapazi ŋokac e Wofuŋte maio râeme domaha rurufa hecneme hume meticnao mamanauŋte fuŋne babataniŋte taha râezejec. Ehuc e jahac ine hâwec opâ hâtâne badomazejec. 19 Ehuc ŋokaczi mumupaŋ dâŋ muocte kecʒiŋuc âzâcnezejec: ‘Go ŋowegehec juhaŋ ŋic moczi gohec fome wâwânâŋhec mi emeŋko ine sâwec opâ ʒi nâtec iŋuc me iŋuc mi egarezejec. 20 Me ŋowegehec juhuc qâsorierâ wâwânâŋhec emeŋ me ŋic moczi bâsâqorecguwecko ine’ 21 (taha bapazi iŋuc muhuc ŋokac e sâwecte mumupaŋ dâŋ muocte ecnehuc ʒuhuckerâ muzejec) ‘Wofuŋzi gorao sâwecte fârine bâfuame kogoc dameŋne mi maickeha ombâŋne sawa rotec ŋic ŋokac gâcne jaŋe honecgurâ hâwic‐jopazejec. 22 Sâwec opâ ʒizi bumaŋgao hurâ wiac iŋuc hâcne bâfua‐garezejec.’ Iŋuc âzâcneme ŋokaczi ʒiŋuc muzejec: ‘Jâmbomac jâmbâŋ, iŋuc hâcne fua‐narezejec.’

23 “Iŋuc mume taha bapa e sâwecdâŋ i papiao qâreŋkerâ opâ hâtâne izi ʒurezejec. 24 Ʒurerâ sâwec opâ hâtâne i hâcne ŋokac ecneme nârâ buʒâic fuacnezejec. 25 Ehame taha bapa e ŋokacte meo mamanauŋte taha bâzi râekicne i jâoc rorâ Wofuŋte maio fenʒoŋkehuc alatao râezejec. 26 Ehuc taha bâzi hosâc âsure biŋe qakicne irecnec me mocjahare sâc rorâ alatao rikezejec. Erâ ŋokac opâ gumezejec. 27 Eme opâ gumeme nârâ wâwânâŋhec ehuc ŋowe‐ticne eatuckewecko sâwec opâzi bumaŋ‐ticnao ʒâic serereŋ bâfuacnezejec. Ehame buticne siwiŋneme gâjoŋ‐ticne tackeme ŋic ŋokac gâcne jaŋe honerâ hâwic‐jopazejec. 28 Me ŋokac e wâwânâŋhec mi ehuc bahac tâmiric juwecko ine wiac hâhâwicne moc mi fuacneha motec sâcne mocwâc kiweckerâ roocmu.

29 “Mamanauŋte sâcmutâc dâŋ ʒiŋuc hâcne fokac: Ŋokac moczi ŋowe‐ticnehec juhuc qâsorierâ wâwânâŋhec eocmu, 30 me ŋic moczi mamanauŋ bâfuarâ ŋonâŋ‐ticne manauŋkeocmuo ine ŋic e ŋonâŋ‐ticne Wofuŋte maio râezejec. Ehame taha bapazi sâcmutâc dâŋ fokac irec sâc ŋokac wiac ecnezejec. 31 Eme ŋic e kiŋ tâmiric juha ŋokaczi kiŋticnere okacne rozejec.”