1 Eme Wofuŋzi Mose dâŋ kecʒiŋuc âzâcnewec: 2 “Go Israe ŋic ʒiŋuc jazazemec: Ŋic me ŋokac moczi Wofuŋte biŋe juocte muocmuzi ine ŋic pectâc jueŋgopieŋ jaŋere mumupaŋ dâŋ muzejec. 3 Ehuc waiŋ opâ me opâ momori gâcne moc mi nâzejec; e opâ ʒaʒacne waiŋzi me opâ momori gâcnezi bakicne i wâc mi nâzejec, ehuc waiŋ hândâŋne bâpisickepene opâne wahaekac i wâc iŋuc jaha mi nâzejec. Erâ waiŋ hândâŋne ɋâricne me raŋɋane kereŋkekicne i qikiŋnezejec wâc. 4 E pectâc juocmu dameŋ ira wiac i me i waiŋzi bakicne, me waiŋ maŋnao hândâŋne fokac me sahacne i moc mi nâhuŋgaŋkezejec.

5 “E pectâc juocmu dameŋ ira qizec susuc‐ticne moc mi rozejec; e tirine juha Wofuŋte erâ pectâc juju dameŋ‐ticne tarazejec. Ehuc qizec susuc‐ticne beheme fohuc ʒorazejec. 6 E Wofuŋte erâ pectâc juocmu dameŋ ira qâŋɋâŋ moc mi maickezejec. 7 Neŋgoc mamac jahec‐ticne me hahac seŋ ɋafâc‐ticne jaŋeraonec moczi hâmone jaŋere qâŋɋâŋ ba bâuac ehuc wâwânâŋhec mi ezejec, e Wofuŋte biŋe jukac irec. 8 E pectâc juocmu sâc Wofuŋtetiriŋic juocmu hâcne.

9 “Me ŋic ere heririŋko ŋic moczi ututuŋ hâmome qizec‐ticne furu mukicne izi wâwânâŋhec eocmuo ine ʒoaŋ namba 7‐ko mocwâc ɋaɋackeocmu dameŋ ira hâcne qizec‐ticne rozejec. 10 Ʒoaŋ namba 8 ira ine hapâ me buni jajahec tutumaŋ qoruc bozere motâcko taha baparao bafisizejec. 11 Eme taha bapazi rocjofarâ moc sâqocne tâtâmire tahare râehuc moc ine qowi bâzi tahare biŋe rikezejec: Iŋuc ehuc, ŋic e qâŋɋâŋ bâuahuc kiŋhec ewecte kiwiric‐ticne rozejec. Ehame ʒoaŋ ijaha pectâc juocte mupaŋkehuc qizec‐ticne beheme ʒorazejec. 12 Ehuc mârâc mumupaŋ dâŋticne mocwâc heɋârehuc Wofuŋte maio pectâc juocte mupaŋkezejec. Erâ lama ŋicne jara‐ticne wâŋ ekicne i kiŋ tatara tahare biŋe râezejec. E wâwânâŋhec ewecte mârâc pectâc juju‐ticnezi fâri tâmiric ewec.

13 “Ŋic e pectâc juju dameŋ‐ticne tarame ine sâcmutâc fokac irec sâcko kecʒiŋuc ezejec: E tutumaŋ qoruc bozere motâcko ecnepie razejec. 14 Ehuc wiac kecʒiŋuc Wofuŋ taha bacnezejec: Qowi bâzi ririkere biŋe lama ŋicne biaŋne moc jara‐ticne wâŋ ekicne, â sâqocne tâtâmire tahare biŋe lama ŋokacne biaŋne moc jara‐ticne wâŋ jaha, erâ lama ŋicne sokakicnezi biaŋne moc wama bâzire biŋe, wiac iŋuc râezejec. 15 Erâ wiac kecʒiŋuc ʒuhuckerâ râezejec: Poroŋ goreŋ tâmiric kâdoc moc â nânâ poroŋ uucnezi bakicne â wokemaŋ opâhec bâsifuckekicne, poroŋ wokemaŋ ruacnekicne erâ taha bâzi gâcne â waiŋzi taha bâzi, 16 wiac iŋuc hâcne râe‐fârezejec. Eme taha bapazi wiac i Wofuŋte maio râehuc sâqocne tâtâmire taha â qowi bâzi i mâmâc rikezejec. 17 Lama ŋicne sokakicne â poroŋ goreŋ tâmiric kâdoc moc i ine wama bâzire biŋe Wofuŋ rikecnezejec. Ehuc taha bâzi gâcne â waiŋzi taha bâzi i mâmâc râezejec. 18 Eme pectâc juju ŋic e tutumaŋ qoruc bozere motâcko qizec susuc‐ticne furu mukicne i bâtâcnerâ wamare taha bâzi ʒakac ira beheme ʒazejec. 19 Eme taha bapa e lama ŋicnere ɋawe siecne moc â kâdockonec nânâ poroŋ goreŋ tâmiric moc erâ poroŋ wokemaŋ ruacnekicne i rorâ, pectâc juju ŋic e qizec‐ticne rofâreha ere meo râezejec. 20 Erâ taha bapa e Wofuŋte maio wiac i fenʒoŋkezejec. Wiac i â amec siecne fenʒoŋkekicne erâ ŋefacne i taha bapare biŋe tirine ekac. Gie i bapie tara‐fâreme pectâc juju ŋic e waiŋ nâzo ecneme nâzejec.

21 “Pectâc juju ŋiczi mumupaŋ dâŋ muekac ere sâcmutâc iŋuc hâcne fokac. E maŋticnere wiac râeocmu ira ʒuhuckerâ Wofuŋ taha bacneocmu i pectâc juju‐ticnere mumupaŋ dâŋ fokac irec sâc ezejec. Mumupaŋ‐ticnezi fârinehec eocte ine pectâc jujure sâcmutâc fokac irec sâcko wiac efârezejec.”

22 Wofuŋzi Mose ʒiŋuc âzâcnewec: 23 “Go Aroŋ â ŋokâfâcne jazac: Ŋoŋe Israe kikefuŋ dâŋ kecʒiŋuc jazahuc jambuŋ‐jopahuc junʒepieŋ: 24 Wofuŋ e jambuŋgurâ hone maiŋ egarezejec. 25 Wofuŋ e ʒâŋe mainezi âke tamaecgurâ anonocguzejec. 26 Wofuŋ e ʒâŋe maine bâfeŋneme sâocguha wama garezejec. 27 Iŋuc ehuc ʒâŋe‐nane Israe kikefuŋ fai‐jeŋicko râepie no jambuŋ‐ŋopahuc jupemu.”