1 Eme Lewire ŋokâ Kohati ere ŋosa Kora, Izarare ŋokâ hâcne, e â Eliabare ŋokâ jahec Dataŋ â Abiram, erâ Peletire ŋokâ Oŋ, Rubeŋte ŋosa hâcne, jaŋe Mose râsi ecnembiŋ. 2 Ehuc Israe kikefuŋ soŋaŋ micne ʒâŋe biŋehec â bâwosâec‐jopakicne jaŋeraonec ŋic 250 rocjopambiŋ. 3 Rocjoparâ Mose â Aroŋ râsi ejactehuc ʒiŋuc jasambiŋ: “Ŋohe ŋahacnere boc manapire fekac. Kikefuŋ jaŋe furu jaha tirine erâ juhapie Wofuŋzi ŋondeŋ‐jeŋicko jukac. Ŋohe ine wemocte Wofuŋte kikefuŋfâc jaŋere manapire wawahane eekac?” 4 Iŋuc mupie Mosezi manarâ mâreŋko hetutuckerâ fowec. 5 Ehuc Kora â ŋicfâcne ʒiŋuc jazawec: “Hae furume Wofuŋzi ŋic weni jaŋe ere biŋe erâ tirine juhuc taha gie sâcne baniŋmu irec fuŋne bataniŋkeocmu. Ehuc rowosâeocmu ŋic eki hâcne Wofuŋ maickezejec. 6 Kora gahacne â ŋicfâcge ŋoŋe tomâcko ʒiŋuc enʒepieŋ: 7 Ŋoŋe ʒocrâqâc moc rorâ maŋnao ʒoc kine â wiac âsu biaŋ ropie hume Wofuŋte maio râenʒepieŋ. Eme Wofuŋzi ŋic e me e rowosâeocmu eki hâcne tirine ezejec. Lewire ɋâricfâc ŋoŋe ŋaŋacnere manapie boc fekac i!” 8 Mose e iŋuc murâ Kora ʒiŋuc âzâcnewec: “Lewire ɋâricfâc ŋoŋe mananiŋ: 9 Ŋoŋe Anutu maickehuc Wofuŋte tiri bozeo ŋic ŋokac jaŋere kiŋaŋ gie baniŋte Israere Anutuzi rowosâec‐ŋopawec irec manapie wawahane ekac me? 10 Eki hâcne go gahacne mecne â Lewire ɋâricfâc hahac ɋafâcge jaŋe mecne rowosâec‐ŋopawec. Eme irec wemocte manapie wawahane eha taha bapa erâ juniŋte muŋgopieŋ? 11 Irec go â ŋicfâcge ŋoŋe Wofuŋte maio mu kâroŋ epie mi sâckekac. Aroŋ e mo ŋic mo, irec mu kâroŋ ecneŋgopieŋ?”

12 Eme Mosezi Eliabare ŋokâ jahec Dataŋ â Abiram jahe erao fisinicte dâŋ râeme dâŋ ʒiŋuc bâtikiecnepic: “Nâhe mi hefanacmu. 13 Mâreŋ burocnao hâmo sipiric enaŋte susu â baŋac fusucmarâ qâmbâriŋkeekac mâreŋ irecnec jowac‐nâpo waremeŋ i go manatec afeckeha ŋicbomboŋ enârezo mukic me? 14 Erâ go mâreŋ susu â baŋac fusucmarâ qâmbâriŋkeekacko râec‐nâpotec mi raʒimbeŋ, ehuc mâreŋ â waiŋ gie wiac nâŋere biŋe eocte wâc nâre tahac mi emeŋ. Go ʒâŋe bâsoŋ enârezo mukic me? Nâhe mi hefanacmu.”

15 Eme Mose e dâŋ i manarâ aaricke sâqoreme Wofuŋ ʒiŋuc âzâcnewec: “Go taha wiac‐jeŋic hone aŋac mi ezemec. No jaŋeraonec doŋgi wiac moc mi ropo erâ wiac gâgâpâcne wâc mi ejarepo.” 16 Mose e iŋuc murâ Kora ʒiŋuc âzâcnewec: “Go gahacne mecne ŋicfâcge jaŋe mecne ŋoŋe tomâcko Aroŋhec Wofuŋte maio fuanʒepieŋ. 17 Ehuc ŋoŋe mâmâc sasawa ʒocrâqâc‐ŋeŋic rofârerâ wiac âsu biaŋ râehuc Wofuŋte maio râenʒepieŋ, ʒocrâqâc 250 hâcne râenʒepieŋ. Erâ Aroŋhec ŋohe mâmâc râezepirec.” 18 Iŋuc mume ŋic sasawa jaŋe ʒocrâqâc‐jeŋic rorâ maŋnao ʒoc kine â wiac âsu biaŋ ropie hume Mose â Aroŋ jahehec tutumaŋte qoruc bozere motâcko tumaŋnerâ domambiŋ. 19 Domahapie Korazi ŋicfâc‐ticne sasawa ejareme jaŋe tutumaŋte qoruc bozere motâcko Mose â Aroŋ râsi ejactehuc domambiŋ. Ehame Wofuŋte huriri qâreŋzi kikefuŋ sasawa batamaec‐jopa‐fârewec.

20 Eme Wofuŋzi Mose â Aroŋ dâŋ ʒiŋuc jasawec: 21 “Ŋohe kikefuŋ keci jaŋe behec‐joparâ bucŋekic domapire mi ʒoraha ututuŋ bâsirowec‐jopazepac.” 22 Eme jahe mâreŋko hetutuckerâ ʒiŋuc muhuc numupic: “O Anutu, go ŋic sasawa jaŋere Anutu, irec ŋic mocjahazi sâqocne bâfuame kikefuŋ sasawa bâsirowec‐jopatec sâckeocmu me?” 23 Iŋuc mupire Wofuŋzi Mose ʒiŋuc âzâcnewec: 24 “Go ŋic jazatec jaŋe Kora, Dataŋ â Abiram behec‐joparâ warepie buc domanʒepieŋ.”

25 Iŋuc âzâcneme Mosezi faharerâ Dataŋ â Abiram jaherao rahame Israe soŋaŋ micne jaŋe bâjâpembiŋ. 26 Ehame kikefuŋ ʒiŋuc jazawec: “Ŋoŋe ŋic repicne keci jaŋere boze behehuc wiac‐jeŋic ba bâuac moc mi enʒepieŋ, ŋoŋe jaŋere sâqocnere erâ sirowenʒipiŋte.” 27 Iŋuc jazame jaŋe Kora, Dataŋ â Abiram jaŋere boze behembiŋ. Eme Dataŋ â Abiram jahe ŋokac naru motecfâc‐jekic jaŋehec boze‐jeŋicte motâcko waha domambiŋ. 28 Domahapie Mosezi kecʒiŋuc muwec: “Gie sasawa keci i no nahacne maŋte mâcne, Wofuŋzi munareme baekopac irec fuŋne ʒi taniŋkeme honeniŋ. 29 Ŋic ʒi jaŋe, ŋiczi hâmoc omane hâmo‐fâreeŋgopeneŋ iŋuc sawa hâmopie, me wiac gâcne fua‐nâreekac irec sâc sawa fua‐jareme, ‘Wofuŋzi mi sorecguwec,’ iŋuc munarenʒepieŋ. 30 Me Wofuŋzi mâsi fuŋmoc bame mâreŋzi aŋkerâ ɋâcjopame wâcwiac‐jeŋichec ɋâricne hâmoc haeo hupie honerâ ʒiŋuc mananʒepieŋ: Ŋicguru keci jaŋe hâcne Wofuŋ behe qaisoc ecnembiŋte wiac iŋuc fua‐jarekac.”

31 Eme Mose e dâŋ i mutara‐fârehame mâreŋ domambiŋ izi fâuckewec. 32 Fâuckerâ aŋkehuc Kora â ŋicfâcne garikiŋfâc‐jeŋic â mafa wiac‐jeŋichec ɋâcjopa‐fârewec. 33 Iŋuc fuame jaŋe wâcwiac‐jeŋichec ɋâricne hâmoc haeo hufârembiŋ. Hufârepie mâreŋ mocwâc kibâzickeme kikefuŋ jaŋere ŋondeŋkonec omaembiŋ hâcne. 34 Owackehuc hupie Israe ŋic rârec‐jopahuc domambiŋ jaŋe owa‐jeŋic manarâ kecʒiŋuc muhuc wise‐fârembiŋ: “Ʒira domahapene mâreŋzi ɋâcnâpozackohec.” 35 Eme Wofuŋtaonec ʒoc fuarâ ŋic 250 ʒocrâqâc badomambiŋ jaŋe ʒâseŋ‐jopa‐fârewec.

36 Iŋuc fuame Wofuŋzi Mose ʒiŋuc âzâcnewec: 37 “Go Aroŋ ŋokâ‐ticne taha bapa Eleaʒa âzâcnetec ʒocrâqâc i ʒockonec bârâiehuc ʒoc hetâtiezejec. Ʒocrâqâc i wiac tirine hâcne. 38 Erâ ŋic sâqocne bâfuarâ hâmombiŋ jaŋere ʒocrâqâc i hamazi hejacnerâ alata râreckehuc ɋorockepie fozejec. Wiac i Wofuŋte maio bajumbiŋte tirine ekac. Wiac izi hâcne Israe ŋic jaŋere uŋsawaŋ ehuc majeŋic ezejec.” 39 Iŋuc mume taha bapa Eleaʒa e ʒocrâqâc aeŋ bâbâroŋzi bakicne, ŋic ʒoczi ʒâhâmoc‐jopawec jaŋe badomambiŋ, i rofârerâ ŋic jareme hedapirerâ alata ɋorockembiŋ. 40 Eme ŋic moczi taha bapa mi juocmu me Aroŋte ɋâric wâc mi juocmu e sifu Wofuŋte maio fuarâ wiac âsu biaŋ rikerâ Kora ŋicfâcne wiac fua‐jarewec iŋucnea fuacnezacte wiac izi Israe ŋic jaŋere uŋsawaŋ ehuc majeŋic ewec. Eme Eleaʒa e wiac i sasawa Wofuŋzi Mose dâŋ âzâcnewec irec sâc efârewec.

41 Hae fureme Israe kikefuŋ sasawa jaŋe Mose â Aroŋ mu heŋɋâŋ ejactehuc ʒiŋuc mumbiŋ: “Ŋohe hâcne Wofuŋte ŋicfâc qâhâmoc‐jopapirec i!” 42 Erâ Mose â Aroŋ râsi ejactehuc tumaŋnerâ tutumaŋ qoruc boze maickehuc ʒiŋuc honembiŋ: Karoraczi waha boze sâockerâ foha Wofuŋte huriri qâreŋ fuawec. 43 Ehame Mose â Aroŋ jahe tutumaŋ qoruc boze maŋfuŋnao ra domapic. 44 Eme Wofuŋzi Mose ʒiŋuc âzâcnewec: 45 “Ŋohe kikefuŋ keci jaŋe behec‐joparâ bucŋekic domapire mi ʒoraha ututuŋ bâsirowec‐jopazepac.” Iŋuc mume jahe mâreŋko hetutuckerâ fopic. 46 Ehuc Mosezi Aroŋ ʒiŋuc âzâcnewec: “Wofuŋtaonec kimbeŋ aaric fuame huc mimicnezi biac rocjopakacte go ʒocrâqâcge barâ maŋnao ʒoc kine rotec hume fainao wiac âsu biaŋ râerâ kikefuŋ jaŋerao ra kiwiric‐jeŋic rozemec.” 47 Eme Aroŋ e Mosezi dâŋ âzâcnewec irec sâc ehuc kikefuŋ jaŋe tumaŋnembiŋ ira rawec. Ra juhame mi huc mimicnezi ŋic gâcne biac rocjopazejec i! Iŋuc fuame honerâ ʒocrâqâcko wiac âsu biaŋ râerâ ŋic kiwiric‐jeŋic rowec. 48 Ehuc ŋic hâmockicne â ɋâricne jumbiŋ jaŋere ŋondeŋko domahame huc mimicnezi omaewec. 49 Huc mimicnezi ine ŋic 14 tauseŋ 700 rocjopame hâmombiŋ. Kora ŋicfâcne hâmombiŋ jaŋerao ŋic iŋucnezi ʒuhuckerâ hâmombiŋ hâcne. 50 Eme huc qaʒuerâ wahame Aroŋzi tutumaŋ qoruc bozeo Moserao risie rawec.