17
Aroŋ gunu‐ticnere dâŋ
1 Eme Wofuŋzi Mose ʒiŋuc âzâcnewec: 2 “Go Israe ŋic jazatec gurune gurune irec micne jaŋe apafâc‐jeŋic jaŋere sâc gunu moc moc râekupie 12 ezejec. Ehame gunu sahacnao micne jaŋere ʒâŋe qâreŋkezemec. 3 Lewire gunuo ine Aroŋte ʒâŋe qâreŋketec fozejec. Ehame guru sâc micne jaŋere biŋe gunu mocjaha sawa fozejec. 4 Iŋuc erâ tutumaŋ qoruc bozeo qorac tapa katapa maŋfuŋnao bâbâfuac eekoperecko ira râetec fozejec. 5 Eme rowosâepemu ŋic ere gunuzi gitec qame Israe ŋic jaŋe honerâ pipic tatara ejareme mu heŋɋâŋ eŋacteeŋgopieŋ i moc behenʒepieŋ.” 6 Iŋuc mume Mose e ŋic jazame micnefâc‐jeŋic jaŋe apafâc‐jeŋic jaŋere sâc manahuc gunu ru sâc râcnekupie 12 ewec. Gunu 12 jaŋeraonec moc ine Aroŋte biŋe. 7 Eme Mose e gunu i tiri bozeo Wofuŋte maio râeme fowec.
8 Eme hae fureme Mosezi tiri bozeo raʒirâ honeme mi Lewire guruonec Aroŋte gunuzi gitec qazejec i! Ehuc âri qarâ hândâŋ fârihec ehuc woze qeuc ewec. 9 Eme Mosezi gunu sasawa i Wofuŋte tiri bozeonec Israe ŋic ŋokac jaŋerao bawahawec. Bawahame ʒâŋe qâreŋ‐jeŋic sâc honehuc rofârembiŋ. 10 Eme Wofuŋzi Mose ʒiŋuc âzâcnewec: “Go Aroŋte gunu i mocwâc tiri bozeo bârisierâ râezemec. Izi hâcne ŋic râŋgeŋ qaŋqaŋne jaŋere ma ezejec. Ehuc no mu heŋɋâŋ enareeŋgopieŋ jaŋe jazatec behe‐jâmbâŋkenʒepieŋ. Iŋuc mi eniŋmuo ine hâmo‐jâmbâŋkeniŋmu.” 11 Eme Mose e Wofuŋzi dâŋ âzâcnewec irec sâc efârewec.
12 Eme Israe ŋic jaŋe Mose ʒiŋuc muhuc âzâcnembiŋ: “Manakic, nâŋe hâmo sipiric ehuc omae‐fârezo eŋgopeneŋ. 13 Moc e Wofuŋte tiri boze maickeocmu e hâmoocmu. Nâŋe moczi moc mi bafic‐nâpoha omaenaŋmu me?”