15
1 Dâŋ okacne urucnezi aaric bawahaekac, â dâŋ fâfâcneheczi ine maŋʒoc bâfuaekac.
2 Ŋic maŋɋârâŋhec ere mickonec mamana dâŋ biaŋne sawa wahaekac, â ŋic mutuc matacne eki ine mutucdâŋ sawa muekac.
3 Wofuŋ e mâreŋ ira me ira wiac fuaekac sâc hone manac efâreekac, ehuc wiac biaŋne me sâqocne ebac ehapene hone jâjâpec‐nâpoekac.
4 Dâŋ biaŋnezi juju bâfua‐nâreekac, â dâŋ gâgâpâcnezi ine maŋnâŋec bâsâqoreekac.
5 Motec mutucnezi mamac‐ticnere mubâtiŋ dâŋ qaisockeekac, â mana maŋ eekaczi ine maŋɋârâŋhec eekac.
6 Ŋic tiŋne jaŋe moneŋ mafa ɋâfoŋne fojareekac, â ŋic sindaŋne jaŋere huhure wiac ine sifuckeekac.
7 Ŋic mutucne jaŋe mâcne, maŋɋârâŋhec jaŋe mamana dâŋ musaweeŋgopieŋ.
8 Ŋic siocmâc jaŋe Wofuŋ numucnepie maname biaŋkeekac, â ŋic sindaŋne jaŋe taha bâzi rikecnepie ine maname mamakâcne eekac.
9 Wofuŋ e ŋic sindaŋ hârindaŋne jaŋere eebapa honeme gâgâpâcne eekac, â wiac tiŋne ebac eeŋgopieŋ jaŋe ine maŋzi ʒâfic‐jopaekac.
10 Moc e wiac hehesicne ebac eocmu ere faio okacne hâhâwicne feocmu, ehame bâbâtiŋ qikiŋnehuc hâmoocmu.
11 Hâmoc haere fuŋne Wofuŋte maio tâtâc fohame ine wemocko ŋiczi maŋticnere fuŋne moc Wofuŋte maio sâcne hesoŋkeocmu.
12 Ŋic mu âke sisicnezi bâbâtiŋte takickeekac, â ŋic maŋɋârâŋhec jaŋe dâŋzi bafickeniŋte wâc mi ecneekac.
13 Ŋic moc e bubiaŋ maname ʒâŋe maine fie ruruckeocmu, â moc e busâqoc maname ine ʒâŋe maine ki humimic eocmu.
14 Ŋic mamanaheczi mamana gie ʒuhuckerâ baocte ecneekac, â ŋic mutuc matacnezi ine mutucdâŋ sawa muhuc juocte ecneekac.
15 Ŋic waha qaqane jaŋere juju i biaŋne aricne, â juhâc qâhâmoeŋgopieŋ jaŋe ine juju‐jeŋicte manapie ʒerine eekac.
16 Hapetac juhuc Wofuŋ araŋ babacne irec manapene fefene ezejec, â moneŋ mafahec ʒârâ ʒâpâ faio juju irec ine manapene wawahane ezejec.
17 Maŋjauŋ enârehuc nânâ monʒaŋ wiac sawa gumec‐nâpopie sifu manapene fefene ezejec, â qaisoc‐nâpohuc qowi biuc wokemaŋ sâkohec nârepie manapene wawahane ezejec.
18 Ŋic maŋʒocheczi ʒikadâŋ bâfuaekac, â ŋic buurucheczi ine wamadâŋ bâfuaekac.
19 Ŋic moc e ojoŋ juocmuzi dameŋ sâc ŋemâc bâfuaocmu, â moc e siocmâc juocmuzi ine ʒâic busâqoc tâmiric juocmu.
20 Motec maŋɋârâŋheczi mamac‐ticne bubiaŋ qacneocmu, â motec mutucnezi ine neŋgoc‐ticne qaisockeocmu.
21 Ŋic mutuc matacne jaŋe mutuc‐jeŋicte manapie bubiaŋnehec eekac, â ŋic maŋɋârâŋhec jaŋe ine wiac ebac epie tiŋke biaŋ efâreekac.
22 Ŋic âgofâcge jaŋe baficguhapie dâŋwiacge mu biric etec fârinehec eocmu, â i tâmiric ine fârimâc eocmu.
23 Ŋic gâcne jaŋe dâŋ muniŋte eipiehapie dameŋ ijaha ŋic moczi dâŋ fârine jazame manapie bubiaŋnehec eocmu.
24 Ŋic maŋɋârâŋheczi hâmoc haere hatao mâcne, jujure hatao raekac.
25 Wofuŋzi ŋic pepec penaroŋhec jaŋere fic hae hetâc qâtâtieekac, â hozec jaŋere wâcwiac ine ŋezickehuc akickeekac.
26 Wofuŋ e ŋic sindaŋne maŋ mamanasu‐jeŋicte maname wiac mamakâcne eekac, â ŋic maŋɋârâŋhec jaŋere dâŋte ine maname aŋac baŋacne eekac.
27 Ŋic moc e eeatuc ehuc moneŋ mafa hureocmuzi wiacfâcne ŋemâc bâfua‐jareocmu, â moc e bâbâmiriŋ mi roocmuzi ine dameŋ ʒora juhâc qâhâmoocmu.
28 Ŋic biaŋne jaŋe dâŋ okacne bâtikieniŋte mana tara‐hâmorâ bâtikieeŋgopieŋ, â ŋic sindaŋne jaŋe ine dâŋ manabâc tâmiric kosa mupie sâqoreekac.
29 Wofuŋ e ŋic tiŋne jaŋere nunumu manaekac, â ŋic sindaŋne jaŋere ine suŋgiŋkeekac.
30 Ŋic ʒâŋe mai‐jeŋic fie ruruckeme honerâ ʒeri eeŋgopeneŋ, â biŋedâŋ biaŋne moc manarâ maŋnâŋec qacfiric eekac.
31 Ŋic moc e mubâtiŋ dâŋte hazec râerâ mana maŋ eocmuzi ŋic maŋɋârâŋhec jaŋere ŋondeŋko sâcne juocmu.
32 Ŋic moc e mu qaqazuc dâŋ qikiŋneocmuzi e jahacne juju qaisockeocmu, â ŋic moc e mubâtiŋ dâŋ mana maŋ eocmuzi ine maŋɋârâŋ fehuc bâfuaocmu.
33 Wofuŋ araŋ bacnehuc juju izi maŋɋârâŋte mamana gie fârine ekac. Ŋoŋe ʒâŋe biŋehec ezo murâ qanaŋ maŋhuhuŋ junʒepieŋ.