16
Ŋic nâŋâc wiac irec me irec dâŋ mu biric ezo murâ enaŋmu, ehame irec dâŋ mumutara ine Wofuŋzi eocmu.
Ŋic nâŋâc wiac ebac ehuc manapene tiŋke biaŋ eekac, mâc fuŋne weniŋucte eeŋgopeneŋ i ine Wofuŋzi buc manaekac.
Go gie moc bazo murâ Wofuŋzi jambuŋke‐gareocte numucnehuc batec fârinehec eocmu.
Wofuŋ e wiac sasawa fuŋnehec bâfuac‐jopa‐fârewec, ehuc ŋic sindaŋne jaŋe ine sisipiricte biŋe râec‐jopawec.
Wofuŋ e ŋic pepec penaroŋhec jaŋere maname mamakâcne eekac, irec jaŋe okacne rojâmbâŋkeniŋmu.
Go Anutu manasiŋkehuc erao qohotatec sâqocnege bâtâmireocmu, â Wofuŋ araŋ bacnehuc jutec wiac hâhâwicne moc mi fua‐gareocmu.
Nâŋâc Wofuŋzi juju bapa‐nâŋec honeme biaŋkeha râsifâc‐nâŋec âgo ejarepene jaŋe âgo jaha enâreniŋmu.
Nâŋâc siocmâc juhapene wiac afecne sawa fua‐nâreme manapene mi sâqorezejec, â eeatuc ehuc moneŋ mafa bocjaha bâfuanaŋmuo ine sâqoreocmu.
Maŋnâŋeczi juju hata‐nâŋecte dâŋ manasu biric eekac, ehame Wofuŋzi ine hata fâretiŋ jaha nâzâ nâwotuc eekac.
10 Ŋicwofuŋ e Anuture micte dâŋ muekac, irec e moc mi musifuckehuc dâŋ fârine sawa muekac.
11 Wofuŋzi ŋemâc bâbâfuare sâc â sâcmeda wiac i sâckoa fofâreocte muekac, wiac sasawa i eki hâcne bâfua‐fârewec.
12 Hehesic bâbâfua izi ŋicwofuŋ jaŋere maio mamakâcne eha tiŋne jujuzi eri ŋeŋe‐jeŋicte hobeteŋne eekac.
13 Ŋicwofuŋ e dâŋ fâri hândâŋne manaocte ecneekac, irec dâŋ fârine muniŋmu ŋic i jaŋe hâcne âgo ejareocmu.
14 Ŋicwofuŋ e maŋʒoc‐ticne fuame ŋic moc qâhâmozacte ŋic maŋɋârâŋhec jaŋe mu bâmâteŋ ecneeŋgopieŋ.
15 Ŋicwofuŋ e ʒâŋe mai‐ticne fie ruruckeme honepene âgo hawari eekac, ehame ʒoaŋ dameŋko hoezi mâreŋ bâgunuckeekac irec sâc enâreekac.
16 Nâŋâc gol me siliwa babaju irec manapene wawahane eha maŋɋârâŋ â mamanahec juju irec ine manapene fefene ezejec.
17 Ŋic biaŋne jaŋe sisipiricte hata geŋkeeŋgopieŋ, irec ŋoŋe hata‐ŋeŋic hone‐hâmohuc ranʒepieŋ; ŋoŋe iŋuc ehuc juju‐ŋeŋic ŋezickeniŋmu.
18 Sahac fefezi sisipiricte hata baekac, â pepec penaroŋzi ine sâc ijaha ehuc bawahac‐nâpoekac.
19 Ŋic hapetac â maŋhuhuŋ jueŋgopieŋ jaŋehec juju irec manapene fefene ezejec, â ŋic pepec penaroŋ eeŋgopieŋ jaŋehec juhuc kâdoc qaqa irec ine manapene wawahane ezejec.
20 Ŋic moc e Anuture dâŋ âzâcne qazuc ekicne i mana rereŋ eocmuzi juhâc qâhâmoocmu, â moc e Wofuŋtao roweckehuc juocmu ere manapene ʒerine eocmu.
21 Ŋic moc e maŋɋârâŋhec jume honerâ ŋic mamana sarichec mucneeŋgopieŋ, ehame dâŋ biaŋne mume aŋac‐jopaha mana ʒakieeŋgopieŋ.
22 Maŋɋârâŋzi ŋic mamanahec jaŋerao opâ ʒâŋe iŋucne eekac, â ŋic mutuc matacne jaŋe wiac qaqazu‐jare izi ine dameŋ sisipiric eekac.
23 Ŋic maŋɋârâŋ heczi dâŋ muzo murâ qanaŋ mana biric eekac, erâ ie dâŋ mume ŋic jaŋe aŋac‐jopaha mana ʒakieeŋgopieŋ.
24 Dâŋ biaŋnezi aŋac baŋacne eekac, erâ maŋnâŋecko aŋac bâfuahuc sahac‐nâŋec baafeckeekac.
25 Ŋic nâŋâc hata moc honerâ biaŋne mecne muhapene sifu hata izi raku hâmoc haeo fisikac.
26 Ŋic moc e nânâ nâ gapec eocte aŋac manahuc gie‐ticne ʒoɋachec baocmu.
27 Ŋic hehesicne jaŋe wiac hehesicne jaha eniŋte manasueŋgopieŋ, ehame dâŋjeŋiczi ʒoc iŋucne bâruŋkerâ ima gie baekac.
28 Ŋic sindaŋne jaŋe gupe micko âke dâŋ mueŋgopieŋ, ehuc ŋic âgofâc‐jeŋic jaŋerao fâfâuc bâfuaeŋgopieŋ.
29 Ŋic ʒâʒâicne jaŋe ŋic âgofâc‐jeŋic eatuc‐jopahuc sisipiricko râec‐jopaeŋgopieŋ.
30 Ŋic ʒâŋe bazuc enâreeŋgopieŋ jaŋere ruc banʒepeneŋ, â sumâŋ kieŋgopieŋ jaŋe ʒika qaniŋte maŋkeeŋgopieŋ.
31 Ŋic tiŋne jaŋe dameŋ ʒora jufeeŋgopieŋ, ehame jaŋɋâŋ‐jeŋic honepene eri hendiŋ‐jeŋic eekac.
32 Ŋic qac momori ere manapene wawahane eha ŋic kimbeŋ‐ticne bembeŋne ere ine manapene fefene ezejec. Erâ moc e ŋic guru sâko bawahac‐jopaocmu ere wâc iŋuc jaha manapene wawahane ezejec, â moc e maŋrâŋgeŋ‐ticne bawahaocmu ere ine manapene fefene ezejec.
33 Ŋic jaŋe Anuturaonec dâŋ mananiŋte mu wioc ecnehuc ɋâsâi qaeŋgopieŋ, eme dâŋ okacne ine Anutu e jahac bâtikie‐jareekac.