11
Wofuŋ e jukacte wemocte wisezo?
1 No Wofuŋte dapeŋko soŋkekopac.
Eme weniŋucte ʒiŋuc nazaŋgopieŋ?
“Ŋoŋe wipe iŋucne tiki mâreŋ‐ŋeŋicko wiseniŋ;
2 manaŋgopieŋ, sindaŋŋic jaŋe tepeo gurutuc âtepie hukac,
erâ motecne tikocko heŋgopieŋ,
dapâcko ŋic maŋhumuc muruc‐jopaniŋte.
3 Eme wiac ŋesiŋne qatarahapie,
ŋic tiŋnezi wemo wiac moc eocmu?”
4 Wofuŋ e tiri ufuŋ‐ticnao jukac,
Wofuŋte eri ŋeŋe sambâŋko ŋekac.
Ira ŋehuc ʒâŋe fikac,
mâreŋŋic ŋokac hone qârâwiŋ ejarekac.
5 Wofuŋ e tiŋne â hehesicne ba esâic ejareekac,
moc e ʒikare aŋackeme ere takicke‐jâmbâŋkeekac.
6 Sindaŋŋic jaŋere faio ʒoc â kâmbâc sâqocne mume waha heocmu;
mâŋâŋ sanaŋ ʒoc fâroroc‐ticnehec kâdoc qajareocmu.
7 Wofuŋ e tiŋne hâcne, eebapa tiŋnere aŋackeekac;
ŋic maŋhumuc jaŋe ʒâŋe maine honeniŋmu.