12
Wofuŋte tâpirizi burecte tâpiri sirickekac
1 O Wofuŋ, kuku! Ŋic mitihec arictac embiŋ,
mâreŋŋic nâŋere ŋondeŋko dâŋfârio qoqohota omaembiŋ.
2 Mâmâc sasawa eeatuc eec eeŋgopieŋ,
maŋjeŋicko râsidâŋ foha micbipic‐jeŋiczi âgodâŋ eeŋgopieŋ.
3 Micbipic wokemaŋ rua‐jareekac,
â nameŋ penaroŋ dâŋ muekac,
i Wofuŋzi hetâcne‐jarezac me!
4 Jaŋe ʒiŋuc mueŋgopieŋ: “Nameŋ‐nâŋeczi sanaŋkenaŋmu,
micbipiczi bafic‐nâpoha mozi bawahac‐nâpoocmu?”
5 Qarâ suriŋne jaŋere ʒârâ hâriŋte erâ,
â tac qararacne jaŋere kio wâwâsicte erâ
Wofuŋzi mukac, “No ʒiŋuczia faharerâ
maŋhâhâŋ ejarekac jaŋe juju biaŋ jarepemu.”
6 Wofuŋte mumupaŋ dâŋ i dâŋsaric,
siliwa uucne kuʒio arec 7 rikekupie opâ eekac,
ehuc ɋaɋac taeŋne fuaekac iŋucne hâcne.
7 O Wofuŋ, go dâŋ i basanaŋkehuc sabec‐nâpozemec,
eme ŋicguru ʒi jaŋe wiac moc mi enârenʒepieŋ,
8 sindaŋŋic jaŋe ŋifec gafac masu wânʒâŋ juipiehapie,
â mâreŋŋic ŋondeŋ‐nâŋecko juju bapa repicnezi ɋârâŋke‐bipiehame.