24
Wofuŋ mu ʒeri ecnehapene fisi‐nârezejec
1 Mâreŋ â tagi‐ticne i Wofuŋzi rune jukac,
mâreŋ sâko mâreŋ â ŋecjucfâc‐ticne.
2 Hâwecko ŋesiŋ‐ticne qandaŋkewec,
opâ sâkoo qasanaŋ‐ticne râewec.
3 Mozi Wofuŋte tikio feocmu?
Mozi tiri hae‐ticnao domaocmu?
4 Meticne ɋaɋacne â maŋticne taniŋne,
erâ eeatuc giere mi manasuekac,
â mumupaŋ burecne mi eekac e hâcne.
5 Ŋic iŋucnezi Wofuŋtaonec jambuŋ roocmu,
â Anutu bâbâpiaŋzi dâŋticne mufâsâeocmu.
6 Ine ere ejareekac guru i hâcne,
Jakobore Anutu maickezo muŋgopieŋ jaŋe.
7 Haesac motâc sâko, aŋkeniŋ!
Motâc mimiŋ, ŋeindaŋke‐hâmoniŋ!
Eme ʒâŋe rara Wofuŋ Sâko e wefuoc.
8 Ʒâŋe rara Wofuŋ Sâko e mo?
E Wofuŋ, tâpiri sanaŋ,
e Wofuŋ, momori wânʒâŋ.
9 Haesac motâc sâko, aŋkeniŋ!
Motâc mimiŋ, ŋeindaŋke‐hâmoniŋ!
Eme ʒâŋe rara Wofuŋ Sâko e wefuoc.
10 Ʒâŋe rara Wofuŋ Sâko e mo?
E sambâŋ momori jaŋere Wofuŋ,
e hâcne ʒâŋe rara Wofuŋ Sâko.