25
Wofuŋtao qohotaniŋmu jaŋe kiŋjeŋic behehuc ŋezic‐jopaocmu
No maŋ qâqâtâc‐nane Wofuŋ gorao sâsepe hefakac.
O Anutu‐nane, go manasiŋgukopac, irec manahaŋ mi qurutuazepac,
kisâfâc‐nane jaŋe nifepupu mi enarenʒepieŋ.
Jâmbomac, gore mamanac juŋgopieŋzi mi qurutuanʒepieŋ,
otec ɋeticne jaŋe ine bawahac‐jopatec mimienʒepieŋ.
Eebapage nowatutec hone manac ezepac, Wofuŋ;
hatage forakac i qazu‐narezemec.
Dâŋfârige maŋnao jowacnuhuc qazu‐narezemec,
go hâcne bâbâpiaŋ Anutu‐nane,
ʒoaŋ ʒora gore mamanac juekopac.
 
Wofuŋ, buuruc â aki anonocgere manasuzemec,
i hâcne fufuŋke tâmiric fowarehuc juwec.
Socɋâri juhuc sindaŋ â qaqatara epo i mi manasuzemec,
aki anonocgere sâcko ine manasu‐narezemec,
i gahacne biaŋte erâ ezemec, Wofuŋ.
Wofuŋ e maŋuruc â tiŋne rune,
irec ŋic sindaŋne tiŋne hata jowatuekac.
Maŋhuhuŋ jueŋgopieŋ jaŋe eebapa tiŋnao jowac‐jopaekac,
ehuc jahacne hata qazu‐jareekac.
10 Wofuŋte hata sasawa i aki anonoc â erâ‐eesanaŋ,
ʒâʒâfic â sâcmutâc‐ticne basanaŋkeeŋgopieŋ,
jaŋe ira jowac‐jopaekac.
 
11 O Wofuŋ, ʒâŋe biŋegere erâ kiŋnane behezemec,
kiŋnane i ŋemâcne.
12 Ŋic wenizi Wofuŋ araŋ bacneekac,
e hâcne hata âteocte mucnekicne i jâutuocmu.
13 Eme e jahacne sâcne juhâmoocmu,
â ɋiefâcne jaŋe mâreŋ rauckeniŋmu.
14 Araŋ bacneeŋgopieŋ jaŋe Wofuŋzi âgo ejareekac,
erâ ʒâʒâfic‐ticne mutaniŋke‐jareekac.
15 No Wofuŋtaopec jaha ʒâŋe fihuc juekopac,
eki kike‐nane wiwitickonec qâunuckeocmu.
 
16 Wofuŋ, goki maicnurâ âgo enarec me,
no bebekâne juhuc huacbuc ekopac.
17 Buʒâiczi ɋârâŋkehuc maŋnane kidapekac,
irec ʒârâ hâriŋkonec bataracnuc.
18 Qarâ suriŋne â buʒâichec jukopac i honec me,
ehuc sâqocne bâtâmire‐nare‐fârec.
 
19 Kisâfâc‐nane guru mo iŋucnezi
rerepic qaisocnuŋgopieŋ i honec.
20 Juju‐nane ŋezickehuc bataracnuc,
dapeŋgao soŋkekopacte mi qurutuazepac.
21 No Wofuŋ gore mamanac jukopacte,
bahac fâsâc â siocmâc jujuzi sabecnuzejec.
22 O Anutu, go ʒârâ hâriŋ sasawaonec
Israe batarazemec.