33
Anutu bapafâre â aki anonoc‐ticnere mumuteŋ gae
1 Ŋic tiŋne ŋoŋe Wofuŋ bubiaŋ manacneniŋ!
Siocmâc jujuzi mumuteŋ gae hepie sâckeocmu.
2 Musi bahuc Wofuŋ mumbiaŋkeniŋ,
gita mucne teŋzi musi bacneniŋ.
3 Gae ɋâricne moc hefuacneniŋ,
musi basarickehuc gae marac sâko heniŋ.
4 Wofuŋte dâŋ i dâŋfâri hâcne,
â gie‐ticne sasawa eeatuc tâmiric baekac.
5 E tiŋne juju â mumutiŋ dâŋte aŋackeekac;
Wofuŋte aki anonoczi mâreŋ fuserâ fokac.
6 Wofuŋte dâŋzi sambâŋne sambâŋne bâfuawec,
erâ mosa ʒoaŋ â bâpiŋfâc‐jeŋic micrombâŋ‐ticnere fuambiŋ.
7 E hâwec sâko i kiruŋko tinac qoŋgiŋkeme huwec,
ʒâkâŋ ʒora i kânoŋko tinac ŋiewec.
8 Mâreŋ sâko mâreŋ e Wofuŋ araŋ bacnezejec,
ŋecjucfâcne sasawa mai‐ticnao ɋarac ɋarac qahuc domanʒepieŋ.
9 Wiac eki muha izia fuawec i!
Wiraha izia fahare domawec i!
10 Wofuŋzi qâpuc jaŋere mumupaŋ qame wahaekac,
ŋicne ŋicne jaŋere dâŋbiri hetâtieekac.
11 Wofuŋte mumupaŋ i fofo sanaŋ,
maŋticnere mamana biri,
i ŋic gaŋne gaŋne jaŋerao fârio qaekac.
12 Ŋicguru Wofuŋzi Anutu ejarekac jaŋere manape ʒerine ekac,
eki rauc‐jopaocte bâwosâec‐jopawec jaŋe hâcne.
13 Wofuŋ e sambâŋkonec fime wahame,
mâreŋŋic sasawa honec‐nâpoekac.
14 Eri ŋeŋe‐ticnao ŋeha ʒâŋenezi
mâreŋte ŋecjucfâc qâuc‐jopa‐fâreekac.
15 Eki hâcne maŋjeŋic ba akic efârewec,
erâ wâc eebapa‐jeŋic hone râwiŋne‐fâreekac.
16 Ŋicwofuŋ moc e momori gurufâcne
jaŋe sâcne mi ŋezickeniŋmu;
â momori moc e tâpiri sâko‐ticnezi
sâcne mi baficke‐hâmoocmu.
17 Ʒikare becâsic ere erâ
râsi sâcne mi sanaŋke‐jarezo,
e tâpiri sâko‐ticnezi
rune sâcne mi bafickeocmu.
18 Manaŋgopieŋ, Wofuŋ araŋ bacneeŋgopieŋ,
â aki anonoc‐ticnere mamanac jueŋgopieŋ,
jaŋe ʒâŋe‐ticnezi hone maiŋ ejareekac,
19 juju‐jeŋic hâmockonec bataraocte,
eme roroc dameŋko ɋâricne juniŋte iŋuc eekac.
20 Maŋ qâqâtâc‐nâŋeczi Wofuŋte woŋec juekac,
e babafic‐nâŋec â maro‐nâŋec.
21 Jâmbomac, nâŋe tiri ʒâŋe‐ticnao roweckeeŋgopeneŋte
ere bubiaŋ manaeŋgopeneŋ.
22 O Wofuŋ, gore mamanac jueŋgopeneŋte,
aki anonocgezi nâŋerao fosanaŋkezejec.