34
Anutuzi fuŋfuŋfâcne bafic‐jopaekac
No Wofuŋ dameŋ sâc mumbiaŋkezepac;
mumuteŋ‐ticnezi micnaneo ʒuʒuhuc jaha fozejec.
Wofuŋte qâqiŋ qahuc juzepac,
eme ʒârâ ʒâpâo juŋgopieŋ jaŋe manarâ aŋac‐jopazejec.
Nohec mâmâc Wofuŋ musokanʒepeneŋ,
babafic ehuc ʒâŋe‐ticne muafeckenʒepeneŋ.
 
No Wofuŋ wira basac ecnepo sâc micnaneo rowec,
ehuc hâhâwic‐nane qamase‐fârewec.
Erao ʒâŋe fihuc firic qâric eniŋ,
eme ʒâŋe mai‐ŋeŋic mimiʒu qâʒuʒu mi ezejec.
Ŋic huacbucne ʒizi wirame Wofuŋzi manawec,
ehuc ʒârâ ʒâpâ‐ticne jâoc rofârewec.
Wofuŋ araŋ bacneeŋgopieŋ jaŋe
aŋelo‐ticnezi heririŋ‐jeŋicko ju fofo ehuc batarac‐jopaekac.
Oi, esâicke honerâ mananiŋ: Wofuŋ e buuruchec!
Ŋic moczi ere dapeŋko soŋkeocmu ere manape ʒerine ekac.
O mitiŋicfâc‐ticne, ŋoŋe Wofuŋ araŋ bacnenʒepieŋ;
e araŋ bacneniŋmu jaŋe wiac moc mi basaniŋmu.
10 Laioŋ motecne jaŋe nânâ wiacte hâmoeŋgopieŋ;
â Wofuŋ wira basac ecneeŋgopieŋ,
ŋic i jaŋe wiac biaŋne moc mi basaeŋgopieŋ.
 
11 O motecfâc‐mae, ware hazec râehapie
no Wofuŋ araŋ babacne irec fuŋne ŋazape.
12 Mo ŋic mozi dameŋ ʒora juocte manasukac,
â ʒoaŋ bocjaha jufehuc wiac biaŋne nâ bac eocte ecnekac?
13 Nameŋgezi sâqocne bazacte soŋaŋkezemec,
â micbipicgezi eeatuc gie bazacte aka hecnezemec.
14 Sâqocne râpeckerâ eehâmo gie bazemec;
wama bâfuarâ irec hata bâjâpezemec.
 
15 Wofuŋ e tiŋne jueŋgopieŋ jaŋeraopec ʒâŋe fiekac,
â wira wâwâsic ecneeŋgopieŋ jaŋerao hazec râeekac.
16 Wofuŋ e ʒâŋe mainezi sâqocne bapa maic‐jopaekac,
ine ʒâŋe biŋe‐jeŋic mâreŋkonec bârârieocte.
17 Tiŋne juju jaŋe kuku qapie Wofuŋzi manaekac,
ehuc ʒârâ hâriŋ fua‐jareekac sâc jowac roekac.
18 Wofuŋzi bu heheric ejareekac jaŋe qâtec‐jopaekac,
â maŋjeŋic ima qakicne jaŋe bafic‐jopaekac.
 
19 Tiŋne juju e ʒârâ hâriŋ bocjaha fuacneekac;
Wofuŋzi ine wiac iŋucne sasawaonec bataraekac.
20 E me kikene sasawa hone maiŋ eekac,
irec mocjaha mac moczi mi herickecneocmu.
21 Sâqocnezi sindaŋŋic qâhâmoocmu;
â tiŋne juju qaisockeniŋmu jaŋe kiŋhec eniŋmu.
22 Wofuŋzi kiŋaŋŋicfâc‐ticne firuec‐jopaekac;
ere dapeŋko soŋkeeŋgopieŋ jaŋeraonec moczi kiŋhec mi eocmu.