35
Ŋic moc e huacbuc ehuc Wofuŋ numucnekac
1 O Wofuŋ, goki no râsi enareŋgopieŋ jaŋe râsi ejarec,
nohec juju gie baŋgopieŋ jaŋehec juju gie bac!
2 Maruku maŋne sahacne hetec hume fahare ŋezicnuc!
3 Sându ʒika rorâ, jâpecnuŋgopieŋ jaŋe maic‐jopac!
Maŋ qâqâtâc‐nane âzâcnec: “No gore ŋeŋezic.”
4 Juju‐nane omaeocte muŋgopieŋ,
ŋic i jaŋe mimi busâqoc bâfua‐jarec!
Sipiricnuniŋte manasuŋgopieŋ,
jaŋe emâmâŋkerâ weaŋkenʒepieŋ.
5 Wofuŋte aŋelozi hetapaic‐jopame,
padi jawa iŋucne tâtienʒepieŋ.
6 Wofuŋte aŋelozi jâpec‐jopa rame,
dapâcko âte sowarierâ jopazejec.
7 Jaŋe fuŋne tâmiricko bitiŋ râe‐narembiŋ,
fuŋne tâmiricko omaepemurâ nombâŋ ronarembiŋ.
8 Sisipiric acmâc jaha fisi‐jarezejec,
bitiŋ râe‐narembiŋ izi jaŋacne kicjopazejec,
nombâŋ‐jeŋicko hurâ omaenʒepieŋ.
9 Eme Wofuŋ bubiaŋ manacnepemu,
e baficnukacte kiwac qawac epemu.
10 Me kikefâc‐nane muniŋmu,
“O Wofuŋ, mozi gore sâc jukac?
Go qarâ suriŋne e ŋic qac momorihec ere meonec bataraekic,
â hapetac huacbucne e fiuc rorore meonec bataraekic.”
11 Burec micko âkec ŋiczi maicnueŋgopieŋ,
erâ wiac kâuc bakopac irec wio‐nareeŋgopieŋ.
12 Jaŋe wiac biaŋnere okacne sâqocne bâtikie‐nareeŋgopieŋ,
enarekupie bekâ mâsiŋ iŋucne jukopac.
13 No ine huc bacjopame busâqoc ŋaqi rojupo,
sowa juhuc sahac‐nane qapo,
qizeczi dunduŋ hurâ numuhuc jupo.
14 Âgo qomâ moc hâmome eeŋgopieŋ irec sâc epo,
me neŋgoc‐nane hâmome ezapo,
irec sâc dunduŋ dadape rac warec jupo.
15 No dâŋzi fâfâcnume ine aŋac‐jopaha tureŋgopieŋ,
no wiac enareniŋte manasuhuc tumaŋneŋgopieŋ;
ŋic pâpârâcne, ʒâŋe furu‐nane,
iŋucnezi musoriŋnuhuc domaŋgopieŋ.
16 Jaŋe sâke kiki dâŋ muhuc muhuc,
noraopec mic kikiaric kiŋgopieŋ.
17 Wofuŋ, go hone qâoma eku mo dameŋko behecmu?
Ʒika‐jeŋickonec bataracnuc,
juju‐nane laioŋ mickonec batarac.
18 Eme no tutumaŋ sâkoo daŋge gazapemu,
ŋic guru dindiŋko mumbiaŋgupemu.
19 Maŋgâŋ râsi enareeŋgopieŋ jaŋe mana‐jaretec,
sowine wiac fuacnekac muhuc mi aŋac‐jopazejec;
â fuŋne tâmiric qaisocnueŋgopieŋ
jaŋe ʒâŋe bazuc mi enarenʒepieŋ.
20 Jaŋe wamadâŋ mi mueŋgopieŋ;
erâ ŋic wamane juraŋgopieŋ
jaŋe ine eatuc‐jopaniŋte mamanasu gie baeŋgopieŋ.
21 Jaŋe noraopec mâretec aŋkehuc ʒiŋuc muŋgopieŋ:
“Jei, ʒâŋe fâri‐nâŋeczi qame honembeneŋ i!”
22 Wofuŋ, go i honemec i! Irec dâŋemâc mi juc!
O Wofuŋ, behecnurâ taicko mi juc!
23 O Anutu, Wofuŋ‐nane, qiriŋ qarâ ɋârec,
erâ dâŋnane dopeckehuc mutiŋnec.
24 Wofuŋ, Anutu‐nane, tiŋnegere sâcko ŋezicnuc,
jaŋe nore erâ aŋac mananʒipiŋte.
25 Jaŋe maŋzi ʒiŋuc mi munʒepieŋ:
“Sowine, iŋuc hâcne fuacneocte mueŋgopeneŋ,
nâŋâc sanaŋkekupene juju‐ticne omaekac.”
26 No ʒârâ ʒâpâ fua‐nareme aŋac‐jopakac,
jaŋe ejaretec qurutuarâ mimienʒepieŋ.
No pepecne enareeŋgopieŋ,
jaŋe mimizi ŋecjopakume weaŋkenʒepieŋ.
27 Â nore dâŋzi fârine fua taniŋkeocte mueŋgopieŋ,
jaŋe ine bubiaŋ manahuc ʒeri bari enʒepieŋ;
ehuc munʒepieŋ, “Wofuŋ e kâcɋene sâko,
e kiŋaŋŋic‐ticne juhâmoocte aŋackekac.”
28 Eme nameŋ‐nanezi tiŋnege mutaniŋkezejec,
â dameŋ sâc mugac bagarezejec.