41
Hucko fohuc Wofuŋ numucnewec
1 Hapetac hone maiŋ ejareekac ŋic ere manape ʒerine ekac;
dameŋ sâqocnao Wofuŋzi e ŋezickeocmu.
2 Wofuŋzi e hone soŋaŋ ecneme jufehuc juocmu,
eme mâreŋ irec ŋic jaŋe mu ʒeri ecneniŋmu;
â râsifâcne jaŋe wiac moc ecnezo mupie mi qikiŋne‐jareocmu.
3 Huc fohame Wofuŋzi dope hutuŋ ecneocmu,
â ʒâic wiac‐ticne bâmâteŋkecne‐fâreocmu.
4 No ine mupo, “Wofuŋ go aki anonoc enarec;
bâpiaŋnuc, no sâqocne bahuc bugao bapo hâcne.”
5 Râsifâc‐nane jaŋe qaisocnuhuc ʒiŋuc muŋgopieŋ:
“E wezimucko hâmome ʒâŋe‐ticne omaeocmu?”
6 Moc e iqicnuocte fisiekac e eatuc dâŋ muekac,
ehuc maŋnezi wiac repicne mana biric eekac;
izi hae ʒoŋao hurâ muiŋ musawec eekac.
7 Qaisocnueŋgopieŋ sasawa jaŋe saŋucko dâŋ muc manac eeŋgopieŋ;
wiac gâgâpâcne fua‐nareocte mamanasu gie baeŋgopieŋ.
8 Ehuc ʒiŋuc mueŋgopieŋ: “Wiac repicne moczi sahacnao bohotajec,
irec fokackonec mocwâc mi fahareocmu.”
9 Erâ wâc âgo fâri‐nane, maŋzi ʒâfickehuc jupo,
erâ nânâ wirec nâ juperec, eki wâc bunaneo bakac.
10 O Wofuŋ, go ine aki anonoc enarezemec,
ehuc mocwâc ɋiɋicne bacnutec okacne bâtikie‐jarezepac.
11 Râsi‐nanezi bawahacnurâ saoreŋ mi qaocmuo,
ine ʒiŋuc mupemu: Go nore mana biaŋkekomec.
12 Go ine maŋtaniŋ juekopacte dopecnuhuc jumeŋ,
erâ âkendâŋnutec maigao domahuc jaha juekopac.
13 Wofuŋ, Israere Anutu, e dameŋ tâmiric muteŋkehuc juzo.
Jâmbomac jâmbâŋ.