DÂKÂNE NAMBA 2
42
Anutu â tiri ufuŋ‐ticnere maŋhâhâŋ ee
1 Kâte bulimakaozi opâ basahuc hâmoekac,
iŋuc hâcne maŋ qâqâtâc‐nanezi Anutu gore hâmokac.
2 Maŋnanezi Anutu jujune gore boc hâmokac:
Mo dameŋko fisirâ Anutu ʒâŋe maige honepemu?
3 Ŋafe ʒoaŋ sâc ʒâŋeuc‐nanezi nânâ‐nane eekac,
ʒoaŋ ʒora ʒiŋuc nazahuc juŋgopieŋte: “Anutuge wena?”
4 No ʒâic manahuc wiac manasukopac
i mufuape maŋnane urueoc:
Ŋic guru dindiŋ biri ʒora jaŋere ŋondeŋko,
Anuture ufuŋko rajumbeneŋ;
ehuc hombaŋte ʒeri gae bafehuc hepene
irec micʒonʒoŋzi baafec‐nâpowec.
5 Maŋnane go wemocte boc gâpârekic?
 wemocte boc hâhâŋkekic?
Anuture woŋec juc! E ʒâŋe mai‐nanere babafic
â Anutu‐nane jukacte daŋge âzâcnepemu.
6 No Jordaŋ â Herimoŋ mâreŋko â Miʒa tikio juhuc,
maŋnane wahakacte Anuture manasukopac.
7 Opâ sâro‐ticnezi rucneme ʒâkâŋzi ʒâkâŋ wiracnekac;
jei, siri sâkogezi qâurucnu‐fârekac.
8 Ʒoaŋ sâc wiraekopac, “Wofuŋ aki anonoc‐ticne fuaoc!”
Ŋafe sâc gae‐ticnezi micnaneo foekac,
â juju‐nanere Anutu e numucneekopac.
9 Anutu qânâ‐nane âzâcneekopac, “Nore wemocte nikecguwec?
No râsizi bâuruŋnume wemocte maku ehuc jukopac?”
10 Râsifâc‐nane jaŋe mu ruruc enarepie ʒâic fâro repicne manaekopac,
dameŋ sâc ʒiŋuc nazahuc jueŋgopieŋ hâcne: “Anutuge wena?”
11 Maŋnane go wemocte boc gâpârekic?
 wemocte boc hâhâŋkekic?
Anuture woŋec juc! E ʒâŋe mai‐nanere babafic
â Anutu‐nane jukacte daŋge âzâcnepemu.