53
Anutu mickeeŋgopieŋ jaŋere dâŋ
(Mi Mâ 14:1–7)
1 Mutucne jaŋe maŋjeŋiczi mueŋgopieŋ:
“Anutu moc mi jukac.”
Jaŋe repicne, hehesic‐jeŋic mamakâcne,
moczi moc wiac biaŋne mi eekac.
2 Anutu e sambâŋkonec fime wahaekac,
ehuc mâreŋŋic ŋondeŋ‐jeŋicko mamanahec moc juhuc,
Anutu wira basac ecneeŋgopieŋ me mâcne, i honeekac.
3 Jaŋe qâsoriekicne sasawa,
ʒeŋgoma repirembiŋ.
Moczi moc wiac biaŋne mi eekac,
arictac jâmbâŋ.
4 Sâqocne bapa, ŋicfâc‐nane ki sipiric ejareeŋgopieŋ,
jaŋe maŋfânâŋ tâmiric jufâreŋgopieŋ me?
Jaŋe Anutu noraonec nânâ nâipiehuc,
sifu no mi wâsicnueŋgopieŋ.
5 Jaŋe bipic tatara hâhâwicne ejareocmu,
bipic tatara iŋucne moc mi fua warewec.
Anutu e somâ râe‐gareniŋmu jaŋere me kike hezu qazuocmu.
Anutuzi behec‐jopawecte goki imac‐jopacmu.
6 Zioŋkonec Israerao bâbâpiaŋ fuazac me!
Anutuzi ŋicfâcne jaŋere juju hata herisieocmuo,
Jakobozi ʒeri eocmu, â Israezi bubiaŋ manaocmu.