54
Râsi fisipie mitiŋiczi Wofuŋ numucnekac
1 O Anutu, go ʒâŋegere erâ baficnuc,
â tâpirigezi ŋezicnuc.
2 O Anutu, go nunumu‐nane manac,
micdâŋ‐nanere hazec râec.
3 Ŋic pepecheczi nuniŋte faharembieŋ,
ŋic qac momoriheczi juju‐nane nowac rozo muŋgopieŋ;
jaŋe Anuturao ʒâŋe mi fieŋgopieŋ.
4 Manakic, Anutu e babafic‐nane,
Wofuŋ e juju‐nanere dope.
5 Râsifâc‐nane okacne sâqocne risie‐jarezejec.
Wofuŋ, go erâ‐eesanaŋgere sâcko bâsirowec‐jopazemec.
6 Eme no maŋafec jaha taha bâzi egarepemu,
ehuc gore ʒâŋe muafeckehuc muzepac,
go buurucge fekicne.
7 Go hâcne ʒârâ hâriŋ sasawaonec bataracnumec,
eme no ʒâŋezi râsifâc‐nane honec‐jopahuc saoreŋ qakopac.