85
Israe kikefuŋ e fific guguriŋko juhuc numuwec
1 Wofuŋ, go mâreŋge aki anonoc ecnemeŋ,
go Jakobo wiac ŋemâcne fuacnewec i hetikiecnemeŋ.
2 Go ŋicfâcge hehesic‐jeŋicte kiŋ behe‐jaremeŋ,
â sâqocne‐jeŋic bâtâmire‐jare‐fâremeŋ.
3 Go kimbeŋge bâuruŋke‐fâremeŋ,
â aaricgere ʒocbâruŋ bâhâpomeŋ.
4 O bâbâpiaŋ‐nâŋecte Anutu, mocwâc heɋârec‐nâpoc,
â mamana sâqoc baju‐nâreekic i behec.
5 Go mamana sâqoc tatara tâmiric enârehuc jucmu me?
 aaricge mimiŋzi ɋâric foraocte mukic me?
6 Go mocwâc mi heɋârec‐nâpotec,
ŋicfâcge bubiaŋ mana‐garenʒapiŋ me?
7 O Wofuŋ, go aki anonocge nâwotuc,
â bâbâpiaŋge tahac‐nâpoc.
8 Wofuŋ Anutuzi dâŋ muzo ekac i manape,
e jâmbomac gurufâcne wamadâŋ jazazo ekac,
mitiŋicfâc‐ticne hâcne;
mâc mutuc hatao mi risienʒepieŋ.
9 Jâmbomac, e araŋ bacneeŋgopieŋ jaŋe bâbâpiaŋzi maic‐jopakac,
eme mâreŋ‐nâŋecko eri tatamac fofezejec.
10 Buuruc â siocmâc jahe bâbâfuac enicmu,
tiŋne juju â wama jahe mumuduc enicmu.
11 Siocmâczi mâreŋkonec âkeʒurâ feocmu,
tiŋne jujuzi sambâŋkonec fime wahaocmu.
12 Eme Wofuŋzi wâc jambuŋ tahac‐nâpoocmu,
â mâreŋ‐nâŋeczi mâriri‐ticne bâfuaocmu.
13 Tiŋne jujuzi bâniecneocmu,
â kike hata‐ticne soŋaŋkeocmu.