86
Mitiŋic moc e ʒârâ fuacneme numuwec
1 O Wofuŋ, go hazec râerâ dâŋnane manac,
no waha qaqane â hapetac.
2 No mitihec jukopacte juju‐nane soŋaŋkec,
kiŋaŋŋicge no gorao roweckekopacte baficnuc.
3 Go Anutu‐nanezi aki anonoc enarec;
o Wofuŋ, no ʒoaŋ ʒora wira‐garehuc jukopac.
4 Kiŋaŋŋicge no bunane bâmiriŋkec,
maŋnane, Wofuŋ, gorao sâsepe hefakac.
5 O Wofuŋ, go buuruc ehuc kiŋ bebehere afeckeekic,
â wira‐gareeŋgopieŋ jaŋe aki anonoc boc ejareekic.
6 O Wofuŋ, go nunumu‐nanere hazec râec,
wira wâwâsic egarekopac i manac.
7 Ʒârâ hâriŋ fua‐nareme sâc wâsicguekopac,
goki hâcne micnaneo roekic.
8 O Wofuŋ, nemu jaŋeraonec moczi gore sâc mi jukac,
erâ wâc gie goki bameŋ iŋucne moc mi bakicne.
9 Qâpuc guru bâfuac‐jopameŋ jaŋe fisirâ,
Wofuŋ, gore maio dapeniŋmu,
ehuc gore ʒâŋe muafeckeniŋmu.
10 Go hâcne kâcɋene jukiczi mâsi baekic,
go mocjahazi Anutu jukomec.
11 O Wofuŋ, go hatage qazu‐narec,
eme dâŋfârigere maŋnao juzepac;
maŋnane qâzucketec ʒâŋege araŋ bacnezepac.
12 Wofuŋ Anutu‐nane, no maŋ hâcbuc jaha,
go muteŋgupe,
erâ ʒâŋege muafeckehuc juzepac raŋɋa raŋɋa.
13 Go aki anonoc fekicne enarehuc juekic hâcne;
go juju‐nane hâmoc haere ʒâkâŋkonec baefumeŋ.
14 O Anutu, ŋic ʒaubacnezi imacnuniŋte faharembieŋ;
ŋic masu wânʒâŋheczi roroc embieŋ,
juju‐nane hetâcnezo muŋgopieŋ;
erâ jaŋe gorao ʒâŋe mi fiŋgopieŋ.
15 Wofuŋ, go ine Anutu maŋuruc â aki anonocgehec,
kimbeŋge uneŋne, â maŋgao aki anonoc
â jauŋ fâri fusucmawec fokac.
16 Noraopec fotikierâ nore buge sâqoreoc;
kiŋaŋŋicge no tâpiri henaretec huoc,
â kiŋaŋ narugere ŋokâ no baficnuc.
17 No âgo enarekic irec fuŋne bataniŋkec;
eme qaisocnuŋgopieŋ jaŋe ʒiŋuc honenʒepieŋ:
Wofuŋ, go baficnuhuc bâmiriŋnukomec;
iŋuc honerâ mimienʒepieŋ.